1 SAMUEL 24 - OTSAO BAIBEL (BSI)

Dawid-e Sol Chilangle Dantox

¹ Filistia nok füi azanlaxle Sol chatkya zuma Dawid a Engedi zui ma faokhato khünle ngokya wünle kox.

² Sol-e Israel nok süpahi khama ataxle müikya thom hwom 3000 süpahibu koplaxle Dawid hia chix khünakbu lomle Müijax-longkun le nyakkya handün chikao to ngui.

³ Chix a lomkax ma tüikya chun pom hama soxle tüikya longkun to ngui ilaxle ija omong to nazaklax angle dong. Ikhama amipongma Dawid hia chix khünakbu azwonle nuikya longkun changkya.

⁴ Hwome chix ang thüi: “Ija a nang hanpak changle! Nang zanpa nang chak to dong angkya ilaxle chix to nang mong atsutsu ma hwon angkya Jowanpae nang füi akaxdaoa.” Dawid-e zuile nguilaxle, Sol-e chitsingtoxle chix nyitua zütle pao.

⁵ Ikoxlechu Dawid tutex e Sol ang mongsikangün angkya,

⁶ ilaxle chixe chix khünakbu ang thüi: “Ku chongwangpa, mixhax-mixzang to chakmok laxle oma hwon angkya Jowanpae ku shong-abaxhüi, chemthüikoxle chix a tuita wanghompa ang achang ang Jowanpae kamkya mix changle! Kue chix to oma ikuxsa ngaxchu münmoküi, chemthüikoxle chix a Jowanpae kamkya wanghompa tuita changle!”

⁷ Idaile Dawid-e Sol to single chichang angkya hanpakma chix khünakbu mong jikle tsuak. Sol zo ilaxle ija longkun dantoxlaxle chix ma lom to pao.

⁸ Ifüima Dawid-e chix füima azuile ziklaxle chix nyakle akhong: “Wanghompa!” Sol-e aküile hu, ikoxle Dawid-e chix achuakle haxchi to akhuxle hu,

⁹ ilaxle thüi: “Kue nang lang ang tungle ngole le khualopkyabu kax ma nange büthüikoxle laxpu?

¹⁰ Nange hukoplax, athax ile longkun mong ma nang a Jowanpae ku chak to koxdaokya. Ku khünak züizüibue nang a langkoxhule thüikya, ikoxlechu nang hanpakma ku mongto kak ilaxle kue nang to ikuxsa ngaxchu chakmok-janlangle oma chemchu chimoküi, chemthüikoxle nang a tuita Jowanpae kamle kopkya wanghompa changle le kue akaxpu.

¹¹ Hulax, apa, ija ku chak angkya nang nyitua to hule koplax! Kue nang lang ang tsuakse ikoxlechu isa nyitua zaza zütle laxwüi. Ija ngünlaxle, ku mongto nang zan to kakya chemchu müntüi chichangba nang fün ama ang tungkya ku ma oma chemchu müntüile nange tsingle naxkop. Nange ku a langtom tata lang ang tungle ngopu, ikoxle ile nang mong amakya li oma mwot kue chemchu chimok.

¹² Künyi opupu thaipuix, Jowanpae tix fünle naxfa. Nange ku zan to kale ngokya bama Jowanpae nang towüi sikangünle naxchang, chemthüikoxle kue nang to oma ikuxsa ngaxchu mokle münchang.

¹³ Nange kaikya wanwünkax awanle ngopu, ‘Ochax a ochax khünake tix mokle!’ Idaile kue nang to omale chemchu münmok.

¹⁴ Hulax Israel nok wanghompa-e chem lang ang atumle ngopuix! Hulax, chixe chem achuale ngopuix! Hi mang tuita achua pia hia hitsik achuapuix!

¹⁵ Jowanpae kaxfün faüi, chixe künyi opupu thaipuix ija bama chixe zünüi. Zangwün tsaitong-kaxza to chixe hulaxle, nang chak tokya chixe ku khosele tamchu khosünle naxchang.”

¹⁶ Chemtue Dawid-e ija kaxzex tsuakle changpuix, Sol-e thüi: “Dawid, kusa, ija otsingtomtata ma nang changlax ma?” Ilaxle chix sop ang süt.

¹⁷ Ifüima chixe Dawid ang thüi: “Nang wüi supu, ikoxle ku wüi thaipu. Kue nang zongto chimüikya ipongpongle mokkox ngaxchu nang a ku zongto ipongpongle müipu!

¹⁸ Anyix nange ku zongto nang chemtukux müipuix ija ahodaoa, chemthüikoxle Jowanpae ku nang chak to koxdaokya ngaxchu nange ku chilangle toxpu.

¹⁹ Khünake ma zanpa koplaxle chilang homtoxle obima danle apaodaopu? Anyix nange ku to chem mokdaopuix ija bama Jowanpae nang to mohimanle naxchang!

²⁰ Athax kue tsingle laxdaoa, nang a Israel nok wanghom ang achangüi ilaxle nang chak ma wangting tsünlole ngoüi.

²¹ Ikoxle ku tamchu ku sixlibu mün owüiole amütle chichang angkya hanpakma, nange hwom max ang müntompu le Jowanpa mün ma tsaofa.”

²² Dawid-e ile wüi chang angkya le tsaosax. Ifüima Sol a hom to chat; ilaxle Dawid hia chix khünakbu a hwom azwonle ngokya nui to chat.