1 SAMUEL 23 - OTSAO BAIBEL (BSI)

Dawid-e Keilah Nok Khosün

¹ Filistia nok nguilaxle Keilah nok tingtakle hwome chwonchwonle zütle athün thomkya tsax komle ahux paokya zing Dawid-e atatle lax.

² Ikhoma chixe Jowanpa ma atüi: “Ku paolaxle Filistia nok single changüi hex-o?” Jowanpa lan: “Paokox ilaxle hwom to singlaxle Keilah nok kho awale kopkox.”

³ Ikoxlechu Dawid khünakbue chix ang thüi: “Judah haxtok ma ngaxchu kem abüt-aban angkya huanuma tüile thüikoxchu chatle chu Keilah to kalaxle Filistia nok to sing angkya tomning ifüi chongkya ziama changüi!”

⁴ Ikhoma Dawid-e Jowanpa füi tamchatle tsaitik-kaxshole chang. Jowanpae chix ang thüi: “Paokox ilaxle Keilah to singkox, chemthüikoxle Filistia nok to lüt angkya kue nang ang koxüi.”

⁵ Ikhoma Dawid hia chix khünaknu Keilah to kalaxle Filistia nok to sing; hwome Filistia nok müimamale lang ilaxle hwom tsom-pombu tsui lax; ile Dawid-e Keilah tingnu khosünle kop.

⁶ Chemtue Ahimelek sasün Abiathar paole azang laxle Keilah ma Dawid füi tuita ang asüipuix, chixe chix füi tomle Suakwex-nyi laxlaxle pao.

⁷ Dawid Keilah to paokya Sol-e atale lax ilaxle chixe thüi: “Zang-e chix ku chak fangma dandaoa. Long katuk füi pan zailaxle tüikya tinglong tuita to nguilaxle Dawid a chix alüile tsün ma amankya ang changpu.”

⁸ Ikhoma Dawid-e chix süpahibu zan to ka ang ahyen, ilaxle Keilah to kalaxle Dawid hia chix khünakbu kop ang tom.

⁹ Sol-e chix to sing ang achwonle tüikya zing atatlaxle Dawid-e Abiathar ang thüi: “Ngua-nyilo ikhato apüihüi.”

¹⁰ Ifüima Dawid-e thüi: “Jowanpa, Israel nok Zang, ku nang dapa khokho ma Sol Keilah to nguilaxle ija nok tingtakle amüt ang achwonle tüileta le kue atat ang kople.

¹¹ Keilah noke ku a Sol chak to koxle apao angkya hia? Kue atatkya lailaile Sol a nguitomtaüi hia? Jowanpa, Israel nok Zang, chingchalaxle ku kax to lanhüi!” Jowanpae lan: “Sol a nguiüi.”

¹² Dawid-e atüi: “Jangchang thüiningle Keilah noke ku tamchu ku khünakbu Sol chak to koxle apao angkya hia?” Jowanpae lan: “Hwome koxüi.”

¹³ Ikhoma Dawid hia chix khünakbu, pangnu athüt koxle mixhuak 600 tukux, nonokhaile Keilah angkya laile pao ang achex. Chemtue Sol-e Keilah angkya Dawid paole azangünata le atatpuix, chixe chix zankat azak.

Haxhua Nok to Dawid

¹⁴ Dawid a haxhua nok tokya Zif zui angkya faonu mongto azwonle ngo. Sol-e jento chix kop ang azong, ikoxlechu Zang-e Dawid a chix chak to otuechu chidan.

¹⁵ Dawid-e Sol a chix lang ang laile paokya ngünle lax. Dawid a Horesh ma Zif zui angkya faonu mongto tüikya.

¹⁶ Jonathan ikhato chix füi apong ang ngui ilaxle Jowanpae sünlax angkhato chem monghix angkya tüipule mongchen zang wünle tox.

¹⁷ Chixe thüi: “Nang taxza, Apa-e nang to chem münthüitho. Nang a Israel nok ma wanghom ang achang angkya ilaxle ku nang fang ma tüichong lyakho tüi angkya chixe bakle tsingle ngopu.”

¹⁸ Okhie tata füi tata chialekya zuikhui changpox-ole tsaosax. Dawid a Horesh ma ngo ikoxle Jonathan a hwom hom to chat.

¹⁹ Zif angkya khünak züizüi Gibeah ma tüikya Sol hato nguilaxle chix ang thüi: “Dawid a kwom chaxwan to Hachilah Haxnu Horesh ma khünle ngole. Onüi a Judah faonu zongma shuathongchi fao ma tüile.

²⁰ Wanghompa, nange chix kop angkya chemtukuxle azongle lomle ngopuix ija kwome awanpu; idaile kwom haxtok to nguilax, kwome tüle changkoxchu nange chix kop ang tomüi.”

²¹ Sol-e lan: “Hünzome ku hato ija chingcha ahokya hanpakma Jowanpae hünzom to mohimanle naxchang!

²² Pao laxle tamchatle opaktikle changhu; chix a ojong tomta ma tüipuix ilaxle chix owae ngündaopuix ibu opak-otua müile tik-hu. Kue chix a tüle huxtsing-loptsang khünak changle le atatle.

²³ Chix khünle ngokya tamting tomtata awanle kop-hüi ilaxle ija kaxho ku hato küithole apüi angkya wüi changle. Ifüima ku hünzom füi tomtomle paoüi, ilaxle chix ikhama wüi tüile jangchang thüiningle, kue chix zole changüi; ija hanpakma Judah haxtok bak-khak lomkoxchu lomüi.”

²⁴ Ikhoma hwom Sol thoma achale Zif to chat, Dawid hia chix khünakbu a Maon faonu ma tüikya; ija faonu a Judah shonak-lingnu zongma shuathong chikao ma tüikya.

²⁵ Ikhoma Sol hia chix khünakbu Dawid lom ang laile pao, ikoxle chixe ija kax atatlaxle ikha angkya laile paolaxle Maon faonu angkya longzakzyen to khünle ngo. Sol-e ija zing atatlaxle Dawid füito azuile zik.

²⁶ Sol hia füikyabu a haxnu tüchikao ma ikoxle Dawid hia chix khünakbu a ata-chikao male tüikya, ile hwom mafanfan to ngole tüikya. Hwom a Sol thoto akhangle zikle aham ikoxle Sol khünakbue hwom hato soxle jao hüile hwom to alop-haxkhakha.

²⁷ Ipongkhae kaxhomix tuita nguilaxle Sol ang thüi: “Momle chat-hüi! Filistia noke kem chaxwan tingtakle tüile!”

²⁸ Ikhoma Sol-e Dawid mantole ngokya dantoxlaxle Filistia nok füi azan ang chat. Ikhoma ija haxhua a Fan-jankya haxhua le nyak.

²⁹ Ikha dantoxlaxle Dawid Engedi haxsüt to nguile ikhato azwonle ngo.