1 SAMUEL 21 - OTSAO BAIBEL (BSI)

Sol Thoto Dawid Paole Aham

¹ Dawid a Nob ma nguapa Ahimelek hato pao. Ahimelek a chix füi apong ang abün-nga le hüi ilaxle atüi: “Nang lailai to ikhato chemto nguilaxpu?”

² Dawid-e lan: “Ku ikhato wangmwot to nguipu. Chixe ku chemmok ang nguipuix ija owa hamachu taxwün-ole thüile. Ku khünakbu füi kue jongta khama apong angkya akaxdaoa.

³ Athaxpi nang ma sütli chempang tüilaxpu? Ku ang ankhao aga chichangba nang ma chem tüipuix ija laxhüi.”

⁴ Nguapae lan: “Ku ma noklyake saxfang an müi müntüi, ikoxle otsao an tata wüi. Nang khünakbue ibama sheko füi jip-pomle machang jangthüiba hwome sax ang tsuak.”

⁵ Dawid-e lan: “Changle, hwome iningkya mwot mamoküi; kwom zangjang mwottho to paopongma ngaxchu ku khünakbue zanglom-ma ma alüile atsaole thompu, athax tomning kwom a khütkhaxkya mwottho ma tüile ikhoma ifüi sütsexle atsaole ngopu!”

⁶ Ikhoma nguapae Dawid ang ija otsao an kox, chemthüikoxle chix ma tüikya a Jowanpa ang tö kox angkya an, itata wüi; ija an hozün danüima tsapding angkya alüix laxle mama khato danle thomtan changkya. (

⁷ Doeg le amünkya müinyetmix khama lompa Edom sün tuita, owa Sol nye ang ngole tüikya hex, chix a, zanglom zomzingle khangkho-zangngai angkya hanpakma ikhama asu.)

⁸ Dawid-e Ahimelek ang thüi: “Nange ku ang koxtsuak angkya chang hia pax tüicha? Wanghom kaxtom müimamale akhangle changkya khoma kue chang-pax hia mama-mama khyepdi chemchu münkop, chak-hua ma achexle laikya changle.”

⁹ Ahimelek-e lan: “Ku ma Filistia nok Goliath kux changlo tuita tüile. Chix a nange Elah Haxsha ma langkya mix changkya. Ija a Suakwex-nyi thomkya nuakfüi ma nyi füi loplaxle tüile. Nange laxse jangthüi laxkoplax, ikhama chang-paxle ija tata wüi changle.” Dawid-e lan: “Ija ku ang laxhüi. Ifüi sümüikya changlo ojongtochu müntüi!”

¹⁰ Ikhoma Dawid a Sol zantho to paole Gath nok wanghompa Akish hato ngui.

¹¹ Chix nguakax-wangkhobue wanghompa hama wünle thüi: “Ija a hwom haxtok ma wanghompa ang ngokya Dawid münchang hexnyi? Israel nok shekobu azüile tsai ma: ‘Sol-e hajat tuita wüi lang ikoxle Dawid-e hajat bün lang’ le saikya mixsün a chix changpu.”

¹² Hwom zangwün atatlaxle Dawid mongto zule khompuatsile hüi, ilaxle chix wanghompa Akish thua tüle za.

¹³ Ikhoma, chemtue Dawid a hwom zui ma tüikya hex, ibue chix kop ang hüipongma chix a tuita kax chimankya mix angapa ningle achangle shu-shüile aho; chix a tinglong pan to shikle, kaxmai mun to thuakka waiwaile aho.

¹⁴ Ikhoma Akish-e nguakax-wangkhobu ang thüi: “Hulax! Chuja khünak a ongat khünak changle! Hünzome chix ku hato büthüi ang apüi ngo?

¹⁵ Ku ang mama ngatmixbu okhonguile müntüile hia? Ija ku hom ma chix ongat ang achang üntoxle ku thwonlop ang hünzome chix ku hom to büthüi ang apüi?”