1 SAMUEL 2 - OTSAO BAIBEL (BSI)

Hanah Zangjop

¹ Hanah-e zangjop: “Jowanpae ku ang mong amüile fa; chixe ku to mokle fakya mwot bama ku ang mong huanuma müipu! Kue zanpabu füi nyi ang koppu; Jowanpae ku to fongle changdaokya khoma ku ang mongmüipu!

² “Jowanpa lailaikya otsao owachu müntüi; chix lailaikya owa müntüi, kem Zang lailaikya khosünpa owa müntüi.

³ Nang mong azaxle ngamle ngokya zakdao; nang mongngam kaxbu adang dao. Chemthüikoxle Jowanpa a chitsing-jawan changpu, ilaxle khünaknue mokkya mwot pangwüi bama kax chixe fünle.

⁴ Tsakpa-zongpa süpahibu chak angkya tüle tsakkya hapkong zubu a fündaoa, ikoxlechu shonaile ngokya mix tsak-zong ang sütle.

⁵ Owang pongma wokfwot müile ngokya khünakbu anyix a süt hanpak ang hingchak kale, ikoxle woknuak ma maxngokya mix ang woknuak müidaoa. Susa chitüile ngokya mixchae naosom hwom anüt puxle alaidaoa, ikoxle obiobi honu ang ngole tüikya mixcha a chak hua ma toxdaoa.

⁶ Jowanpae khüzün amüt tamchu khüzün koxle; chixe khünakbu amalum pan fangto le ang tom, ilaxle ikha tokya chixe wüi tamchatle apüi.

⁷ Chixe züizüi zasa ang zing ilaxle mamabu a hakpa ang achang; chixe züizüi puinaile chang ang tom ilaxle mamabu a zaxzang ang tom.

⁸ Haxbu kha tokya chitüi-chinangbu chixe nwonle alai ilaxle haxmax-zangsamle ngokya chifün tokyabu hwom chixe nwon. Chixe hwom a wanghom naosom hwom füi zuikhui ang achang ilaxle hwom a achuak-achenle tüikya chifün ma dan. Chaxwannu chifün a Jowanpa kux changpu chixe ibu dingma chaxwannu zing.

⁹ “Chix to mongong-chalomle tüikya khünakbu kho chixe awa, ikoxle chichang-chizangkyabu a zangnak fangto asam; khünak tuita ang chix tsak-zong füi tholünkya kha chitüi.

¹⁰ Jowanpa zanpabu a max ang tomüi; zangkhoting tokhange chixe hwom khangkho ma atsak-adung ang tomüi. Jowanpae zangfang pangwüi kaxfünüi; chixe chix wanghom ang tsak-zong koxüi, chixe zünle kopkya wanghompa ang chixe anao ang tomüi.”

¹¹ Ifüima Elkanah ang Ramah to hom to chat, ikoxle naosa Samuel a nguapa Eli chitong ma Jowanpa thothale ngo ang Shiloh to ngo.

Eli Sasün Hwom

¹² Eli sasün hwom a laxli chitüikya khünakbu changkya. Hwome Jowanpa chito mong ojao chikox

¹³ chichangba nguapabue khünaknu ma tsang-ngangle chang angkya olombu to mong ojao chikox. Itülüi khünak tuitae chix tö koxle ngopongma, nguapa da tuita, owa azom füikya hoklak koplaxle ikhato ngui ang tomüi ilaxle müi songle ngopongma

¹⁴ ija mixsüne müi songle ngokya tik khato hoklak füi top, ilaxle ija hoklak ma chemtukux myenle changpuix, ibibi a nguapa hwom süntom ang laxle apüi ang tsan. Shiloh to tö kox ang nguikya Israel nokbu to hwome ilele wüi hwonle ngo.

¹⁵ Ito bole, ozao süile koplaxle zokle machangba, nguapa dapa nguilaxle tö koxle ngokya mixsün ang thüiüi: “Nguapa ang atsanlaxle kox ang ku ang müi hidaole laxhüi, ikoxle lumdaokya müi münlaxüi, müihing-hing wüi laxüi.”

¹⁶ Ija mixsüne: “Kwom ang pongwang ma mokse shongtsuak ang danhüi; pongwang ma müizao zokle shong-kop-hax, ifüima nang mong atsutsu kha laxlax”, le jangthüiba, ija nguapa dapae lanüi: “Ile münchangüi! Ku ang ija müithom athax wüi koxle kop-hüi! Nange ku ang ija chifa thüiningle kue zongzong ma pale paoüi!”

¹⁷ Eli sasün hwom ochax ibu a Jowanpa zongto müimamale thaikya ang achang, chemthüikoxle hwome Jowanpa ang koxkya tö tha ajaole ile hwon.

Shiloh ma Samuel

¹⁸ Ipongma naosa Samuel-e Jowanpa thothale ngokya. Chixe otsao jaknyi nyilo tho.

¹⁹ Zangpua foto honue chix ang nyipong tuipong singlaxle, she kakopae zangpua tö kox ang paopongma azuile paolaxle ija apongle kox.

²⁰ Ipongma Eli-e Elkanah hia chix kakonu hokhi to mohiman, ilaxle Elkanah ang thüi: “Jowanpae ija mixcha makhange ija naosa hünkhie Jowanpa ang atsaole koxdaokya lüi ma lax ang naosom mohimanle naxchang kox.” Ile chang füima hwom a hom to chatle chat.

²¹ Jowanpae Hanah to mohiman, ilaxle she makhange sasün hwom azom ilaxle sacha hwom anyi pux ang tom. Naosa Samuel a Jowanpa mwottho ma tsongle hüi.

Eli hia Sasün Hwom

²² Athaxpi Eli a azule hüi. Sasün hwome Israel khünakbu to hwonkya chixe na to wangle chang. Hwom a Jowanpa Ngwotnui Nyihom fülom ma mwotmokle ngokya shekobu füi ngaxchu nganguile chang.

²³ Ikhoma chixe hwom ang thüi: “Iningkya oma mwot hünzome chem ang mokpu? Hünzome mokle ngokya ochax mwot bama ku hato noknusae kaxwün wangle tüile.

²⁴ Ku sasün hwom, iningkya mwot mokle ngokya zakün! Jowanpa khünakbue ija ningkya bama zangwünkya ngaxchu tuita nushix dongkya mwot changpu!

²⁵ Khünak tuitae mama mix owawa zongto thaile jangchang, Zang ija khünak khose ang thoüi; ikoxle Jowanpa zongto achaxkya khünak kho owae süntsuaküi?” Jowanpae hwom mik amüt angkya mongzangwünle tsuakdaokoxle hwome hopa kax ma ojao chilax.

²⁶ Naosa Samuel tsongle hüi ilaxle khünak hia Jowanpa, pangnusa zongto sule mok-sax.

Eli hwom Homkha hanpakma Aje Kax

²⁷ Eli hato ajepa tuita Jowanpa kaxho koplaxle ngui: “Chemtue hünzom putong Arun hia hwom homkha Ijip nok to da ang achangle ngokya hex, ipongma kue ku Arun hato ngaile aho.

²⁸ Israel homjen pangnu khama kue chix kako-homkha khünakbu a ku zompu-zangpabu ang kamle kop. Tötsap ma ku thothale chang angkya sobu zokle ongan müikya angan angkya ilaxle ku füi zangwünle changüima nguapabue suakwex-nyi thole kop angkya ibu mwot kue hwom ang kox. Ilaxle kue tö-tsap ma zokle ashunle tö koxkya kha angkya hwom süntom süile tswonle kop ang tom.

²⁹ Jangchangba büthüikoxle hünzome ku khünaknue kue lomkya töbu ku hato apüile koxkya to nüfux dongpu? Eli, nange büthüikoxle ku füi ngaxchu hünsa hwom wüi achuak-achenle, ku khünaknue ku hato apüikya töbu kha angkya amüimüikha zünle koplax ilaxle ibu saxlinglaxle amo-amaile ngo ang tompu?

³⁰ Ku, Jowanpa, Israel nok Zang-e ledaokya ma hünzom homkhae ngua mwot mokle ku thotha angkya hex-ole tsaokya changpu. Ikoxle athax kue thüipu, kue ija tsaotsüt münthom ngoüi! Itülüi, opange ku achuak-achenle changpuix, kue hwom achuaküi, ilaxle ku wünhaile changkyabu to kue e-ma chilaxle hupu.

³¹ Apakoplax, kue nang kako-homkha angkya naosünbu mik max ang tom angkya hanpak ngangle hüingole, ile changkox tix wüi hünzom homkha angkya khünak owachu tsünlo-khothole ngo ang chikopüi.

³² Hünzom a tüle sikngünle changüi ilaxle kue Israel nok mamabu ang koxle changkya mohimanbu to hünzome osingle hu ang tomüi,

³³ ikoxlechu kue hünzom homkha angkya osix-olibu khama tuita panle tüile, ilaxle chixe ku nguapa mwot mokle ku thothale changüi. Ikoxlechu chixmikduak tuita ang changüi ilaxle monghom angkya chemchu chitüile maxüi, ilaxle nang sixli mamabu a tata füi changnong-pünthomle alün-aloxkya ma mik maxle changüi.

³⁴ Chemtue hünsa Hofni hia Finehas nyi tomle nyix tuita ma zile paoüihex, ijama nang füi kue akaxkya ku kax pangwüi changle hüi angkya ocha ahoüi.

³⁵ Kue ku nguapa ang ku to mongong thomkya khünak zünle laxüi ilaxle ija khünak ang ku mongtex mwot mok ang tomüi. Kue chix ang osix-oli faüi; ibue kue zünle kopkya chongwangpa chitong ma jento chix thothale changüi.

³⁶ Nangsix-nangli ozün ma tüikya pangwüi chix hato nguiüi ilaxle chix ma ngun hia sütlingbu jule changüi; ilaxle masüt hanpak ang nguapabu to fongle hingchak mwot lomle nguiüi.”