1 SAMUEL 13 - OTSAO BAIBEL (BSI)

Filistia Nok füi Azankya

² Sol-e 3000 khünak zünle kop,2000 a chix füi Mikmash ma ilaxle Bethel angkya haxhua nok ma thom, ilaxle 1000 a sasün Jonathan füi tomle Benjamin homjen haxsüt ma tüikya Gibeah to akat. Ilaxle mamabu a Sol-e mahom-hom to achat.

³ Jonathan-e Filistia lompa Geba ma lang. Ija kax Filistia nok pangnusae wüi atat ang kop. Sol-e a zan to ka angkya hanpakma ahyenle Ibri khünakbu se ang pangnu khato nyazong angao.

⁴ Sol-e Filistia nok lompa langkya ilaxle Filistia noke hwom to miktsakle le Israel nok pangnusa hama wün. Ikhoma Sol-e ahyenkya to lanle khünaknu a chix füi apong ang Gilgal ma athüt.

⁵ Israel nok füi azan ang Filistia nok asox; hwom ma 30, 000 man-kanlin, mankho ma ngalaxle azan angkya khünak 6000 ilaxle tinu kax angkya fix büta cha ma azan angkya süpahibu tüikya. Hwom a, Bethawen zong ma handünchi, Mikmash to nguilaxle ikhato pom zaile athong.

⁶ Ifüima hwome Israel nok to za-adünle single hüi, ikhoma Israel nokbu khosam ashukle ban ma thom. Israel nok züizüi longlua hia tswomkha chichangba longnuk hia thapshua tamchu tüküi, ibu ningkya khato azwonle ngo;

⁷ züizüi khünakbu a Jordan shuanu tale lüi laxle Gad hia Gilid to ngui. Sol a Gilgal ma tüikya, ilaxle chix füi tüikya khünakbu a khosam ashukle zale abüt-abanle ngo.

⁸ Chixe nyix anüt Samuel tanle nui. Samuel-e ile chix tanle nuihüio thüilaxle chatle Gilgal to tam chingui. Khünaknue Sol chix tata dantox ang azong,

⁹ ikhoma chixe hwom ang thüi: “Zokle ashunkya tö hia notom-tusüi tö ku hato apüihüi.” Chixe zokle ashunkya tö kox,

¹⁰ ilaxle chixe ija mwot tsuakle tüipongkhae Samuel-e ikha alop. Sol a chix hato zikle pongzale pongkop,

¹¹ ikoxle Samuel-e thüi: “Nange ija chem hwon?” Sol-e lan: “Khünaknu a ku dantoxlaxle pao ang süt, ilaxle nguiüihex-o thüikya otu ma nang chingui; ibomachu Filistia nok a Mikmash ma ziakople asox ngotüi.

¹² Chaxwan-zanghan ile changkya khoma kue thüt, ‘Filistia noke ija Gilgal ma ku to single changüi ikoxle kue athax kople Jowanpa ma chix chingcha ju-lomle machang.’ Ile changkya khoma kue alüile tö kox angkya hato ahüipu.”

¹³ Samuel-e lan: “Ile mokkya ija a ongat mwot. Nange Jowanpa nang Zang-e koxkya kaxtom kax ma münlax. Nange chix kax ma laxkoxba, nange tamchu nangsix-nangli hwome Israel nok thakma jento apün-awangle ngose.

¹⁴ Athaxpi nange apün-awangkya zaküi. Nange chix kax ma chilaxle changkya khoma Jowanpae chix mongtsukya khünak lom laxle ija mixsün ang chix khünaknu thak ma apün-awangle ang tomüi.”

¹⁵ Gilgal angkya Samuel a chix lom to pao. Khünaknu pangwüi Sol füito azuile süpahibu füi apong ang pao. Gilgal angkya hwom Benjamin haxsüt tokya Gibeah to pao. Sol-e chix süpahibu to akiak-aziakle hu. Chix süpahibu a 600 tukux wüi tüikya.

¹⁶ Sol, sasün Jonathan hia chix khünakbu Benjamin haxtok angkya Geba ma athong, Filistia nok pom a Mikmash ma tüikya.

¹⁷ Filistia süpahibu othom azom ma ahanlaxle hwom pom angkya zan to ka ang lai; kat-thom tuita a Shual angkya Ofrah chito ka,

¹⁸ mama thom tuita a Beth Heron chito ka ilaxle ata thom a Zeboiim angkya haxsha hia sak-hax fao ngünngünle tüikya kha longzipong to ka.

¹⁹ Israel nok haxtok ma changthup mixbu chitüi chemthüikoxle Ibri khünakbu ang chang hia pax zing ang chitom angkya Filistia noke aju-ajangle ziakople thom. (

²⁰ Han-dangbu, kho, wafax hia changkuix ibu wun angkya hanpakma Israel khünakbu a Filistia nok hato pao angkya;

²¹ wabu wunle anaxkya hia pax junle paxfuabu pütle koxkya hanpak ang otha a ngunkhix muapong, ilaxle hanwa hia kho, ibu wunkya mün to ngunkhix anyi pong lax.)

²² Ikhoma azankya nyix Israel khünakbu ang, Jonathan hia hopa Sol hokhi ma tüikya boma chang hia pax ibu owamachu chitüi.

²³ Filistia noke Mikmash Lomnu tsyen ang süpahi othom tuita apao.