1 SAMUEL 12 - OTSAO BAIBEL (BSI)

Samuel-e Khünaknu Pünzün-wangsaile Chang

¹ Ifüima Samuel-e Israel nok ang thüi: “Hünzome ku ang mok-hüiole atsangkya kue mokle fadaoa. Kue hünzom ang apün-awang angkya wanghom faodaoa,

² ilaxle athaxpi hünzome hünzom lom azüi angkya hanpakma chix koplax. Ku a kho ngaxchu thole azudaoa, ikoxlechu kusa hwom hünzom füi tüile. Ku hünzom lompa ang naosün pong tokhange wüi ngole hüikya anyix kople ngole hüipu.

³ Ku ima tüipongma kue tütali thaikya mwot mokle jangchangdao thüiningle Jowanpa hia chixe kamle koxkya wanghompa nyi tunthoma ku ma tsaitox-kaxfe angkya oli bakle ngailax, kue owawa kux maihu chichangba mantsak pale zongzong ma laxkya nox tüidaocha? Kue owawa angkya zuizun laxle changdao cha? Kue iningkya mwot tütali ma thaile mokdaokya thaile jangtüi thüiningle, kue laxdaokya kue achatle koxüi.”

⁴ Khünaknue lan: “Nange kwom to dyen-nganle hia adix-adale hüikya noxjao matüi; nange owa angkyachu chemchu zongzukle münlax.”

⁵ Samuel-e lan: “Anyix hünzome ku ma thaikya onox chemchu müntüile thüikya zangwün bama, chixe kamle thomkya wanghompa hia Jowanpa nyi a ngünmix changle.” Hwome lan: “Changle, Jowanpa a kem bama ngünmix changle.”

⁶ Samuel-e chizakle thüi: “Mosa hia Arun nyi zünle kopkya tamchu hünzom pupa hwom Ijip nok tokya sünle apüikya a Jowanpa changle.

⁷ Athax hünzom ma ngwotnui nui to ajonghüi, ilaxle Jowanpa pomtho ma kue hünzom to tsaitox-kaxfele hünzom hia hünzom putong hwom khosün angkya hanpakma Jowanpae mokkya ohünotün mwotbu hünzom ang texle atak ang tomkya makhange ngaile wünfang.

⁸ Chemtue Jakop hia hwom homkha Ijip nok to ka ilaxle Ijip noke hwom to afangle thompuix, hünzom putong hwome hwom to asun angkya hanpakma Jowanpa to nyakle akhong, ilaxle chixe imo wün ang Mosa hia Arun hokhi tsanle akat. Okhi makhange hwom a Ijip nok chak tokya sünle apüi ilaxle ija haxmik-longkho ma tingkop-haxzingle chang ang tom.

⁹ Ikoxlechu khünaknue Jowanpa hwom Zang alakle awüt, ikhoma chixe Filistia hia Moab nok wanghombu, Hazor tingnu angkya süpahi lompa Sisera, ibu a hünzom putong hwom füi azan ang tom ilaxle hwom to anao.

¹⁰ Ifüima hwome hwom to asun angkya hanpakma Jowanpa to nyakle akhong, ‘Kwome ochaxbu lyenle changdaoa, büthüikoxle, Jowanpa, kwome nang hato tok aho ilaxle Bal hia Astarte hwom chapabu to shwomle changdaoa. Nange kwom zanpabu chak tokya khosün hüi, ilaxle kwome nang to shwomtole changüi!’

¹¹ Ilaxle Jowanpae Gideon, Barak, hia Jefthah hwom apao, ilaxle oshukma ku ahüipu. Kwom pange wüi zanbu chak tokya hünzom azünpu, ilaxle hünzom chaza angkya chitüile ngo ang tompu.

¹² Ikoxlechu chemtue Amon nok wanghompa Nahash-e hünzom to single hüi angkya ngünle laxpuix, hünzome Jowanpa hünzom chongwangpa changpule hünzome chilaxle ahai ilaxle ku ma wanghom tuita fakox wüi müiüile jupu.

¹³ “Hünzome zünkya tamchu hünzome jukya wanghom a ija, ikhama; ilaxle athax Jowanpae chix a hünzom ang koxdaoa.

¹⁴ Hünzome Jowanpa, hünzom Zang to achuak-achenle, chix thothale, chix zangwün to apale, chix kaxtom kaxbu ma laxle jangtüi, ilaxle hünzome tamchu hünzom wanghompa-e chix füito azuile jangchang, hünzom füi pangnusa müile leüi.

¹⁵ Ikoxle hünzome Jowanpa zangwün to na chitha ilaxle chix kaxtombu kax ma chilaxle jangchang, chix a, hünzom tamchu hünzom wanghompa zongto zanpa ang achangüi.

¹⁶ Idaile hünzom ojongma tüipuix ikhama ajongkox, ilaxle hünzome Jowanpae mokkya ohünotün mwot ngünle laxüi.

¹⁷ Ija a, wanu, wonglai tsax atu tu changle. Ikoxle kue jopüi ipongma Jowanpae tsaktsakdungle zangwat ang tomüi. Chemtue ile changüihex, hünzome Jowanpa ma wanghom jukya chix zongto huanuma achaxkya ang achangüna le awanle laxlax.”

¹⁸ Ikhoma Samuel-e zangjop, ilaxle ija nyix-nyix wüi Jowanpae tsaktsakdungle zangchei-zangwat ajo. Ifüima khünaknu pangnu Jowanpa hia Samuel hokhi thua za;

¹⁹ ilaxle hwome Samuel ang thüi: “Alixachong, chingchajaja laxle kwom chizi angkya hanpak bama Jowanpa to zangjople changkox. Mama-mama ochax bomachu wanghom jukya ma kwom huanuma thaidaoale kwome awan ang kople.”

²⁰ Samuel-e lan: “Taxza, ilaxle hünzome iningkya ochax mwot mokle changdao koxlechu, Jowanpa tok ahole taxchang, ikoxle nangkün-nangmong bakle koxlaxle chix thothale changkox.

²¹ Othai baozangbu hato taxpao; hwome hünzom to fongle fa ang münthoüi, chemthüikoxle ibu a otsingtsing münchang.

²² Jowanpae hünzom a chix khünaknu ang achang angkya tsaosaxdaoa, üntoxle mongzangwünle tsuakdaoa.

²³ Ilaxle ku bama, hünzom hanpakma chatchatnaole zangjople ochax chilyen angkya Jowanpae abaxle. Itülüi kue oja changpuix ilaxle hünzome mok angkya oja supuix ijatix anwot-anole koxüi.

²⁴ Nang kün-hi-mong tokhange zongbakle mongong tüikya füi Jowanpa thothale changkox. Hünzom hanpakma chixe mokkya ohünotün mwotbu taxalak.

²⁵ Ikoxlechu hünzome chizakle ochax lyenle jangngo, hünzom tamchu hünzom wanghom max ang tomüi.”