Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 SAMUEL 1 - OTSAO BAIBEL (BSI)


Shiloh ma Elkanah hia Chix Kako

1 Elkanah le amünkya khünak tuita tüikya, chix a Efraim homjen angkya ilaxle chix a Efraim Haxhua nok tokya Ramah tinglong ma ngokya mix changkya. Chix a Jehuram sasün, Elihu susün, ilaxle Tohu kako-homkha angkya, ija a Zuf saxthom ma tuita kangkhai.

2 Elkanah ang kakonu anyi tüikya, Hannah hia Peninnah nyi. Peninnah ang naosombu tüihu, ikoxle Hannah ang a tuita chitüi.

3 Zangpua to Elkanah, Zang shwomle Jowanpa ang tö kox ang Ramah tokhange Shiloh to ngui. Eli sasün Hofni hia Finehas nyi ikhama Jowanpa nguapa ang ngole tüikya.

4 Elkanah-e tö koxkya foto, chixe müithom tuita Peninnah ang kox ilaxle müithom tuita a sasün nyi angle kox.

5 Ilaxle Hannah to chixe tüle mongkün ikoxlechu chix ang müithom tuita wüi kox, ikoxlechu Jowanpae she a naosom ngui-dongle chang ang chitomle tsyenthom.

6 Peninnah, nüfüinue she ang mong atsikle ngo ilaxle adix-adale chang, chemthüikoxle Jowanpae she a naosom chitüi angkya hanpakma tsyenle thomkya she-e ngün.

7 Ilele wüi zanglao obibi hex ngole hüi; chemtue hwom Jowanpa hom to paoüihex, Peninnah-e Hannah ang mong huanuma ama ikhoma she a sople chemchu münsax-münlingpule mongmaxle ngo.

8 She kakopa Elkanah-e atüi: “Hannah, nang a büthüikoxle sople ngopu? Hünsa hwom bün tüikya füi ngaxchu ku wüi tüichong münchang hia?”


Hannah hia Eli Nyi

9-10 Nyixta hwome Shiloh ma fongsaxle tsuak füima, Hannah ajongle pao. She ang mong zongbakle ma, ilaxle she a mongmaxle sopngale zangjop. Ipongma nguapa Eli kaxfün nui hama chix ngwotnui ma thungle tüikya.

11 Hannah-e tsaotsütle thüi: “Jowanpa Khüthak Zang, nang danu ku to huhüi! Ku künduk-mongthang ngünle laxhüi ilaxle ku texle ataklax! Ku taxalakünfa! Nange ku ang lüka naosa tuita jangfa, kue chix atsaole, chix tsüntsüne nang thotha ang danüi ilaxle chix ang otuechu kho münsexüi.”

12 Hannah-e Jowanpa to okuilole jop, ikoxle Eli-e she tun to hule ngo.

13 She-e huxsa ma zangjople ngo; she tun a mokmokle ngokya, ikoxle she-e ozing alaile chichang. Ikhoma Eli-e she a jutokkya changüile thüt,

14 ilaxle chixe she ang thüi: “Nange jutok ahole ngokya zakün! Juling danlaxle khangka hingshele ngolax!”

15 She-e lan: “Alixachong, ku a jutokkya münchang. Ku a julinglaxle nguikya münchang! Ku ang tüle mongsik-ngünle tüikya khoma kue jop-tole Jowanpa hama ku zoshun mongzangwünle ngokya changwüi.

16 Ku a tuita laxli chitüikya mixcha changle le taxthüt. Ku a huanuma mongsi-ngünkya tüikya khoma kue ija ningle zangjople ngopu.”

17 Eli-e thüi: “Haxmüi-zangmale chatlax, ilaxle Jowanpa Israel nok Zang-e, nange chix ma jukya naxfa fa.”

18 She-e lan: “Nange jento ku hanpakma chingchale texhüi.” Ifüima she laile pao, hidaole sütlingsa sax ilaxle alüile mongma chitüile ngo.


Samuel Puxkya hia Chix Atsaole Koxkya

19 Ofüima Elkanah hia chix kakobu swomsae zo, ilaxle zangshwom laxle hwom hom Ramah to chat. Elkanah a chix kakonu Hannah füi jip-pomle chang, ilaxle Jowanpae she zangjop to lan.

20 Ifüima she ma nao nguidongle chang ilaxle lüka naosa tuita pux. She-e ija nao ang Samuel le mün kox üntoxle she-e thüi: “Chix a kue Jowanpa ma jule laxkya nao changle.”

21 Anaole Elkanah hia chix homkha ang Shiloh to paolaxle Jowanpa ang zangpua tö hia chixe tsaosaxkya ataxkya tö, ibu kox angkya hanpak nguile hüi.

22 Ikoxle izuma Hanah a chipao. She-e kakopa hama akax: “Ija naosa ham tsuakle tsongkya füi tomle kue chix a Jowanpa hom to apüiüi ilaxle tsüntsüne chix ikhato ngo ang tomüi.”

23 Elkanah-e lan: “Müiüi, nange oja wüi sümüiüile thütpuix, ija moklax; chix ham tsuakle tsongkya kople nang hom ma nüilax. Ilaxle Jowanpae nang kaxtsao otsing tomtata changle lai ang naxfa fa.” Ikhoma Hanah a sasün to hule hom ma nui.

24 Ija nao hamtsuakle tsongle hüikya füima Hanah-e chix a Shiloh to pao. Chix füi tomle tuita zanglao azom nguidaokya maihupongpa, ankhix tuakbün, ilaxle müikhwon nyitsong tuita ma awangle grepti-ju, ibu laxlaxle pao. She-e Samuel a naosa ma tüitanto wüi Shiloh to Jowanpa hom to apüi.

25 Hwome ija maihupong langle changkya füima hwome ija nao Eli hato apüi.

26 Hannah-e chix ang thüi: “Alixachong, nange ku texle atakcha? Ikhama Jowanpa to jople nange ngünkya mixcha a ku changle.

27 Kue chix ma ija nao laxhüile jule zangjoppu, ilaxle kue chem jupuix ija chixe ku ang koxle tüile.

28 Ikhoma kue chix a Jowanpa ang atsaole koxpu. Chix ozün ma ngokya kople chix a Jowanpa kux ang ngoüi.” Ifüima hwome Jowanpa to ikhama shwom.

Wancho Naga Bible - OTSAO BAIBEL

Copyright © 2012 by The Bible Society of India

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ