1 PUKAX-PANGAO 26 - OTSAO BAIBEL (BSI)

Zangshwom-Hom Nyetmixbu

¹ Zangshwom-Hom Nyetmixbu ang thomkya Liwi hwom othom khama mwot ibibile tomhan. Korah saxthom angkya, Asaf homkha angkya Kore-e sasün Meshelemiah tüikya.

² Chix ang sasün anüt, tüichong naoli achwotle zale: Zekariah, Jediael, Zebadiah, Jathniel,

³ Elam, Jehohanan, ilaxle Eliehoenai hwom bibi tüikya.

⁴ Obed Edom le amünkya, Zang-e sasün hwom 8, tüichong naoli achwotle zale: Shemaiah, Jehozabad, Joah, Sakar, Nathanel,

⁵ Amiel, Isakar, hia Peullethai hwom bibi mohimanle tüikya mixsün tuita tüikya.

^6-7 Obed Edom sasün tüichongsa, Shemaiah, ang sasün azok: Othni, Refael, Obed, Elzabad, Elihu, ilaxle Semakiah hwom tüikya. Ibu a, hwome tüle tsuak-manle tüikya khoma, hwom saxthom khama okax-khobu changkya.

⁸ Obed Edom homkha makhange ija ziapai ang tüle sütman mwotmankya khünak hwom mixhuak 62 alai.

⁹ Meshelemiah homkha makhange süt-tsuak mwot-tsuakle tüikya khünakbu hwom sün 18 alai.

¹⁰ Merari saxthom makhange sasün hwom ali hopa Hosah tüikya. Chix sasün hwom ali a: Shimri (chix a tüichongsa chichang, ikoxlechu hopae chix a tuita lompa ang zing),

¹¹ Hilkiah, Tebaliah, ilaxle Zekariah hwom bibi. Chix sasün hwomkha angkya Zangshwom-Hom nyetmix hwom 13 tüikya.

¹² Zangshwom-Hom nyetmixbu a othom-othom ma ahanle tüikya. Hwom a homkha-homkha ma ahan ilaxle Liwi hwom lailaile hwom angchu Zangshwom-Hom ma mwot tomhanle kox.

¹³ Othom hixkya chongkya le chiwün ngo homle, pangnu homkhae wüi ma hato chem asupuix, ija fülom nyekya hünlit lax angkya chizing tswon.

¹⁴ Shelemiah-e handünchi fülom nye angkya kop, ilaxle chix sasün Zekariah, mixsün owae jento müikya zünkax-saikax koxle tüipuix, chixe a shuakuxchi fülom nye angkya tswon.

¹⁵ Obed Edom ang a shuathongchi fülom asu, ilaxle chix sasün hwom ang a pungbu nye angkya asu.

¹⁶ Shuppim hia Hosah nyi ang hannopchi fülom nye angkya asu üntoxle Shalleketh ang a haxkhochi lom angkya fülom nye ang asu. Nye angkya mwot a tsüilüile nye angkya hanpak tomhanle chang.

¹⁷ Handünchi kao ma nyixfokya to nyetmix mixsün azok pong ajongüi; shuakuxchi ma mixsün alie ilaxle shuathongchi ma mixsün alie nye. Nyixfokya to mixsün ali ponge pungbu nyeüi, pung tuipong to mixsün anyi pong.

¹⁸ Hannopchi angkya nazak nui zui ma nyetmix mixsün ali a lomnu zui ma ilaxle anyi a ija nazak angkya onui ma jao tüikya.

¹⁹ Ibibi a Korah hia Merari saxthombu ang nye angkya mwot ahanle koxkya changle.

Zangshwom-Hom ma Mok angkya Mama Mwotbu

²⁰ Hwom füikya hozui Liwi hwom a Zangshwom-Hom tuinabu hia pungbu, ojongkha ma Zang ang atsaole koxkya hingho tuinabu tüipuix, ibu to humele chang angkya mwot kox.

²¹ Gershon sasün hwomkha angkya Ladan a, ibibi homkha othom, chix sasün Jehiel chuwüi womle, hwom putong changkya.

²² Ladan sasün mama anyi, Zetham hia Joel nyi a, Zangshwom-Hom tuiza-nakom hia pungbu to hume angkya hünlit koxle tüikya.

²³ Amram, Izhar, Hebron, hia Uzziel hwom sixlibu ang chuwüi mok angkya mwot tomhanle kox.

²⁴ Mosa sasün Gershom saxthom angkya Shebuel a Zangshwom-Hom tuiza-nakom to hu angkya khama hünlit okho koplaxle ngokya mix changkya.

²⁵ Gershom honao Eliezar makhange chix a Shelomith füi süntsing-münwan tüikya. Eliezar a Rehabiah hopa changkya, Rehabiah a Jeshaiah hopa changkya, Jeshaiah a Joram hopa changkya, Joram a Zikri hopa changkya, Zikri a Shelomith hopa changkya.

²⁶ Shelomith hia chix homkha a, wanghompa Dawid, konu tüichongbu, saxthom lompabu ilaxle süpahi akhokyabu, ibue hingho tuita ningle Zang ang koxle atsaokya tuinabu pangnu to akhi angkya mwot kople tüikya.

²⁷ Hwome zan ma kopkya tuinabu züizüi apüi ilaxle ibu Zangshwom-Hom ma lax ang atsaole dan.

²⁸ Zangshwom-Hom ma lax ang atsaole changdaokya tuinabu pangwüi; ajepa Samuel, wanghompa Sol, Nar sasün Abnar ilaxle Zeruiah sasün Joap, ibue apüikya hinghobu chuwüi ikhama womle tüikya. Ibu to akhi-atakle hume angkya a Shelomith hia chix homkhae hünlit laxle tüikya.

Mama Liwi Hwome Mok angkya Mwotbu

²⁹ Izhar susa hwom khama, Kenaniah hia chix sasün hwom ang ibu to apün-awangle hume angkya mwot kox: Hwome mokkya pangwüi chakza ma thom angkya ilaxle Israel khünakbu ala-ashale changkya pangwüi hwome nuazingle kox angkya.

³⁰ Hebron susa hwom khama, Hashabiah hia chix ma chix mixbu hwom 1700 khünak, pangwüi zangle wünkya khünakbu, Jordan shuanu zong ma hannopchi Israel nok pangnu thakma, zanglom ma hia ting-nok apün-awangle chang angkya mwot hwom ang kox.

³¹ Jeriah a Hebron susa hwom khama lompa changkya. Dawid wanghompa ang achangkya zanglao 40 to, Hebron susa hwom ozu-ojen tole ano, ikoxle ija homjen angkya naomüibu Gilid haxtok angkya Jazar ma ngole tüikyabu atak.

³² Jeriah haxnu homsa kha angkya wanghompa Dawid-e 2700 khünak, ataxkya lompabu zünle kop, ilaxle hwom a Jordan shuanu handünchi kao ma tüikya Israel nok to hu ang pao. Ija kha a Reuben, Gad hia Handünchi Manasseh hwom haxtok wankam ma tüikya.