1 PUKAX-PANGAO 13 - OTSAO BAIBEL (BSI)

Tsaotsüt Suak a Kiriath Jearim tokya Apüi

¹ 100 pong hia 1000 pong ma athomkya thom kha angkya okax-okho pangwüi füi Dawid-e azutle zangwün.

² Ifüima chixe Israel khünaknu noknu hato ngaile thüi: “Hünzome müiüile jangthüi: ilaxle ija a Jowanpa mongtex jangchang, keme kem chaxwan angkya khünaknu pangwüi hato ilaxle zompu-zangpabu hia Liwi hwom hato, tingnubu pangnu khato wüi, hwom pangwüi ikhato kem füi tomle asox angkya kaxho apuk-hax.

³ Ifüima keme pao üntoxle Tsaotsüt Suak apüihax. Ija a wanghom ang Sol ngopongma ahaile awüt thomkya changle.”

⁴ Ija zangwün atatlaxle khünaknu ang tüle mongmüi üntoxle müiüile noknu notom.

⁵ Ikhoma Dawid-e Israel khünaknu pangting-jahax tokya sele asox. Shuathongchi ma Ijip nok longzipong makhange shuakuxchi Hamath Lomnu alople tüikya khünaknu, Kiriath Jearim ma tüikya Tsaotsüt Suak Jerusalem to apüi ang asox.

⁶ Dawid üntoxle khünaknu Balah tingnu (Kiriath Jearim), tingnu oja Judah haxtok ma tüipuix, ikhato Jowanpa Tsaotsüt Suak lax ang ngui. Ija Suak ma ozang füikya zünmok khangkho ma thungle Jowanpa womle tüikya münwan tüikya.

⁷ Hwome ija Suak Abinadab hom ma apüi ilaxle maihue linkya zyen hozün ma ija sho. Ija müilin zyen a Uzzah hia Ahio nyie aham.

⁸ Ipongma Dawid hia chix khünaknu pangwüi, ma zongbakbak ma Zang achuakle azüi. Hwome tsai ngao, thuaput waxmaibu müt, sam hia khopsyabu thule, nyazongbu müt.

⁹ Hwome Kidron angkya tsaxnak nui alople tüipongma, maihupong tuita long ma chikho thule lax. Uzzah-e chix chak thui laxle ija Suak to künle kop.

¹⁰ Ifüi tomle Jowanpa ang Uzzah füi mongtsik ilaxle ija Suak to twonkya khoma chix mik amüt. Chix a Zang tunthoma ikhama zile pao,

¹¹ ikhoma imakhange ikha ang Perez Uzzah le nyak. Chix mongtsik füi Jowanpae Uzzah to sikangünle changkya khoma Dawid ang mong huanuma ma.

¹² Ifüima Dawid a Zang thua tüle za ilaxle thüi: “Athax kue ija Suak ku füi tomle chemle apüi thoüi?”

¹³ Ikhoma Dawid-e ija chix füito Jerusalem to chiapüi tho. Chixe ija Suak a Obed Edom le amünkya Gath tingnu angkya mixsün hom ma danle tox.

¹⁴ Ija Suak a ikhama lyetjang azom thom. Obed Edom homkha hia chix tuina pangwüi to Jowanpae huanuma mohiman.