1 PUKAX-PANGAO 12 - OTSAO BAIBEL (BSI)

Benjamin Homjen angkya Owang pongma Dawid füito Azuikyabu

¹ Dawid a Sol thoto Ziklag to paole azangle tüikya. Ikhato, chix füito olüi awandaokya süpahibu mongongsakyabu chix füito hak.

² Ibu a Sol füikya Benjamin homjen angkya khünakbu changkya. Hwome sanhap hap ang tho ilaxle nong-nong-tsaxle zu ma long awün laxle thup ang awankyabu.

^3-7 Hwom a Gibeah angkya Shemah sasün Ahiezar ilaxle Joash nyie azui laxle tüikya. Ibibi a süpahibu changkya: Azmaweth sasün Jeziel hia Pelet nyi, Anathoth angkya Berakah hia Jehu nyi Gibeon angkya Ishmaiah, chix a fuale wünkya süpahi tuita ilaxle “Hwom 30” hwom khama lompa tuita Gederah angkya Jeremia, Jahaziel, Johannan, hia Jozabad hwom Harif angkya Eluzai, Jerimoth, Bealiah, Shemariah, hia Shefatiah hwom Korah saxthom angkya Elkanah, Isshiah, Azarel, Joezar, hia Jashobeam hwom Gedor angkya Jeroham sasün Joelah hia Zebadiah nyi

Gad homjen angkya Dawid füito Azuikyabu

⁸ Ibibi a, Dawid sak-hax to ngopongma, chix süpahi othom khato hakle hüikya, Gad homjen angkya fuale wünkya hia zanhok olüi awan daokya süpahibu changpu. Hwom a di hia pax füi azan ang mankyabu changkya. Sünngün to hwom a mailangbu lailaile ilaxle haxfa to ngokya müijaxbu ningle ozik tsuakle tüikya.

^9-13 Hwom chifün a ibibile shong-shongfaile tüikya: Ezar, Obadiah, Eliab, Mishmannah, Jeremia, Attai, Eliel, Johanan, Elzabad, Jeremia, ilaxle Makbannai hwom bibi.

¹⁴ Hwom khama Gad homjen angkya züizüi sihozang alixachongbu a 1000 pong thakma lompabu changkya, ilaxle züizüi sihozün alixachongbu a 100 thakma lompabu changkya.

¹⁵ Zangpua owang lükya lyetjang ma, ija a Jordan shuanu tichong-mualyemle changkya tu hwome shuanu ta ilaxle shuanu zongma handün hia hannop, pangnyichi ma ngole tüikya khünakbu chiakle sam ang tom.

Benjamin hia Judah tokhange Azuikyabu

¹⁶ Hanpak tuita ma Dawid-e ziakople thomkya sak-hax to Benjamin hia Judah homjen tokya khünakbu othom tuita nguile hüi.

¹⁷ Dawid a hwom füi apong ang zik ilaxle thüi: “Hünzom ku to fong ang zuikhui ningle nguikya jangchang, hünzom a mongmüimüile pongle koppu, kwom khato hak-hüi! Ikoxlechu hünzom mong ma zanpabu chak to ku khohang angkya tsingtsang tüile jangchang thüiningle, kue hünzom to chem oma chithüikoxlechu, kem pupa hwom Zang-e ija awanle laxüi ilaxle chixe hünzom to sikangünle changüi.”

¹⁸ Hwom kha angkya mixsün tuita, Amasai, owa ofüima “Hwom 30” thakma lompa ang achangpuix, chix to Zang Chasae twon ilaxle chix akhong, “Jesse sasün Dawid, kwom a nang hanpak changpu! Nang tamchu nang to asun-azule changkyabu ang tho-lünkya naxtüi! Zang a nangchi ma tüile.” Dawid-e hwom pongle kop ilaxle chix süpahibu khama alixachongbu ang achang.

Manasseh Angkya Azuile Hüikyabu

¹⁹ Wanghompa Sol füi azan ang Dawid, Filistia nok füi tomlaxle zan to kale ngopongma, Manasseh homjen angkya süpahibu züizüi Dawid hato ngui. Dawid-e Filistia nok to fongpu tomtatale a chichang, chemthüikoxle chixe hwom, amikya chix hopunu Sol chak to khohangle koxüi, le Filistia nok wanghompa za ilaxle chix a Ziklag towüi chat ang tom.

²⁰ Ile chix zankat chatle tüipongma, Manasseh homjen angkya ibibi süpahibu Dawid khato hak: Adnah, Jozabad, Jediael, Mikail, Jozabad, Elihu, ilaxle Zillethai hwom bibi. Hwom pangwüi Manasseh ma 1000 pong athomkya süpahi othom tuipong ma lompabu ang achang.

²¹ Hwome, chixe süpahibu othom khama lompa tuipong ningle Dawid thothale chang,, chemthüikoxle hwom a pangwüi ataxkya süpahibu changkya. Ofüima hwom a Israel nok süpahibu khama lompabu ang achang.

²² Nyixfokya to Dawid süpahibu khato mixzün obo chithwon hüile ngo, ilaxle lebama wüi Dawid süpahibu a huanu ang achang.

Dawid Süpahibu Akiakkya

^23-37 Dawid Hebron to ngopongma, Sol man ma chix wanghom ang achang angkya to asun ang, zankat thüi anole tsuakdaokya süpahibu chix füito huanuma hak, ibu a Jowanpa kaxtom tüikya ningle chang. Hwom khünak huak a ibibile tüikya: Judah: Di hia pax füi akhyep-adi laxle zankat tsuakle changdaokyabu khünak huak 6800 tüikya; Simeon: Zankat tsuakdaokya khünakbu 7,100 tüikya; Liwi: 4,600 khünak; Jehoiada füito azuikya, Arun sixli hwom: 3,700 khünak; Zadok, azan naomüi hwom: 22 lompabu; Benjamin (Sol homjen angkya): 3, 000 khünaknu (Benjamin khünakbu süchong tukux a Sol füito ngo); Efraim: 20,800 khünak, hwom saxthom hwom khama ataxkyabu; Hannop Manasseh: 18, 000 khünaknu paolaxle Dawid wanghompa ang achang ang zünle kopkyabu; Isakar: 200 lompabu, hwome azui laxle tüikya khünakbu füi (lompa ibue Israel noke chem moküihex tamchu ija chemtue moküihex müile awan ngo); Zebulun: 50, 000 khünaknu, chang-pax pangwüi twon ang awankyabu, mongong füi azan ang achwonle tüikyabu; Neptali: 1, 000 lompabu, hwom füi tomle di hia pax füi akhyep-adi laxle tüikya 37, 000 khünaknu; Dan: 28,600 khünak zankat mandaokyabu; Ashar: 40, 000 khünaknu azan ang achwon laxle ngokyabu; Jordan zongma handünchi angkya homjenbu—Reuben, Gad, hia Handün Manasseh: 120, 000 khünaknu chang-pax pangwüi twon ang ano daokyabu.

³⁸ Azan ang achwonle tüikya süpahi ibu a Hebron to pao ilaxle Israel nok pangnu thakma Dawid a wanghom ang zing angkya zangwün tsuak. Israel nok mamabu chu pangwüi ija katzua hanpakma mongno tuita ma tom.

³⁹ Ikhato Dawid füi tomle hwom a nyix azom nuile tox. Ipongma hwome tingkhua khünakbue hwom hanpak ang achwonkya sütlingbu saxlaxle pangpwonle nui.

⁴⁰ Shuakux-tsim to tüikya Isakar, Zebulun, hia Neptali homjenbu tokya khünakbu, mantsak, ut, mansa ilaxle maihupong, ibu-—ankhix, fupsa ziak, fupsa zan, grepti-ju, ilaxle olip münga, sütli-lingli ibue awangle hünzing laxle ngui Hwome maihu hia chunbu chuwüi langle huak sax ang apüi. Ibibi a hwom chaxwan noknu mongzom müikya pwonla ahokya changkya.