1 PUKAX-PANGAO 10 - OTSAO BAIBEL (BSI)Wanghompa Sol Zikya ( 1 Sa 31.1-13 ) 1 Gilbua Haxnu ma Filistia nok Israel nok füi azan. Ikhama Israel khünakbu huanuma lang, ilaxle mamabu, wanghompa Sol hia chix sasün hwom chuwüi womle paole azang. 2 Ikoxlechu Filistia nokbue achuale ziklaxle hwom kop, ilaxle Sol sasün Jonathan, Abinadab üntoxle Malkishua hwom bibi lang. 3 Sol akhople azankya tüle khamkhitle changkya khoma, ilaxle chix to sanhap füi sütlaxle chisumüile maklax. 4 Chix chang-pax kopmix ang tüikya naosün ang chixe thüi: “Nang changlo syetkox ilaxle ku lang kox, ile chichang thüiningle Zang chilax homtoxle ngokya Filistia nok ibue ku thajao-wünhaile changüi changa!” Ikoxlechu ija mixsüne ile mok ang khomtsi. Ija ngünlaxle Sol-e chix changlo alüile syetle alai ilaxle chix lualua to hukle zi. 5 Ija naosüne Sol zikya ngünle lax, ikhoma chix chuwüi alüile ma changlo füi hukle zi. 6 Ile Sol hia chix sasün azom, hwom pangwüi tomle mik max, ifüima hwom sixli owaechu apün-awangle chihüi. 7 Chemtue Jezril haxsha ma ngokya Israel khünakbue hwom süpahibu fütle paokya hia Sol tamchu chix sasün hwom mik maxkya zing atatle changpuix, hwom a ma tingnunu dantoxlaxle pao ma süt. Ifüima Filistia nok nguilaxle ibu chaxwan kop. 8 Azankya ofüi nyix wüi Filistia nokbu a Israel nok sax-tuabu ama ang pao, ikhato hwom thoma Sol hia chix sasün hwom mang Gilbua Haxnu ma bang. 9 Hwome Sol khang düt, chix khyep-dibu sukle lax, ilaxle Filistia nok pangkha towüi, hwom chapabu hia khünaknu hato ija kaxho müikya khuapu ang mwottsan mixbu apao. 10 Hwome chix chang-paxbu a, hwom baozang to shwomkya onui tuita ma dan ilaxle chix khang a hwom baozang Dragon to shwomnui ma asha. 11 Chemtue Gilid angkya Jabesh khünakbue, Filistia noke Sol to hwonkya otue atatpuix, 12 mixtsak naomüibu pao ilaxle Sol hia chix sasün hwom mang a Jabesh to apüi. Ikhato hwome mang ibu zak püntong tong ma akhün ilaxle nyix anüt chisax chilingle atsao ngo. 13 Chixe Jowanpa to mongong chithomkya khoma Sol mik max angkya atak. Chixe Jowanpa kaxtombu kax ma chilaxle tüi ilaxle lwompubu ma tsaitik-kaxshole chang. 14 Jowanpa ma tsaitik-kaxshole changhaxkux tsyen to ile tüikya khoma Jowanpae chix mik amüt ilaxle wangting apün angkya a Jesse sasün Dawid chak to kox. |
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Bible Society of India