1 PITAR 5 - OTSAO BAIBEL (BSI)

Zang Chun Zyem

¹ Hünzom füi tomle ku chuwüi tüichong mixmüi tuita ningle; Khrista sikngün bama kaxkhi tamchu ngaiüi tüikya fuazang ma süntswon angkya mix tuita ningle, kue hünzom kha angkya tüichong mixmüibu zongsaipu:

² Atsangle chichang homtoxle mongtsutsu le, Zange hünzom ang koxle tüikya chun zyem nyelax. Omün kop ang chichangle otsing tomtata ma thotha ang mongtsukya füi ma mwot mokkox.

³ Hünzom ang nyehüio le koxle thomkyabu thakma hopunu ang chichang homtoxle hwom tu ma hünzom apyen angkya tuita ang achangkox.

⁴ Üntoxle Akhokya Chunnyetpa nguikya zuma, otuechu bile chima angkya nyankya khohom hünzome ataküi.

⁵ Ilailaile hünzom tsünzün thomchu tüichong-mixmüi hwom fang ma ngohüi. Üntoxle hünzom pangwüie, apu-achangle tata thotha ang puinaikya züpak laxhüi; chemthüikoxle Otsao Lai-e akaxle, “Ngamkya mix to Zange abaxle; puinaikya mix ang chingcha koxle.”

⁶ Idaile thütkhak le hanpak nguile hüikya zuma Zange hünzom asale nwon angkya kuxma, hünzome ma alüile tsakzong füikya Zang fangto puinai le tüilax.

⁷ Hünzom künthang mongdang komle chix ma toxlax, chemthüikoxle chixe hünzom to akox-anyele.

⁸ Khünzai le ngolax, mik hingle ngolax! Hale ngokya mailang ningle bao, hünzom zongto zanpa, owawa joksele lomle khuafao ngole.

⁹ Hünzom mongong ma shingmong lax üntoxle chix abaxlax, chemthüikoxle chaxwannu ma pangkha towüi mama mongong mixbuchu ilailaikya sikngün akaile lekya hünzome awanpu.

¹⁰ Ikoxle noxta hanpakma hünzome sikngün apong füima, pangnu to chingchakya Zang, owae Khrista füikya notom ma oshuk chitüikya chix fuazang mantswon ang hünzom nyakpuix, chixe hünzom okho anguile faüi üntoxle hünzom ang shingmongkya, zong tamchu mongao chitüikya chifün faüi.

¹¹ Apün-adakya othuithuima chix kux wüi naxchang! Amen.

Oshuk Salam

¹² Mongong tüikya khristan tüinao tuita le kue esele tüikya Sila-e fongle, moxmoxsüle ija laiza kue hünzom hato zapu. Kue hünzom ang zong adünse tsupu üntoxle ija a Zang chingcha changtomtale le kue khüzün kaxkhi fase texpu. Ija ma shingmongle ajonglax.

¹³ Babilon ma tüikya hünzom nanao, tamchu Zange zünle kopkya müimüithom tokhange ilaxlechu kusa Mark tokhange hünzom hato salam akatpu.

¹⁴ Khristan mongkün tunpong füi tata ang salam fale tüilax. Khrista ma womle tüikya pangnusa füi mongsom naxtüi.