1 PITAR 4 - OTSAO BAIBEL (BSI)

Lüidaokya Tsün

¹ Khrista-e chemle tsangtsa ma sikngün apong daopuix, ija mongtex tuita füi hünzomchu atha-anyem lax; chemthüikoxle tsangtsa ma sikngün apong daokyabu hanpakma ochax füi chemsüt chem mwot müntüi.

² Athax makhange atale tüikya hünzom chaxwannu tsün khünak küntsu monglua ma chichangle Zang mongtex ma akumathum le ngo angkya changle.

³ Zang chitsingkya khünakbue mokse tsukya saxmok le hünzome hanpak okhonguile awüt hüidaoa, chemthüikoxle hünzome hünzom tsün chitsao chimaokya, maimong nyakya, mik zalokya, jutok-saxngakya, haox-achaikya, sützik üntoxle nushix dongkya, chapabu shwomkya, ibu lom to koxle hüidaoa.

⁴ Üntoxle athax a hwom füi tomle hapkaile shixkya tamchu twopla-twoplüile ngokya khato hünzom chiwomkya ngünlaxle songsaribu abütle, ilaxle hwome hünzom ajao ahaile.

⁵ Ikoxlechu ozün hia omang pangnu kaxfün ang achwonle tüikya Zang ang hwome ma mwot aho angkya changle.

⁶ Hwom angchu wüi tsangtsa ozün ma tüikyabu ningle kaxfünkya tüiangkya ikoxlechu Zang mongtex ningle chasa ma ozün ma ngo ang kop angkya kuxmale, zidaokyabu hatochu wüi Kaxho Müikya apuk apua.

Zang Hingho Müile Twonkyabu

⁷ Pangnu li oshuk hato nguile hüile. Hünzome zangjop ang tho angkya kuxma, malualua to akumathum le tüilax.

⁸ Pangnusa thakma, tata to chizakle mongkün tüilax, chemthüikoxle mongküne tüpong tüpongkya ochaxbu to chwop khom ang thole.

⁹ Zangwün atsatle chingo homle hünzome tata ang ma hom ka daple laxkox.

¹⁰ Pangnusae wüi, malom-malom hinghobu twon ang mankya khünak tuita lailaile, Zang tokhange tamsüile kopkya hingho hünzome tata fün amüi ang twonkox.

¹¹ Hwon-nwot mixbue Zang Kaxho anwot-ano kox; thothakyabu ma ang Zange fakya zong füi thakox, ikoxletix pangnuli to Jisu Khrista makhange Zang achuak achenkya naxtüi, chemthüikoxle fuazang hia tsakzong jento chix kux changle. Amen.

Khristan tuita ningle Sikngünkya

¹² Ku mongkün tüinaohom, hünzom to tüle kakle thwontsing pongma, hünzom füi chiapong homfang apongkya ningle, hünzom taxabüt.

¹³ Itülüi nange Khrista sikngün atom-ahanpu le mongmüilax, ikoxletix chix ngaikya zuma nang mongmüie awangle changüi.

¹⁴ Khrista man tokya khoma hünzom to adix-adale chang pongma hünzom mohiman; chemthüikoxle fuazangkya tamchu Zang chasa hünzom ma tüile.

¹⁵ Hünzom sikngün a, mix mik amütkya, ahux alopkya, mixlang-mixhuakkya, tamchu mixkux mixka amakya ma womkya, ibu khoma apongkya wüi taxchang.

¹⁶ Bachutix, nang khristan changle le apongkya sikngün jangchang, Ija khoma taxazak, itülüi ija mün ma Zang mün fuazang ang tomkox.

¹⁷ Kaxfün owang wang angkya hanpak chwonle hüiüna, üntoxle pongwang ma kaxfün angkya a Zang khunakbu changle. Ija mwot kem makhange owang jangwang thüikoxle Zang chitsingkyabu füi chemle ashuk laxüi hex?

¹⁸ Otsao Lai-e thüile, “Khünak mixmüibu khosün ang tüle thang; jangchangba Zang chitüikya, ochax khünakbu chem ang changüi?”

¹⁹ Idaile opange Jowanpa ma sikngün apong puix, hwome mwotmüi mokkya füi, owae chix kaxtsao otya ma thom, zingpupa Jowanpa, chix to mong bakle koxle ongkox.