Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 KORIN 8 - OTSAO BAIBEL (BSI)


Chapa ang koxkya Süt bama Atwonkya

1 Athax, chapa ang koxkya süt bama hünzome zakya a ile: Changle, kwome wünkya ningle kem pangnu ma wüi je-hwom tüile. Ikoxlechu iningkya je-hwone khünak tuita ongam füi tsaichong-kaxbong ang koxle; ikoxle mongküne zong adünle.

2 Owawae chixe hidaole tsingwanpule jangtex thüiba, chixe chem tsingwanse hex ija chixe ojao matsing ma-awan.

3 Ikoxle owawae Zang to mongkün jangtüi, Zange chix awanle.

4 Idaile chapa ang koxkya süt saxkya bama; keme awanpu chapa ma ozün müntüi; ikoxle keme awankya a, Zang a tuita wüi.

5 Chemthüikoxle ding hia hax ma khünake “Zang”, le nyakkyabu tüihu koxlax ilaxle ibu zangbu hia baozangbu tüihu koxlechu

6 kem hanpakma Zang, chix a Hopa, owae zünmok zingle alaipuix, ilaxle owa hanpakma kem ozün ma ngolaxpuix, chix tuita wüi; üntoxle zünmok zingkya mix owa makhange kem ozün ma ngopuix, ija Jisu Khrista Jowanpa chix tata wüi.

7 Ikoxlechu ija noke awankya münchang. Züizüie ami chapa shwomle ngokya asyen laxle iningkya süt saxkya zuma, ija chapa ang koxkya süt changtomtapu le hwome thütle; ile hwom khangka ma chisukya hia sukya süi ang chitho laxle, ija süt makhange hwom chitsaokya ang achangdaoale hwome thütle.

8 Süt makhange kem Zang füi wonkya ofün sümüiüi le münchang; chisaxba kem fün sümaüi, ilaxle saxkoxle kem fün sümüiüi le münchang.

9 Nang woktex ma moktsuak ang pankya zong twonkyae mongong ma zong aluile chitüikyabu ochax to chiadüt angkya kuxma likhünlax.

10 Thütba khangka ma jekho manguikyabu thüntho ma nang jetüi hwonlang daokya mix tuita, chapa shwomkya tsap ma thungle jangngün thüiba; ijae hwom ang chapa ang koxkya fong saxkoxchu chem münchangle zong adünkya tuita ang münachangüi hia?

11 Nang ma jetüi hwonlangkya makhange, mongong ma zong matüikya nang zongto khristan tüinao tuita, khrista owa hanpakmachu wüi zilaxpuix, chix amaüi.

12 Ile Khrista ma nang zongma tüinaohom, mongong ma zong matüikya, ibu khangka thomzün ang tomkya a Khrista zongto nang mixe ochax lyenkya ang achangüi.

13 Ikoxle, ku tüinao tuita adüt angkya süt ma tüikya jangchang thüikoxle, ile ku tüinao tuita adüt ang chikox angkya hanpakma, kue müi otuechu münsax.

Wancho Naga Bible - OTSAO BAIBEL

Copyright © 2012 by The Bible Society of India

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ