1 KORIN 7 - OTSAO BAIBEL (BSI)

Aju-asomkya bama Atwonkya

¹ Athax, nange zakya zangwün bama ile: Khünak tuitae sheko to ojao chitwonkya wüi sümüi.

² Ikoxlechu chinunchakkaikya huanuma tüikya khoma lüka nok ang wüi ma kakonu tupong tüi angkya olom changle, ilaxle sheko angchu wüi ma kakopa tüi angkya changle.

³ Lükaechu kakopa tuita ningle ma mwot tsuak angkya changle, ilaxle shekoechu kakonu tuita ningle she mwot tsuak angkya changle, ilaxle ile tatae lomkya mongzom amüi angkya changle.

⁴ Kakonu tuita a she tsangtsa bama hopupa münchang, ikoxle she kakopa tix changpu; ija lailaile, kakopa tuitachu chix tsangtsa bama hopunu münchang, ikoxle chix kakonu tix changpu.

⁵ Hünkhie noxta bama zangjop hanpak laxhaxle wünle tsuakle lüwüi chichang thüiba, tata zongto taxakhex; ikoxlechu ifüima chatle wüi kakonu kakopa le notomün. Ile chichang thüiningle ma akumathumkya chitüikya tokhange baoe hünkhi thwontsing to adüt ang tsuak.

⁶ Kue ija kaxtom ningle chichangle dankya tuita ningle akax wüi.

⁷ Tamthüt koxle, hünzom pangnu wüi ku ningle namchangbae le kue texpu. Ikoxlechu ata ang lita ata ang lita le nok-nok ang wüi Zang hingho tüipu.

⁸ Kako matankya hia zomnubu ang ku ningle ngokya wüi amüikya changpu le kue thüipu.

⁹ Ikoxlechu hwome ma akumathum ang chitho thüikoxle, hwome kako tan angkya wüi changle. Chemthüikoxle mongzok le kham ngokya füi kako tanle adangkya wüi amüikya changle.

¹⁰ Kako tandaokyabu hanpakma, ma kaxtom le münchang, ikoxle Zang tokhange hüikya kaxtom kue koxpu: Kakonu tuitae kakopa dantox angkya münchang;

¹¹ ilaxle she-e ile changkoxlechu, she matata ngo angkya chichangle hokakopa füi chatle muamüi angkya changle; ilaxle kakopaechu ma kakonu apao angkya oli münchang.

¹² Kue mamabu pangnu ang thüipu (Jowanpa-e münchang ikoxle kue thüipu): Tüinao owawa ang kakonu songsari cha tüi, ilaxle she chix füi wüi ngose le mongtsukya tüi, jangchangba chixe she apao angkya oli münchang.

¹³ Owawa sheko ang ma kakopa songsari sün tüi, ilaxle chix she füi wüi ngose le mongtsukya tüi, jangchangba she-e chix apao angkya oli münchang.

¹⁴ Chemthüikoxle mongong chitüikya kakopa a khristan kakonu tuita füi notomkya tokhange tsaokya ang achangle, ilaxle chiongkya kakonu a khristan kakopa tuita füi notomkya tokhange Zang pomtho ma sukya ang achangle. Ile chichang thüikoxle hwom naosombu songsari naosombu ningle tüise; ikoxle hwom ile chichang, hwom a Zang pomtho ma pongle kop ang tsuak le tüi.

¹⁵ Ikoxlechu mongong chitüikya shekoe chichangba lükae khristan tsün ma ma kako dantoxse jangtsu, ile chang ang laxkox. Khristan tsün ma ma kako, kakopa wüi changlax chichangba kakonu wüi changlax, ile mok ang abaxkya müntüi. Zange hünzom mongsom ma ngo ang nyakpu.

¹⁶ Kakonu, nange ma kakopa sünle kopüi le chem ma awan? Kakopa, nange ma kakonu sünle kopüi le chem ma awan?

Zange Nang Nyakdaokya ningle Ngolax

¹⁷ Pangnusasa wüi, Zange chix nyakle kop pongma chix chemle tüikya hex, ile Zange chix ang hingho koxkya olom ma ngo angkya changle.

¹⁸ Khwonzüt-Zom zingdaokya khünak tuitae Zange nyakkya pongle jangkopdao thüiba, chixe ija khwonzüt daokya janman amüt ang taxazong ngo; khwonzüt zom mazingkya khünake Zange chix nyakkya pongle jangkopdao thüiba, chixe khwonzüt zom zing angkya olom taxlom ngozi.

¹⁹ Chemthüikoxle khwonzütkya hia chizütkya ma chem müntüi, ikoxle tutsyen a Zang kaxtom kax ma chilaxkya hia laxkya ma tüile.

²⁰ Idaile Zange chix nyak pongma tüikya ningle pangnusasa wüi otya ma ngohüi.

²¹ Zange nyak pongma nang da ang ngokya changdaicha? Chem münchang, mong taxma; ikoxle nang woktex ang achang angkya oshua jangtüi thüiba, taxalyet.

²² Chemthüikoxle Jowanpa ma owa da tuita ningle nyakle koplaxpuix, ija khünak a Jowanpa ma woktex ma ngokya mix changpu. Ilailaile Zange chix nyakle kop pongma woktex ma asukya mix a Khrista da tuita changle.

²³ Hünzom a otha koxlaxle shakdaokya changle; khünak dahai ang taxachang!

²⁴ Idaile tüinaohom, owa chem chifün ma nyaklaxpuix, chix Zang füi ija chifün ma ngo ang laxkox.

Kako matankya hia Zomnubu bama Atwonkya

²⁵ Athax, hünzome zakya kako matankyabu zangwün bama: Jowanpa chitokya kaxtom kuma müntüi, ikoxle Jowanpa chingcha ma mongong tangkya khünak tuita ningle kue ku mongtex fapu.

²⁶ Anyix ngainyixkya tingtui to hulaxle, kue texkya a: Khünak tuita chix chemle tüilaxpuix ile ngokox wüi sümüi.

²⁷ Nang ang kakonu tüipuix mi? Jangchangba nguapa ningle ngo ang taxazong. Nange kako matan hexnyi? Jangchangba kako taxlom ngo.

²⁸ Ikoxle nange kako jangtan thüiba, nange ochax lyenle le münchang, ilaxle naocha tuitae kako tankoxle she-e ochax lyenle le münchang. Ikoxlechu kako tankyabu ang nyixfokya to mongthang angkya tüiüi, ilaxle ile chang angkya chak tokya kue nang abaxse texpu.

²⁹ Tüinaohom, kue akaxkya a ija changle: Hanpak aluile müntüi, ilaxle athax makhange kako tandaokyabu hwome kako matankya ningle ngo angkya changle;

³⁰ mangsopkyabu mongma chitüikya ningle ngo angkya changle; nyikyabu, hwom ang pwonla chidongkya ningle ngo angkya changle; shaksünkyabue hwom kux chemchu chitüikya ningle ngo angkya changle;

³¹ ilaxle chaxwannu mwot-kat bama saxmok le ngokyabu, ibu füi chemsüt chem mwot chitüikya ningle ngo angkya changle. Chemthüikoxle athax ile tüikya chaxwannu a, aluile otsün lole chingoüi.

³² Kue hünzom a mongsik ngünkyabu chemchu chitüile namngobae le texle. Kako matankya khünak tuitae Jowanpa mwottho to khünkhile tüiüi, chemthüikoxle chixe Jowanpa mwot mok ang azong ngokya tokhange ile changüi.

³³ Ikoxle kako tandaokya khünake chaxwannu mwot to mongkoxüi, chemthüikoxle chix mong ma chix kakonu mong amüi angkya tutex tüikoxle;

³⁴ ilaxle chix to olom anyie abeüi. Ikoxle tsangtsa hia chasa ma Jowanpa mwottho hanpakma she atsaole thomse tsukoxle kako matankya mixcha chichangba naocha tuitae hokakopa mong amüi angkya okhoma hukle texkya khoma, she-e chaxwannu mwotkat to mongkoxüi.

³⁵ Kue hünzom to chemle fongfahax le texlaxle kue ija akaxpu. Kue hünzom abax ang azongkya münchang, itülüi okhex-oküi chemchu chitüi homle hünzom ma mwottho to dan angkya hia changkya hia sukya olom ma naxmok le texpu.

³⁶ Ikoxle naosün tuita owawae ma naocha tuita to süchichangle hwondaoa le jangtex ilaxle she ma chichangba chix ma huanuma mongzokkya jangtüi thüiba ilaxle ile changüi jao, chix chichangba she mongtsukya ningle mok ang laxkox. Okhi tuizing-nazex daokya nyi aju-asom ang laxkox: Ija ma ochax müntüi.

³⁷ Ikoxle owawa mongto atsangkya chitüi, ikoxlechu ma mongzokkya alüile akumathum ang owae tsuakpuix, ilaxle she jao angkya ningle kako chitan homle wüi naxngokox le chix mongto mongzangwünle owae tsuaklaxpuix, chixe müikya mokpu.

³⁸ Ilaxle chix naocha ija laxkya mixe müikya mokpu; üntoxle kako tankya füi atsaile ngo tsuakkya mixe ifüi sümüikya mokpu.

³⁹ Kakonu tuita, ma kakopa ozün ma tüitanto mix ma ating anok angkya olom müntüi. Hokakopa zikoxle, she-e akün-alualua ma ating anokle chang ang thoüi, bachutix ijachu khristan tuiju nasom olom ma tix wüi chang angkya oli changle.

⁴⁰ Ikoxlechu ku tutex ma she a ating anokle chichangkya wüi sümüi. Ija a ku mongtex, ilaxle kue thütpu, ku machu Zang Chasa tüile.