1 KORIN 6 - OTSAO BAIBEL (BSI)

Ma üitho Khristan Zongto Sukya Wanlom

¹ Hünzom kha angkya khünak tuitae tüinao owawa füi tsailai-kaxlai koxle, otsao khünakbu hato chichangle, ija bama zangwün azut angkya tsaikax otsao chichangkya songsaribu hato pao angkya chix ang chem mongong angkya tüi?

² Otsao khünakbue chaxwannu kaxfün angkya changle le hünzome münawan hia? Ile hünzome chaxwannu kaxfün angkya jangchang thüiningle, amuaküsa iningkya zangwün azut ang hünzome münthoüihi?

³ Ija tsün sütmwot bama tomning wünngo angkya fang jao münchang, keme kaxtaimixbu ang to apüile kaxfün fa angkya hünzome münawan hia?

⁴ Ilaxle iningkya zangwün hünzom khama janglai thüikoxle, müimüithom ma mün ngax chitüikyabu ang wün ang koxüi hia?

⁵ Kue ija hünzom zak akople akaxpu. Hünzome tüinao tata bama zangwün azutle fatang je-hwon füikya mix hünzom khama owangaxchu müntüi changa nyi?

⁶ Itülüi, khristan tuitae ata khristan füi apüile zangwün khwa to pao ang ilaxle chiongkyabu ang ija zangwün fün ang kox.

⁷ Olom ma wün angkya hanpakmale hünzome tata füikya tsaikax, kaxfün ang khwa to paokya makhange, hünzome khristan ningle chimokkya ahole. Ile changtülüi nang zongto naxthai koxa le dankya wüi münmüifa hichem? Nang ma atüitüi tütalichu naxlaxkox a le ngokya wüi nang hanpakma münmüifa hichem?

⁸ Ikoxle hünzom jaojaoe tata zongto achax ilaxle tata angkya pa-lole lax, thüikoxle tüita naota angkya to apüile palo le lax.

⁹ Otsao chichangkyabue Zang Wangting mantswon münkopüi le hünzome münawan hia? Nang taxthaikop ünlax; chinunchakkai, chapa shwomkya, chakzong-kwonte, jonglyen,

¹⁰ chichangba ahuxkya, osing nüfux, jutok saxngat, adix-ada, pa-lokya, iningkyabu owaechu Zang Wangting mantswon ang münkopüi.

¹¹ Hünzom züizüi ile tüikya. Ikoxle ochax tokya hünzom sodaoa; hünzom a Zang hanpakma atsaodaoa; Jisu Khrista hia kem Zang Chasa makhange hünzom a Zang füi mua amüidaoa.

Hünzom tsangtsabu Zang Fuazang hanpakma Twonlax

¹² Owawae thüiüi: “Kue tüta ningkyachu mok ang tsuaküile dankya tüile.” Changle, ikoxle nang hanpakma pangnu li omüimüi wüile münchang. Ku angchu pangnu li moktsuak angkya danle tüile le kue thüi ang tsuaküi, ikoxle kue tütali angchu ku ija da ang achang ang münfaüi.

¹³ Owawae ile thüiüi: “Süt a wok hanpakma, ilaxle wok a süt hanpakmale changpu.” Changle, ikoxle Zange pangnyi wüi oli thudaoüi. Tsangtsa a chinunchakkai angkya lom to twon ang chikox angkya changle, ikoxlechu Jowanpa thothakya mwot to twonüi; ilaxle Jowanpa-e tsangtsa ang pangnu li koxüi.

¹⁴ Zange Jowanpa Jisu zidaokya chatle azwot, ilaxle ku chuwüi chixe chix tsakzong makhange chatle azwotüi.

¹⁵ Khrista tsangtsa ma nang tsangtsachu olom tuita changpu le nange münawan hia? Ikoxle Khrista tsangtsa angkya olom tuita laxlaxle kue Ija tsahang tsangtsa ma olom tuita ang achangüi hia? Ile otuechu münchang!

¹⁶ Tsahangcha füi asüikya mix, ija mixcha füi tsangtsa tuita ang achangkya nange münawan hia? Chemthüikoxle ija zale tüile: “Okhi anyi a müitom tuita ang achangüi.”

¹⁷ Ikoxle Jowanpa füi notomkya mix chasa ma chix füi tuita ang achangpu.

¹⁸ Chinunchakkai füi atsaiün. Khünake achaxkya ochax mama tütaliechu tsangtsa to münpo; ikoxle khünak owae chinunchakkai ma thailaxüihex, chixe ma tsangtsa zongto achaxkya changpu.

¹⁹ Nange tsangtsa a, nange Zang tokhange kopkya, nang mong ma tüikya Otsao Chasa zangshwom-hom changpu le nange münawan hexnyi? Nang a nang kux münchang;

²⁰ chixe nang a otha koxlaxle shakdaoa. Idaile nang tsangtsa nange Zang fuazang angkya olom ma twonlax.