1 KORIN 5 - OTSAO BAIBEL (BSI)

Müimüithom ma Chinunchakkai

¹ Wünhax thüikoxle, songsari tu ma ngaxchu ile münmok lükya hünzom khama chinunchakkai mwot chisumüi lewüi tüileta. Hünzom khama ma honuchong füi jip-pomkya ku hama wünle.

² Hünzom ang mong mazya! Ikoxle hünzom ngam ang mix süt ang hi? Iningkya mwot owae mokdao laxpuix chix hünzom kha angkya atsaidao.

³ Chemthüikoxle tsangtsa ma ku hünzom füi chitüi koxlechu ku womle tüikya bütukux, iningle chisumüikya mokdaokya mix hanpakma Jowanpa Jisu mün ma kue kaxfün ngaidaoa.

⁴ Otue hünzom asoxüihex, ku chasa ma ikhama womle tüile; Jowanpa Jisu Khrista tsakzong kem khama hakle tüikya makhange,

⁵ hünzome ija mixsün, chix tsangtsa ama angkya hanpakma bao ang koxdao, ile changkoxle tix Jowanpa Jisu Khrista zanghan dong Nyix chixe chasa khosün ataküi.

⁶ Hünzom ngam angkya jao münchang! Twonkhax ikuxküsae wüi nalao abakle ju ang achang tsuakkya hünzome matsing hia?

⁷ Hünzom tsaotha le, ojao twonkhax chiawonkya nalao ningle chang angkya kuxma twonkhax-nütong ningle ngokya kaikya ochax awütdao, hünzom ilejao changkya changpu kue awanle. Chemthüikoxle akaile lekya kem pangpua Chun Hosa a Khrista, chix tökya ma koxdaoa.

⁸ Idaile chichang-chizangkya hia ochax füikya ozang twonkhax chiawon angkya, tsaothakya hia otsingtsing an tsaotsao füi keme pangpwon saxhax.

⁹ Kue hünzom hato ku laiza ma chinunchakkaile ngokyabu füi wonle chingo angkya zadaopu;

¹⁰ ile thüikoxle kue songsaribu, opang chinunchakkaile tüipuix, chichangba ahux-alople tüipuix, chichangba osing nüfux füi tüipuix, chichangba opange chapabu to shwom-to puix, ibu pangnu ang thüikya münchang. Hwom füi atsai angkya jangchang thüiningle nang chaxwannu angkya atsai koxtix wüi chichangba.

¹¹ Ikoxle kue akaxkya kax a ija changle: Owawae tüi-hi-nao changpu le thüilaxle chinunchakkai, osing nüfux, chapa shwomkya, chakmok janlang, jutok saxngat, ohux-otse, iningkyabu füi awonle ngokyabu ang thüiwüi. Hwom füi tomle thung laxle saxlingle jao taxchang.

¹² Songsaribu bama kaxfün angkya ku ma chem mwot tüi? Hwom hanpak kaxfün Zange tix falaxüi. Ikoxle ma othom kha angkya bama kaxfün angkya a nang mwot münchang hichem?

¹³ Otsao Lai ma akaxkya ningle: “Chitsaokya khünak hünzom othom kha angkya apaodao.”