1 KORIN 4 - OTSAO BAIBEL (BSI)

Khrista Wangshembu

¹ Zang huxsa otsao to hume ang kamkya Khrista dabu changpu le hünzome kwom bama ajang angkya changle.

² Iningkya da tuita hanpakma lax angkya oli tuita a: chix a ana angkya chitüi le nuitsuak angkya mix chang angkya oli.

³ Hünzome wüi changlax chichangba khünaknu khwa tuita ma wüi changlax, ku bama kaxfün angkya ku zongto chemchu münchang. Kue alüile ngaxchu ku hanpakma kue kax münfün.

⁴ Ku khangka tsaotha le tüile, ikoxlechu ijae ku sukya mix changpu le ahoüi münchang. Ku bama kaxfün angkya a Jowanpa changle.

⁵ Idaile asukhakle otu nguile mahüi tanto hünzome owa angchu kaxfün taxfa. Jowanpa mangui tanto oshuk kaxfün bama tanngo angkya changle. Chixe zangnak khato pyenle thomkya jali zangngai to alaiüi ilaxle khünak mong angkya huxsa mongjang otok to angaiüi. Üntoxle mae kopsese münchong Zang tokhange pangnusae wüi kopüi.

⁶ Tüinaohom, hünzome khünak tuita chima selaxle mongngam ikoxle ata khünak a ema jao chilaxle ahaile chichang angkya, tamchu lai ma zale wanlom tandaokya ozya kaile chichang angkya bama hünzome awanle kop angkya kuxmale, Apolo kukhi ma apyen laxle ibibi kax zale fadaoa.

⁷ Hünzom owae süichappu? Nang ma atüitüi pangwüi Zange fakya münchang hichem? Jangchangba nangma tüikya hingho pangnu hingho chichangkya tukux nang ma tsaichong-kaxbong angkya chemtüi?

⁸ Hünzom awang tsuakdaoa! Hünzom hakpa luapa ang achang tsuaküna! Kwom chilax homtoxle hünzom wanghombu ang achang ang tsuaküna! Changle, hünzom füi tomle kwomchu wanghom ang achang angkya kuxma, otsing tomtata ma hünzom wanghombu ang namachangbae le kue thütle.

⁹ Khünak hia kaxtaimix, zangfang nok miksho ma mütkop daokya mix noknu hato ahokya ningle, Zange kwom wangshembu chifün oshuk oza to zingkya changüi le kue texle.

¹⁰ Khrista kuxma kwom ongatbu, ikoxle hünzom a Khrista ma jetüi hwonlangkyabu. Kwom a shonaile ikoxle hünzom a tsakzongle. Kwom a wünhaile ikoxle hünzom a achuak achenle!

¹¹ Ipongkhae kwom woknuak tilan ma ngole; kwome nyiza okyet-oshakbu laxle, kwom to fitmüi le, kwom ata jong tokya ata jongto le samle ahamle;

¹² Kwome ma chak füi azongle mokmole. Kwom to thuakzom pongma, kwome mohimanle; otue kwom to zothupuix kwome adule;

¹³ otue kwom to adix-adapuix, kwome kaxmüi makhange lanle. Athax kwom a ija chaxwannu thuakthuak nui tamchu awüt daokya jali oma-oshix boma mama chem angchu münchang!

¹⁴ Kue ija hünzom ang zak akople zakya münchang, ikoxle Khrista ma kue mongkünkya kusa hwom ningle hünzom ang adangle kox angle zawüi.

¹⁵ Khrista ma hünzom lompabu tüihu koxlax, ikoxlechu hünzom ang hopa obiobi müntüi. Chemthüikoxle Kaxho Müikya tokhange Khrista ma ku hünzom hopa ang achangüna.

¹⁶ Kue hünzom ang shingmongle akaxpu, kue hünzom hato ahokya ningle ku man tokyabu ang achanghüi.

¹⁷ Ikhoma, kue pangkha towüi, pangnu müimüithom to anwot-anokya ningle, Khrista ma ku tsün khüzün ngole hüikya olombu hünzome mongto texle atakle lax ang kox angkya bama, Jowanpa ma kue mongkünkya hia mongongkya kusa Timothi kue hünzom hato tomle akatpu.

¹⁸ Hünzom hato ku tamchatle chinguiüi tukuxle hünzom khama züizüi ongam to tüile.

¹⁹ Ikoxle Jowanpa mongtex jangchangba, ku hünzom wai ang achwonle wüi nguiüi, ilaxle ija ongam khünakbu zangwün tsakzong bama ku huake awanle laxüi.

²⁰ Chemthüikoxle Zang Wangting a zangwün ma tüikya münchang ikoxle mwot ma tüipu.

²¹ Ku hünzom hato sansüi füi nguiüi hia, chichangba chasa mongkün füi jonai ma nguiüi? Hünzom zongma opupu suüi?