1 KORIN 14 - OTSAO BAIBEL (BSI)

Tamchatlechu Otsao Chasa Hingho bama

¹ Athax, achuale hünzom zik angkya a, mongkün ha alop angkya hanpakma changle. Chasa ma hingho, tamnüilechu Zang kax apuk-apua angkya hingho kop angkya to nang mong ma mongzaokya tüilax.

² Chitsingkya kax ma akaxkya mixe mix füi akaxkya chichangle Zang füi akaxpu, chemthüikoxle chix zanwün owaechu müntsing. Pyenle thomkya bama chixe Chasa zong makhange otsingtsing zangwünpu.

³ Ikoxle Zang kax a apuk-apuakya mixe, hwom to fong ang, tamchu hwom zong adün ang, khünaknu füi akaxpu.

⁴ Chitsingkya kax ma zangwünkya mixe alüile ma fün amüi wüi, ikoxle Zang kax apuk-apuakya mixe müimüithom fün amüipu.

⁵ Hünzom pangnue wüi chitsingkya kax ma akaxkyachu changle, ikoxlechu ito nüile hünzome Zang kax apuk-apua angkya hingho namkopbae le ku mongto texpu. Müimüithom nok fün amüi angkya kuxma, chitsingkya kax ma akaxkya owawae taile kox angkya mix chitüi thüikoxle, chix füi Zang kax apuk-apuakya mix wüi tüichongpa.

⁶ Kue, ma hato ngaile ahokya chichangba je-hwon chichangba Zang kaxho chichangba anwot anole adang fakya chiapüi homle hünzom hato kue chitsingkya kax ma akaxle nguikoxle kue hünzom ang lap chem fase.

⁷ Ilailaile khüzün chitüikya thuaput chichangba waxmai laxhu, Ija onox tole chiangao thüikoxle, angaokya dingdün owae awanle laxüi?

⁸ Khom thut mixe onox tole chithu thüikoxle, zan to ka ang owa atha anyemüi?

⁹ Ilailaile, chitsingkya kax makhange nang ang fakya kaxho tsingle laxkya lima chitsao thüikoxle, nange wünkya zangwün a owae tsingle laxüi? Nang zangwün zangwin to amuale maxünüi!

¹⁰ Zangfang ma makax mangaongao le tüihule, ikoxlechu tutsyen chitüi homtoxle tuitachu müntüi.

¹¹ Ikoxlechu kax tsing ang chitsuak thüikoxle akaxkyapa zongto ku a mixnok changle ilaxle chixchu ku zongto mixnok changle.

¹² Chasa hinghobu kop ang nang ma mongtsukya tüikya daile, pangnu thakma ibu füi müimüithom zing angkya nang azong among angkya changle.

¹³ Idaile chitsingkya kax ma zangwünkya mixe, chix zangwün tai angkya hanpakma zangjop angkya changle.

¹⁴ Chemthüikoxle kue chitsingkya kax ma zangjople jangchang thüikoxle, ku tutex ikhama münhak münwom.

¹⁵ Jangchangba kue chem moküi? Changle, kue chasa füi zangjopüi, ikoxle kue tutex füi zangjop angkyachu changpu; changle, kue chasa füi tsai ngaoüi, ikoxle kue tutex füi tsai ngao angkyachu changpu.

¹⁶ Nange chasa tata ma Zang achuak koxle, tusox ma hakle asukya, hingho chitüikya zangjang khünak tuitae, nange Zang achuakkya to “Amen”, le chemle lanmanüi? Nang kaxzex tsingle lax angkya chix ma olom jao chitüi.

¹⁷ Changle, nange haxmüi zangmale Zang achuak ang tsuak, ikoxle mama mix fün amüi angkya ojao müntüi.

¹⁸ Hünzom pangnu to nüile kue chitsingkya kax ma zangwün ang kopkya khoma kue Zang ang münchong fapu.

¹⁹ Ikoxlechu zangshwom-hom ma mix ang anwot anole fa angkya hanpakma, chitsingkya kax ma kaxkhap hajat akaxkya füi, ku tutex makhange kaxkhap aga wüi akaxüi.

²⁰ Tüinaohom, hünzom mongjang ma naosom ningle taxchang; ochax lom ma naosom angchu achanglax, ikoxlechu tutex ma mixmüi ang achanglax.

²¹ Otsao Lai ma zakya tüile, “Khünaknue chitsingkya kax ma, zangwün tokhange Kue, ku khünakbu füi akaxüi, le Jowanpa-e thüi. Kue mixnokbu tun makhange zangwünüi, Ikoxlechu ku khünaknue ku kax to münapa.”

²² Ile chitsingkya kax ma zangwünkya a mixnokbu hato münwan, ikoxle Zang kaxho apuk-apua angkya a ongkyabu hanpakma münwan changle.

²³ Mongong füikya khünak pangnu asox üntoxle noke chitsingkya kax ma zangwün, ipongma songsari khünak chichangba mongong ma zong matüikya owawa nguile hüi, chixe hünzom ang ongatbu changle le münthüi lea?

²⁴ Ikoxle Zang kaxho pangnu apuk-apua, ipongma songsari khünak chichangba mongong ma zong chitüikya mix nguile hüi, chixe atatkya makhange chix a ochax khünak tuita changle le awan ang kop. Chixe atat daokyabu makhange chix ang kaxfün faüi,

²⁵ chix huxsa mongjang ko to angaiüi, ilaxle “Otsing tomtata ma hünzom khama ikhama Zang tüile”, le angaile chix akhuxlaxle Zang to shwomüi.

Müimüithom ma Thutle Mok angkya Olom

²⁶ Tüinaohom, ku kax a ija changle: Hünzom Zang shwom ang asoxkya zuma, khünak tuita tsai lom ma dan, ata mix a hwon-nwot jaono angkya lom ma dan, ata mix a Zange angaile ahokya ngün angkya olom ma dan, ata mix a chitsingkya kax ma kaxho kop angkya lom ma dan ilaxle mama mix a chem akaxpuix ija taile apua angkya olom ma dan. Ibu pangnu wüi müimüithom fün amüile fong angkya hanpakma changkoxle müiüi.

²⁷ Owawae chitsingkya kax ma akax angkya jangtüi thüiba, luipule anyi hia azom tukux wüi changlax, ilaxle tsüilüile akaxkox; üntoxle owawae ija kax taile laxkox.

²⁸ Ikoxle taile fa angkya khünak owawachu chitüi thüiba, hwom pangwüi dang angkya changle ilaxle mafüi alüile tamchu Zang füi zangwünkox.

²⁹ Zang kaxho fakya mixhuak anyi hia azom tukuxe akaxkox, ilaxle mamabue hwome wünkya zangwün azut ajangle changkox.

³⁰ Ikoxle thungle ngokya kha angkya owawae Zang kaxho kople jangchang thüiningle, thoma akaxle ngokya mix zakkox.

³¹ Noke tsingle lax ilaxle pangwüi ang zong adün angkya hanpakma, hünzom pangnusae wüi Zang kaxho tsüilüile akax ang tsuaküi.

³² Zang kaxho apukle akax ngokya mixe ma hingho akumathum ang tho angkya oli changle.

³³ Chemthüikoxle kem tupang pün angkya chichangle tumüi le mongsom tüi angkya Zang mongtex changle. Zang khünaknu müimüithom pangnu khato wüi,

³⁴ tusox ma shekobu dangjajale ngo angkya changle. Hwom ang tu ma zangwün ang chitomüi; Jehudi wanlom ma tüikya ningle, hwom ang lompa hünlix chikoxüi.

³⁵ Hwome awan laxse lükya tütali jangtüi thüiba, hwom khama ma kakopapa ma atüile laxlax, chemthüikoxle müimüithom tusox ma sheko tuitae zangwün angkya a zakkop tuita changle.

³⁶ Chichangba Zang kax nang makhange tix hüipia? Chichangba ija nang tata hato hüipia?

³⁷ Owawae chix Zang kaxho angkya mix chichang thüiba, chix ma Chasa hingho tüile le jangtex thüiba, kue hünzom hato zakya Zang kaxtom changle le chixe lax angkya changle.

³⁸ Ikoxle chixe ija to na chitha jangthüiba, chix tochu na ojao taxtha.

³⁹ Idaile tüinaohom, nang mong a Zang kaxho apuk-apua angkya ma thomlax, ikoxlechu chitsingkya kax ma akaxkya tochu taxabax.

⁴⁰ Tütalichu thutle tamchu olom tole mok angkya changle.