1 KORIN 13 - OTSAO BAIBEL (BSI)

Mongkün

¹ Kue khünak zangwünwün komle ilaxle kaxtaimix zangwün to lünle wün ang thokoxlax, ikoxlechu ku ma mongkün chitüi thüikoxle, kukax kungao a na apale thukya büi hongkya chichangba samthukya thatha ang changüi.

² Ku ma je zong tüikoxlax, ilaxle ku ma pangnu je-hwon tüile ngoünkoxlax ilaxle pyenle thomkya otsingtsing awan ang thokoxlax; onüi angchu haxnu apao tsuak tang ku ma mongong tüikoxlax, ikoxlechu ku ma mongkün chitüi thüikoxle ku chem angchu münchang.

³ Ku ma atüitüi komle kue koxle apao ang tsuak koxlax, üntoxle ku tsangtsa zokle ashun ang koxtsuak koxlax, ikoxlechu ku ma mongkün chitüi thüikoxle ku ang chem lap müntüi.

⁴ Mongkün a mong chingwomkya changle; mongkün a zalokya chichangba tsaichong-kaxbongle tüikya münchang;

⁵ mongkün a aongale naxngün le mokkya chichangba kaxma ma alatkya chichangba ofün müikyakya lomkya, ibu münchang; mongküne thaile mokdaokya mwot mongto akhünle münthom;

⁶ thaikyakya pangnu füi mongkün ang mong münmüi ikoxle chem supuix ija füi tix mongmüile.

⁷ Mongküne otuechu danle müntox; ilaxle mongkün ma tüikya mongong, monghom tamchu adukya thaile nuiüi le münchang.

⁸ Mongkün münashuk tox. Ajekyabu tüihule, ikoxlechu ibu a noxtakya hanpakma; chitsingkya kax ma zangwün angkya hinghobu tüihule, ikoxlechu ibu a zakünüi; je-hwon tüihule ikoxlechu ibu a dantox daoüi.

⁹ Chemthüikoxle kem-je kem hwon a okhonguikya münchang ilaxle keme ajekya a okhonguikya münchang;

¹⁰ ikoxle otue okhonguikya hüiüihex izuma okho chinguikya dantox dao angkya changle.

¹¹ Ku naosa ma tüitanto, ku zangwün, mongtex tamchu thütpankya, ibu pangnu naosa tuita tutex ma tüikya; ikoxle athax ku mixmüi ang achang daoa, kue naosom zanglom ibu dantox daoa.

¹² Athax keme chem ngünpuix, ija a chahu mongto ocha ngünkya ningle changpu; ifüima keme thünkhang asaole ngünüi. Athax kue chem tsingpuix ija a süifi-süitex; ifüima kue tsingle ngokya ningle ibu pangnu komkaile tsingle laxüi.

¹³ Ipongma mongong, monghom ilaxle mongkün ma akiaüi; ilaxle ibu khama akhokya a mongkün changpu.