1 KORIN 1 - OTSAO BAIBEL (BSI)

¹ Khrista wangshem ang Zang mongtex ma nyakle laxkya Pol, ilaxlechu kem tüinao Sosthen makhange:

² Korin ma tüikya Zang müimüithom, opang Zang otsao khünak ang achang ang nyakle koplaxpuix ibu pangnu, Khrista Jisu ma notom tokhange opang chix kux changpuix, Jisu Khrista owa kem Jowanpa chuwüi changpuix, chix shwomkyabu pangnu hato:

³ Zang kem Hopa hia Jowanpa Jisu Khrista-e hünzom ang chingcha hia mongsom fahüi.

Khrista ma Mohiman

⁴ Khrista makhange chixe hünzom ang koxdaokya chingcha khoma kue othuithuima ku Zang ang münchong fapu.

⁵ Chemthüikoxle Khrista ma notomkya tokhange, dingdün zangwün hia hwon-je to lünle, hünzom pangnuli mawüi hakpa luapa ang achangüna.

⁶ Jowanpa Jisu Khrista bama Kaxho Müikya hünzom ma shingmongle tüiüna,

⁷ ile hünzome Jowanpa Jisu Khrista ngaile aho angkya to hule ngokya tukma hünzome mohiman chikople oli tuitachu chitox.

⁸ Kem Jowanpa Jisu Khrista hanpak nguikya nyix hünzom ojao thaikya chitüile chang angkya hanpakma, chixe hünzom oshuk kople shingmongle ngo angkya koxüi.

⁹ Zang owae hünzom, chix Hosa Jisu Khrista füi notom ang nyakpuix, chix to mongong angkya changle.

Müimüithom ma Ahak Ahankya

¹⁰ Kem Jowanpa Jisu Khrista mün ma kue hünzom füi akaxpu, kutüi-kunaohom, hünzom khama ahak ahanle chitüi angkya kuxma, hünzom tuita ma tsaino-kaxno tomlax;

¹¹ chemthüikoxle kutüi-kunaohom, hünzom tata füi atsi-ala le ngokya bama Kloe hwom thom angkya khünak tuita anyie ku hama wündaoa.

¹² Ku kax a ija changle: Hünzom noke wüi malom lom to akaxle. Tutae thüi: “Kue Pol man topu” atae thüi: “Kue Apolo man topu” mama mixe thüi: “Kue Pitar man topu”; chatlechu mama mixe thüi: “Kue Jisu man topu.”

¹³ Khrista ahak ahanle tüipia? Hünzom hanpakma pünsak ma takle Pol langpia? Chichangba hünzom Pol mün ma bapti pia?

¹⁴ Hünzom khama Krispa hia Gaia nyi boma owachu kue baptile koxkya chitüikya khoma kue Zang ang münchong fapu.

¹⁵ Idaile hünzom ku wangshem ang baptikya changpu le owaechu akax ang müntsuak.

¹⁶ (O! Changle kue Stefenas hia chix kakonuchu wüi baptile; iboma kue baptile chichang changdaopuix kue münakhax).

¹⁷ Khrista-e ku baptilaxo le tomle apaokya münchang. Chixe ku Kaxho Müikya apuk ang, üntoxle Khrista pünsak ma zikya chix tsakzong ma khosam angkya müntüile tsingang kox angkya hanpakma, khünak je-hwon chilax homtoxle ija Kaxho apuk apua ang tompu.

Khrista a Zang Tsakzong ilaxle Je-hwon Changpu

¹⁸ Chemthüikoxle maxsam le ngokyabu hanpakma, Khrista pünsak ma zikya kaxho a kaxwa changle; Ikoxle kem khosün daokyabu zongto ija a Zangtsak Zang zong changpu.

¹⁹ Otsao Lai-e ile akaxle, “Jetüikya khünak süttho-mwotlom, mokle pao ang chikoxle kue abaxüi.”

²⁰ Je-hwon füikya mix omaün? Tsingpa-manpa omaün? Athaxpongkya tsaipu-kaxpabu omaün? Zange ija chaxwannu je-hwon a ongat changpu le ahodaoa!

²¹ Chemthüikoxle Zange chix je-hwon makhange khünaknue chix mahwon maje füi awanle chitsuak angkya lima achangdaoa. Itülüi, kwome apuk-apuakya kaxho, oja ang khünake tsaingat kaxngui le nyakpuix, ija kaxho to mongong tüikya khünakbu khosün angkya Zang mongto texdaoa.

²² Chemthüikoxle Jehudi noke münwan lom ilaxle Grik noke ohünotün mwotbu lom,

²³ ikoxle oja Jehudi nok hanpakma chikho thukya hex ilaxle mixnokbu hanpakma ongat hex, Khrista pünsak ma takle langkya ija kaxho kwome apukpu;

²⁴ ikoxlechu Zange opang nyakle kopdao laxpuix, Jehudi hia mixnok pangnu wüi, hwom zongto ija kaxho a, owa Zang tsakzong hia je-hwon hex, ija Khrista changpu.

²⁵ Chemthüikoxle oja Zang zong ma ongat hex, ija a khünak je-hwon füichu süthak, ilaxle oja Zang zong ma shonaipuix, ija khünak tsakzong füichu süthak changpu.

²⁶ Kutüi kunaohom, Zange nang nyak pongma nang chem changkya hex, athax nange ija texle ataklax. Khünak chikao ma hünzom züizüi a jetüi hwonlangkya mix chichangba tsakzongkyamix chichangba tu ma alixachong tuita changkya.

²⁷ Jetüi hwonlangkyabu tha ajao ang chaxwannu angkya ongatbu tamchu tsakpa zongpa ang thünzak kox angkya hanpakma chaxwannu angkya zong chitüikyabu, Zange chaktung ma zünle koppu.

²⁸ Chaxwannue okho le laxkya tha ama angkya hanpakma, chaxwannue afangle hukya hia tüta ma lax angchu münmüi le awütle thomkya Zange zünle kop.

²⁹ Ija a khünak owachu Zang pomtho ma bong-chong le chitüi angkya hanpakmale changle.

³⁰ Ikoxlechu Zange hünzom Khrista füikya notom hato ahüidaoa, ilaxle tamchu Zange Khrista a kem zongto je-hwon ang zingdaoa. Chix makhange tix kem Zang zongto sukya ang achangle; kem a Zang otsao khünaknu ang achangüna ilaxle kem mongtex ma dandaoa.

³¹ Idaile Otsao Lai-e akax ngokya ningle: “Owae ngamse texlaxpuix, Jowanpa-e chem mokdao laxpuix ija khoma ngamkox.”