1 JUHAN 4 - OTSAO BAIBEL (BSI)

Otsingtsing hia Othai Chasa

¹ Kutüi kunaohom, chasa tüipule athüithüi nok to taxong, ikoxle hwom ma tüikya chasa Zang tokhange hüikya changcha hex le wanle anolax. Chemthüikoxle othai ajebu pangkha towüi paoüna.

² Zang chasa chichang changpuixle hünzome awan angkya olom a ija: Jisu Khrista khünak ang achangle nguipu le owae akaxpuix, chix ma Zang tokhange hüikya chasa tüile.

³ Ikoxlechu Jisu Khrista bama ija owae changbasu le laxpuix, chix ma Zang tokhange hüikya chasa müntüi. Chix ma tüikya chasa a Khrista zongto zan, owa hüi angkya bama hünzome atatle hüipuix, üntoxle owa ipong tokhange ija chaxwannu ma nguile ngoün puix chix chasa changpu.

⁴ Ikoxle kuli kunaohom, hünzom a Zang kux changpu, üntoxle hünzome othai ajebu to anaodaoa, chemthüikoxle hünzom ma tüikya chasa a, chaxwannu kux ang achangle ngokyabu ma tüikya chasa füi onüi tsakzongkya changle.

⁵ Ibu othai ajebue chaxwannu mwot bama akaxle, chaxwannue ibu kax to apale chemthüikoxle hwom a chaxwannu kux changkoxle.

⁶ Ikoxlechu kem pia Zang kux changle. Opange Zang tsingle tüipuix ibue kem kax apale; Zang kux chichangkyabue kem kax to münapa. Ija makhange keme otsingtsing chasa hia othai chasa nyi ba ajatle awan ang thole.

Zang a Mongkün

⁷ Ku mongkün tüinaohom, tata to mong akünle tüilax, chemthüikoxle mongkün a Zang tokhange hüikya changle. Owae mongkün puix ija a Zang susa changle üntoxle chixe Zang tsingpu.

⁸ Opang ma mongkün chitüipuix, hwome Zang müntsing, chemthüikoxle Zang a mongkün changle.

⁹ Chix tokhange kem ang khüzün tüi angkya kuxma, Zange Hosa tuita wüi tüikya chaxwannu to ajokya makhange Zange chix ma tüikya mongkün ngaile ahole.

¹⁰ Mongkün a ija changle: Keme Zang to mongkünle le münchang, ikoxle chixe tix kem to mongkünpu, ilaxle kem ochax khoma, kem khosün hanpak tö kox ang chixe Hosa ajo.

¹¹ Ku mongkün tüinaohom, Zange kem to ile künkya jangchang thüiba kemechu tata to mongkün angkya changle.

¹² Owaechu Zang tümangün tox, ikoxlechu keme tata to mongkünle jangtuiba, notom ma Zang kem füi tüile, ilaxle kem ma chix mongkün ma okhongui ang tomle.

¹³ Chixe kem ang chix chasa koxkya khoma, notom ma kem Zang füi tomle ngopu tamchu chix kem füi tomle ngopu, ija bama kem khosam müntüi.

¹⁴ Hopae Hosa chaxwannu to khosünpa ang ajokya changpu le kwome ngün ang kop ilaxle mix hama apuapu.

¹⁵ Owawae Jisu a Zang Hosa changpu le jangngai thüiba, notom ma chix Zang füi tamchu Zang chix füi le ngole.

¹⁶ Üntoxle kem hanpakma Zang ma tüikya momgkün kwome awanpu ilaxle mongongpu. Zang a mongkün changle, ilaxle mongkün ma ngokya mix notom ma chix Zang füi tamchu Zang chix füi le ngole.

¹⁷ Kaxfün nyix kem ma mongchyen tüi angkya kuxma mongkün a kem ma okhongui ang tompu; üntoxle keme ija kopüijao chemthüikoxle Khrista chemle tüi, chaxwannu ma kem tsünchu ija füi tuita.

¹⁸ Mongkün ma oza-ozyen chemchu müntüi; okhonguikya mongküne za-zyenkya pao ang tomle. Ikhoma oza-ozyen füikya khünak a otuechu mongkün ma okhongui ang müntom, chemthüikoxle zakya ma sikngün angkya tüile.

¹⁹ Pongwang ma Zange mongkün ikhoma keme mongkünpu.

²⁰ Owawae chixe Zang to mongkünpu le thüilaxle tüinao thua janganu, chix a tselop; chemthüikoxle chixe mik füi ngün ang thokya tüinao to ngaxchu mongkünkya chitüi, mike ngün ang chithokya Zang to ning chemle mongkün angkya?

²¹ Khrista-e kem ang fakya kaxtom a ija changle: Owae Zang to mongkün puix chixe tüinao tochu mongkün angkya changle.