1 JUHAN 2 - OTSAO BAIBEL (BSI)

Khrista Kem to Fongmix

¹ Kusahom, hünzom ochax chilyenle tüi angkya hanpakma kue hünzom hato ija laiza zapu; ikoxlechu owawae ochax jangmok thünba, kem mün ma Hopa ma chingcha ju angkya mix kem ang otsao khünak tuita Jisu Khrista tüipu.

² Kem ochaxbu thailak atak angkya olom Khrista tata wüi, kem ochaxbu tata le münchang, ikoxle zangfang nok ochax hanpakchu changle.

³ Keme Zang kaxtom kax ma laxle jangtüiba, keme chix tsingwankya Ija makhange atsingsho le changüi.

⁴ Owawae chix awanpu le akax, ikoxlechu chix kaxtombu kax ma laxle chitüi, jangchangba chix atsepu üntoxle otsingtsing chix ma müntüi.

⁵ Ikoxle keme chix kax ma janglax thüikoxle Zang mongkün ma okhonguile tüikyabu kem changle. Kem Zang füi notom ma ngole le tsingle lax angkya olom a ija changle.

⁶ Keme kem Zang füi notom ma ngopule jangthüi: Khrista chemle ngodaopuix ilailaile kem ngo angkya changle.

Kaxtom Hozün

⁷ Ku mongkün zuikhuibu, kue hünzom hato zale tüikya kaxtom hozün le münchang; ija a pongwang tokhange wüi hünzom ang tüile ngokya kaxtom ozang changle. Kaxtom ozang a tuita hünzome atatdaokya Kaxho Müikya changle.

⁸ Ibachu athax kue hünzom hato zale ngokya kaxtom a hozün tuita changle, chemthüikoxle ija otsingtsing a Khrista machu tamchu hünzom machu ngo ang kople. Chemthüikoxle zangnaknu kaile leüna, ilaxle zangngai tsingtsinge nyanle tüile.

⁹ Owawae ma zangngai ma ngopule akax üntoxle matüi manao to anule jangchang, ituk kople chix zangnaknu khato ngotan changle.

¹⁰ Owawae ma tüinao to mongkünle jangchangba, chix zangngai ma ngole, idaile owawa ang ochax lyen ang tomkyali chix ma chemchu müntüi.

¹¹ Ikoxlechu owawae matüi manao to anukya jangtüi; chix ikhama ahampu ilaxle ochichi to paoüihex chixe münawan, chemthüikoxle zangnaknue chix mik apwom ang tomdaoa.

¹² Kusu kusahom, Khrista mün khoma hünzom ang, ochaxbu thailak fadao koxle, kue hünzom hato laiza ngopu.

¹³ Apu-apahom, pongwang tokhange wüi, tüile hüikya mix hünzome awankya khoma kue hünzom hato lai zangopu. Tsünzünhom, hünzome onu-oma to lütdao koxle, kue hünzom hato laiza ngopu.

¹⁴ Kusu kusahom, hünzome Hopa awan koxle kue hünzom hato laiza ngopu. Apu-apahom, pongwang tokhange wüi, tüile ngokya mix; hünzome awankya khoma, hünzom hato kue laiza ngopu. Tsünzünhom, Zang kax hünzom ma ngo; hünzome ochax to lüttsuak koxle, hünzom tsakzong le tüikya khoma; kue hünzom hato laiza ngopu.

¹⁵ Chaxwannu to chichangba chaxwannu kux chem tochu mong taxkün, hünzome chaxwannu to jangkünba, hünzome Hopa to münkün.

¹⁶ Chemthüikoxle chaxwannu müi-hi-aji mongzalokya, mikzalokya üntoxle tsün ma mongngam tüikya, chaxwannu ma tüikya ibu chemchu Hopa tokhange hüikya münchang ikoxle chaxwannu angkya changle.

¹⁷ Chaxwannu tamchu ima atüitüi pangnu, chempang to khünake asing puix, ibu pangwüi danle toxdaoüi; ikoxlechu Zang mongtex ma mokle ngokya oshuk chitüi le ngoüi.

Khrista Zongto Zanpa

¹⁸ Kusu kusahom, oshuk a nguile hüile! Khrista zongto zan hüi angkya bama hünzom hama wündaopu; üntoxle athax Khrista zongto zanbu obiobi laihuüna, idaile oshuk nguile hüile le keme awan ang kople.

¹⁹ Otsing tomta ma khünak ibu kem notom ma münwom, tamchu ikhoma hwome kem danle toxpu; hwomchu kem notom ma tüipuix thüikoxba hwom kem füi tomle ngose. Ikoxle hwomkha angkya owachu kem notom ma womle müntüile ngaitho le naxtsing lax ang hwome kem danle toxpu.

²⁰ Ikoxlechu hünzom ma Khrista-e thokle koxkya Otsao Chasa tüipu, idaile hünzom pange wüi otsingtsing awanpu.

²¹ Hünzome otsingtsing chitsingkya khomale chichang le, hünzome ija awanle tamchu chemtuechu otsingtsing makhange atsekya münlai lüchu hünzome tsingle ngokya khoma kue hünzom hato lai zapu.

²² Jangchangba atsekya a owa? Chix a: “Jisu Khrista Messaiah münchang”, le akaxkya mix changpu. Iningkya khünak a Jisu zongto zan changle; chixe Hopa hia Hosa pangnyi wüi pongle münkop.

²³ Chemthüikoxle Hosa pongle chikopkyabue Hopachu wüi pongle münkop; Hosa pongle kopkyabue Hopachu wüi pongle koppu.

²⁴ Ikhoma pongwang tokhange atatle hüikya kaxho hünzome mong ma kople thom ang ole thüilax. Hünzome ija kaxho mong ma kople jangthomba hünzom a Hopa hia Hosa nyi füi jento notom le ngoüi.

²⁵ Üntoxle Khrista chixjaoe kem ang koxüi hexo le tsaokya oshuk chitüikya tsün khüzün a ija changle.

²⁶ Hünzom dyen ang azongle ngokyabu bama kue hünzom hato ija laiza zangopu.

²⁷ Ikoxlechu hünzom hanpak ang a Khrista-e chix chasa hünzom ma thokle fadaoa. Chix chasa hünzom ma ngokya kople hünzom hanpakma anwot-ano le fa angkya mix lax ngo angkya chem mwot müntüi. Chemthüikoxle pangnusa bama chix Chasae anwot-anole changüi, ilaxle chixe anwot-anokya ma thaikya müntüi, otsingtsing changle. Idaile Chasa hwon-nwot kax ma laxle tüilax ilaxle Khrista füi notom le ngolax.

²⁸ Changpu, kusu kusahom, chix füi notom le ngolax, ikoxletix chix ngai pongma kem a mongchyene awangle tüiüi üntoxle chix nguikya nyix chix thoto azakle azwonle chichangüi.

²⁹ Khrista a otsao changpu le hünzome tsingpu; idaile chem supuix Ija mokkyabu a Zang susabu changpu le hünzome awan angkya changle.