Revaleson 11 - Vato Vari Vakameka Voru Ia Batu Ne

Karua Basoe Tarama

¹ Lri teke nava kameka moki loda i gere go sivata ne mana iri sine nava, Ono degere mana za pada pade tabo ia God mana sara ne, mana ono qana napu qira basoero iri tavatavare go loborona pade tabo ne go.

² Do oniki pada tepa peka na pade ne, tanego iri teke bana ne qira vano rodoko, mana ria tarina kube vasakate osina pata loborona komala tabo Jerusalema nae torana vasiṉaulu karua inaqa.

³ Torana kameka mao karua vasa onomoṉaulu musaqara nae, era tuna turi ne qiru karua basoe era, tiruna va keba ne poga mode, mana tiruna tarama vasadaka seko ia God.”

⁴ Karua basoe tarama nae ne, iato karua moki olivi mana karua pazi iru degere go tarakenaqana Batu na kolabana pua ne.

⁵ Ṉalu kakia basoe i soko go vele vasakata qiru go, nako tina za siporo me saqe qiru, tina vasakata qira go ria iri kana ne qiru. Iago ka basoe i soko go vasakata qiru go riru ne, tina le so.

⁶ Riru ne i ko ne qiru karaputa go tiruna kokoqua go nare go tiniki soru me kaega torana iru tarama nego seko ia God. Iko napu ne qiru so karaputa, iru mazala itana va parasa na besi sukasuka ro, iko napu ne qiru karaputa ṉalu iru soko go vakimate na soso sinaqe na pataro na vudu pua ne.

⁷ Ṉalu tiruna valupo to tarama nena seko ia God, pata piru lavata, i sipore boluna ulana ne tina lama vari tarae de iru koego. Ia tina vaqoqoro qiru mana vae vale qiru go.

⁸ Mana sinara na tokama qiru tina kekele loboro zuka na komala lavata Jerusalema, de go i vae vale bana ze koluse ne Batu riru; vitona iri vapada ze komala lavata nae ne Sodom, ba Izipito.

⁹ Torana kapisa mana takabana musaqara basoero na vuduvudu ro, soso sinaqe ro mana vano soso seko ro go, tarina mia tokama qiru, do iriki vamao kaega tarina vou qiru.

¹⁰ Basoero na vudu pua ne, tarina kula sivala ṉalu tarina gata go le qiru karua basoe tarama dena. Tarina teṉo varikulae mana vari soso ne sosovolomo ro ria de iri koego tanuqira, tanego karua basoe tarama dena to iru lete va vokara qira go basoero topu ne.

¹¹ Taramuzina kapisa mana takabana musaqara dena, marapuga na too i teke ne qiru go God, i vatoo napu qiru, iru degere mana iru zaza, osiqira basoero iri mia qiru go, iri lete sareki sivala.

¹² Gonae karua basoe tarama dena, iru gata kameka ovaṉa lavata i qoqoro me tepa rani ne igo de, “Popoka me dena raburu!” Vano iri kana ne qiru go, iri reṉareṉa ne qiru, iru goe kameka toba mana popoka za rani go.

¹³ Torana so nae kameka nunu lavata sivala i vizua pua ne, mana va manoga tokoboro na komala lavata ne i tapero, mana vitumao basoero iri le. Do ria iriki le go kaega, iri lete sareki, iago iri vazaka vitoṉona God ikoego rani ne.

¹⁴ Varuana pata makuru ne i sivala zato. Do vapisana tiniki umata kaega, tina lama doka napu!

Vavituna Aqelo Ne I Puqo Kuvili Ia

¹⁵ Vavituna aqelo ne i puqo kuvili ia, mana qa gata ovaṉa lavata i naki me tepa rani ne, iri go, “Karaputa tina kenaqa ne ze go kolabana pua ne i ke iato Batu God ita mana Mesia iago, mana iato tina kenaqa go osina ṉalu topuro ne!”

¹⁶ Karabete kavasi kazigarata ro ne, iri koloku e de kolokoloku batubatu ria tarakenaqana God, iri soru kapate tarakenaqana God mana iri vazaka ia.

¹⁷ Iri go, “God Batue qo moqere sivala, qo ko banaṉa meso mana qo ko taru osina ṉalu topu ro ne. Remu qimu seko velaki go aro sauna mazala na karaputa aro, mana ninidena qo va tupia to kenaqa nena osina kolabana pua ne.

¹⁸ Vano rodoko ne iri lete ṉiṉiri, tanego ṉalu muma raro i lama doka to. I ṉalu aro tono varitanae ne qira go vano le bana, mana i ṉalu na napu to tono teke ne qira sasarapa vano zazu aro, ria propeta ro mana osiqira vano iri vamazali go. Patavolomo vano i kone qira mazala mana vano ikaega ne qira ka mazala go. Ṉalu dena to i ṉalu raro to tono pero qira go vano iri pero go vudu pua ne!”

¹⁹ Gonae pade tabo ia God ikoego rani ne i papaqa mana dolo i koego seko vari toqe voru ia God i sadaka me loborona pade tabo nae. Torana so nae kameka naki lavata i lama, gonae kapi i tatavata me, pakala i poto mana kameka nunu i vizua pua ne, mana ipaka na aisi ne i tazele me.