Qalesia 6 - Vato Vari Vakameka Voru Ia Batu Ne

Tavisi Ne Qira Kero Ne Basoero

¹ Turaquro, ṉalu qamu mia go kakia basoe izazu ne go kaki pata sakata, ramu qamu lulua go too ia Spirit tabo muna vatotoloṉe too iago tina tavisi ne go ia, mana muna miasoka napua tanuqamu go ramu tamuniki soru napue go kaega pata sakata ro nae.

² Muna tavisi ne makuru ia kene basoe, vatovato dena to tamuna valulu ze go ramu tamana ia Kristo.

³ Ṉalu kaki basoe i nanao tanuna so i mazala igogo ne, i poqe so tanuna.

⁴ Nogotona basoe mara mia velake too ia tanuna, avigo i velaka ba kaega. Ṉalu itotoloṉo go ia, tinara tora go vazakanapu ne go, pata izazu ne go tanuna, do mara kasi mia pada zena pata izazu ne go kene basoe.

⁵ Tanego osina basoe tina pala bana so papala maqata na too ia.

⁶ Basoe ipala go vari vatatana na tarama ia Kristo mara teke tavisi ne valeke ni vatatana go ia, sauna pata velaka i pala go.

⁷ Kasi poqe na tanumu, tanego kaega ka basoe tina va bulaṉoe go God. Basoe tina pala napua so tanuna urena pata ni leba go.

⁸ Ia i leba ze go nanao ia, too na vudu pua dena tina za le. Ba ia i leba ze go too ia Spirit tabo de ikoego, tina za pala ze urena too gado kutona i kaega.

⁹ Iago ita mata kasi tamadoko ne pata velaka qata zazu ne go. Tanego ṉalu ita qatiki pela ne go kaega zazu nena velaka ita, ita tatana za pala ze urena zazu velaka ita musaqara iko mego.

¹⁰ Iago torana iara kone qita go dena ṉalu, ita mata zazu ne ze pata velaka de iri koego vano qata kamekae go vaogoto na Kristo.

Seko Va Banabana Mana Seko Kula

¹¹ Qamu mia karo lavata ikoego leta qa karo ne qamue go krisiqu tanuqu de!

¹² Basoero iri vatutubo qamue go ramu kosi ne, ria to iri vazaka napu go, mana iri vari vatatana ne pataro i sadake go tokama qira. Iri zazu ne pata dena, i sauna so niki go basoero ne vavokara qirae sauna iri vaogote go koluse ia Kristo iri go so.

¹³ Do ria to, iri vazazu bana go kosi dena, do iriki lulua kaega Tamana. Iri soko so ramu mamu kosi go mara ria vazakanapu ne so, ramu qamu toqe ne go pata iri sine ne qamu go, qamu zazu ne ze go tokama qamu.

¹⁴ Do de qa koego era ne, tuna vazakanapu ne koluse ia Batu ita Jesu Kristo. Tanego pata izazu ne go Kristo ṉalu ile go koluse ne, i sauna to vatovato na vudu pua dena i le bana ne to nanaoqu era mana era qa le palu bana to Kristo. Iago, ma kasi luluna vatovato ia vudu pua dena.

¹⁵ I patavolomo so basoe ikosi ba iki kosi kaega. Pata ilete mazala sivala go basoe mara pala too voru de ikoego God.

¹⁶ Sauqira ria iri lulua go vatovato dena, qa pene God go mara teke ne qira bule mana manava ia, go mara kotavisi qira mana osiqira basoero ia God go.

¹⁷ Valupolupona, kaega napu kakia basoe mara teke napu nava era kaki makuru, tanego kilipa i koe go tokamaqu dena i vasadake era qa basoe seka ia Jesu.

¹⁸ Qa pene go Mana ia Batu ita Jesu Kristo mara ko tavisi qamu turaquro topu. Amen.