Luka 22 - Vato Vari Vakameka Voru Ia Batu Ne

Vano Batubatu Ro Iri Vato Ne Vae Vale Na Jesu

¹ I garogaro to ṉalu musaqara lavata na bureri i kaega go isiti na iri vitoṉo ze Pasova.

² Vano batu ria patere ro mana vano vari vatatana na Tamana iri taqia zuka go tarina vae vale ze go Jesu, do iri sareki ne qira basoero ne.

Jiudas Itoqe Ne Tina Va Besa Ne Go Jesu

³ Gonae Satana i kebae puṉu na Jiudas iri vitoṉo ze Iskariot, ia ikaki kameka ria manoga karua disipolo ro ne.

⁴ Jiudas iza seko tabe qira vano batu ria Patere ro, mana vano batu ro iri miasoka go Pade Lotu, de igo i mazala go tina va besa ne qira go Jesu.

⁵ Ria iri kula mana iri sine ne tarina tekene kesa.

⁶ Jiudas itoqe ne, mana ivatupia taqina kaki ṉalu velaka go tina teke ne qira go Jesu, mana basoero go tariniki rove go kaega.

Jesu Ivanama Ne Ṉaṉa Na Pasova

⁷ I lama doka to musaqara na bureri ikaega go isitina, go tarina vae vale sipi, pata gege na Pasova ne.

⁸ Jesu i turi ne qiru Pita mana Jon i vane qiru dena, “Raburu aburuna za mana vanama ne qita pata qeqe na Pasova.”

⁹ Riru iru tana ne ia, “Adepa tane qo soko qarue go raru taruna vanama zego na?”

¹⁰ Jesu igo, “Ṉalu qaburu zae go loborona komala lavata ne, kaki kameka valeke i pala besi kabo tina soba qaburu. Iago lulua ia mana za kebae pade iza kebae go.

¹¹ Mana sine ne valeke itoṉove go pade ne, ‘Valeke vari vatatana igo me dena deqo koe aro, ade to kova tina ṉaṉae go disipolo ro ia mana tanuna go, sauna ṉaṉa na Pasova ne.’

¹² Ia tina vamia qabure raburu kaki kova lavata zakazaka, iko lupo bana eso osina pata. Nae to taburu na vanamae go raburu.”

¹³ Ṉalu iru za, iru za soba lupo so osina pata ro, qere so i sine ne qiru go Jesu. Mana iri vanama ne to ṉaṉa na Pasova.

Ṉaṉa Vari Vatarutaru Ia Jesu

¹⁴ I lama doka to ṉalu, Jesu i koluku tavisi qira apostoloro ia tevolo ne.

¹⁵ I sine ne qira igo, “Qa lete soko to ṉaṉa tavisi qamu pata gege na Pasova dena, tarakenaqana tunara vokara go!

¹⁶ Tanego qa sine ne qamu go, tuniki ara ge napua kaega pata gege na Pasova dena, go tina za ogoto go talupasa, Too ikoego vari miasoka ia God.”

¹⁷ Gonae Jesu i pala kapu, i seko velaka zaqe God, mana igo dena, “Pala ia dena mana vari kena ne tanuqamu.

¹⁸ Qa sine ne qamu, pasi ninidena popoka za go tuniki ara besia kaega vino dena, go tina lama doka go Too, ikoego vari miasoka ia God.”

¹⁹ Gonae i pala bureri i seko velaka zaqe God, i pasia mana teke qira ria igo, “Ia dena tokamaqu, qa teke ne qamu ramu, zazu ne ia dena mana nanao taru ava era.”

²⁰ Taramuzina iri ṉaṉa lupo i teke ne qira kapu mana igo, “Kapu dena ia to iva vorua go pui ia God, i soso ne parasaqu era, i tazele de qamu koego ramu.”

²¹ Gonae Jesu igo, “Qamu mia, valeke tina vabesa nava go era iko tavisi ve go tevolo dena.

²² Do Tuna basoe tina le, gerena God i vine taru bana go, do manava sakata sivala de ikoego valeke iva besa ne, go ia!”

²³ Gonae iri vatupia vari vatanatanae de iri koe go tanuqira, “Akena tane tina zazu ne go pata dena.”

Vari Valegu Ne Ko Mata

²⁴ Ria disipolo ro iri vari valegu n? akena tane tarina vamazale, go tina mata ne qira go.

²⁵ Jesu i sine ne qira igo, “Batu lavata na vudu pua dena izari ne qira karaputa de ikoego basoero ne, mana ria vano iri kenaqa ne qira basoero ne, iri koru qirae valeke kenaqa ria basoero ne.

²⁶ Do vatovato dena mari kasa koena de qamu koe go ramu. Ia i basoe lavate de qamu koe ramu mara gere sale suka, mana ia i kenaqa e de qamu koego ramu, mana gere seka ne.

²⁷ Akena tane i mazala go riru dena. Velake i koloku mana iṉana go! Ba ia i vanama go pata gege ne? Ramu qamu rove, iato valeke i ṉaṉa go, do era, qa ko piri ne qamu gere valeke i vanama go pata gege ne.

²⁸ Ramu qamu ko vanadu e de qa koe go era, loborona topu makuru qa soba go.

²⁹ Gerena so Mamae i teke nava era karaputa, iago era qa teke ne qamu ramu karaputa go tamuna kenaqa ne qira basoero ne.

³⁰ Ramu tamuna ṉaṉa mana besi tavisi e tevolo na vari miasoka era mana ramu tamuna koloku e de kolokoloku ria batu ro, mana tamuna kenaqa, ne qira manoga karua sinaqe na Izirel.”

Jesu I Sine Ne Pita Tina Legu Va Kaega Tanuna

³¹ Jesu i sine ne qira, “Saimon, Saimon, ono gata! God iva mao Satana go tina pada ne qamu osiqamu, i taqia akena tane i degere vanadu go tina vota vakakavata ne velaka mana sakata, gere so valeke zazu barui i soso taru ne qiru go de velaka na vuiti, mana de sakata na go.

³² Do era qa pene go aro, Saimon, go vaogoto aro niki pela kaega. Mana ṉalu qo degere ule me de qa koego era, aro tono vakarapata qira go kaemu ro.”

³³ Pita ivataule ne Jesu igo, “Batu era qa vanama bana ne tuna koe bara ne, mana le palu go aro!”

³⁴ Jesu igo, “Masine nigo Pita, tarakenaqana kokorako tina dae go, aro kapisa sine tono vae qoki rove ava kaega era.”

³⁵ Gonae Jesu i tana ne qira disipolo ro ia, “Ṉalu qa vazazao bana qamu go, qamuki pala kaega pata tarutaru kesa, kurama suka, ba makebotu. Avigo qamu pusi ne kaki pata ba?” Iri go, “Kaega so kapata.”

³⁶ Do ninidena igo Jesu, “Ṉalu kaki aro iko nigo pata tarutaru kesa, ba kurama suka gogo ne mara pala. Mana kaki aro i kaega nigo pegi varitara mara volivoli ne roku ia mana volia kameka.

³⁷ Go qa sine ne qamu go pata dena, mara votoe, de qa koe era seko dena, Buka tabo ne i sine bana igo, Tri vapala tavisi ze ia basoero sakata iri vae tamana.’ Iago osina pataro dena mara lama ogote de qa koe era.”

³⁸ Ria disipoloro ia iri go, “Mia Batu! Karua pegi loda dena.” Jesu igo, “I tora to nae!”

Jesu I Za Pene Tepa Kubolo Na Olivi

³⁹ Jesu i kasi ne komala lavata ne, mana i zae Kubolo na Olivi gerena de igogo taru bana so, mana ria disipolo ro ia iri lulua.

⁴⁰ Ṉalu iri za dokae de gogo ne, Jesu i sine ne qira, “Pene, go tamuniki soru e go kaega vasakata pata.”

⁴¹ Gonae i kasi ne qira aqe desuka iza koloku tutuṉu mana i pene.

⁴² Mamae igo, “Ṉalu aro qo mao ne go, ono pala vakuziki ne kapu na vokara dena, deqa koego era, mara kasi nanao era tanuqu, do mara lulua so nanao mu aro.”

⁴³ Gonae kameka aqelo na rani ne i lama vakaraputa ia.

⁴⁴ Ilete pela sasakata ne maqata ia, mana loborona auna pepene ivaego, idana na i sosone go pua ne, i gere go parasa ne.

⁴⁵ I pene lupo mana i zae de iri koe go ria disipolo ro ia mana i mia qira iri kamuku tanego iri lete maqata.

⁴⁶ I sine ne qira, “Avigo tane qamu kamuku go na? Dogara mana pene go tamuniki soru e go kaega vasakata pata.”

Vano Soldia Iri Pala Tarua Jesu

⁴⁷ Jesu iara seko tabe qira disipoloro ro ia, topu ria basoero iri lama doka. Jiudas i kaki kameka ria disipoloro ia i kenaqa ne qira, ilama e de i koe Jesu mana i kuna.

⁴⁸ Do Jesu i sine ne ia igo, “Jiudas! Kuna dena to qova besa ne ze go aro Tuna basoe?”

⁴⁹ Ṉalu ria disipolo ro iri ko tavise Jesu iri mia rove pata tina doka go ne, iri tana ne ia, “Avigo mimu va zazua to peqi varitara remu ba Batu?”

⁵⁰ Kameka ria disipoloro ro ne, i puta siva zaqe qeqele matauna kameka seka ia batu ria patere ro.

⁵¹ Do Jesu igo, “Kasi zazu ne na pata igogo nae!” Isiba zaqe qeqelena valeke ne mana iva velake go.

⁵² Jesu i sine ne qira vano batu ria Patere ro mana vano batu na pade lotu, mana kazigarata ro iri lama ne go pala na ia, “Avigo qamu lama ne pala na valeke sikosiko, tane qamu pala me go peqi varitara, bele mana kobau ro go?

⁵³ Era qako tavisi qamue ramu loborona Pade Lotu ne nogotona musaqara, do qamuki nanao kaega palava era. Do ṉalu ramu to dena, tanego i kenaqa ne qamu karaputa ia rodoko.”

Pita Igo Iki Rove Kaega Jesu

⁵⁴ Iri pala Jesu iri vazao ze pade ia batu ria patere ro. Pita i lulu muzi va laqalaqa me so.

⁵⁵ Kameka nako lavata iri vakamu ze peka lavata rikisi na pade ia qavuna ne. Pita gonae iza koloku, i kakasiru tavisi qira ria iri koloku e go rikisina nako ne.

⁵⁶ Kameka qole zazu i mia Pita i koloku e go rikisi nako ne, i reṉa ne ia mana igo, “Valeke dena to i lulua go Jesu!”

⁵⁷ Do Pita i legua, qole ne igo, “Qole! Qaki rove kaega era basoe nae.”

⁵⁸ Iki umata kaega kaki valeke i mia rove Pita mana igo. “Aro to go kakia ria!” Do Pita i vataule igo, “Valeke! Era kaega!”

⁵⁹ Mana taramuzina kameka aoa ba go, kaki valeke i lete sine vamoqere igo, “Kakiara riro ne kaega, valeke dena ogotona to i lulu ne Jesu, tanego i valeke Qalili!”

⁶⁰ Pita ivataule igo, “Valeke! Qaki rove to kaega era kapata qo sine go aro.” Iara sekoseko so ia dae to igo kokorako ne.

⁶¹ Batu ne i tabali mana i reṉa totoloṉo za qe Pita, mana Pita i nanao tarua pata i sine bana nego Batu ne, “Tarakenaqana daena kokorako kuse ninidena kapisa sine tono vae ne, qoki rove ava kaega era.”

⁶² Pita i siporo za peka ne, iza dae.

Iri Vakari Ne Mana Iri Sima Jesu

⁶³ Valeke ro iri za pala go Jesu iri vakari ne mana iri sima go.

⁶⁴ Iri kade ze poga karua matana mana iri tana ne, “Akena tane i lapakigo, sine me to aro iri vane.”

⁶⁵ Mana topu seko sakata ro iri sine ne mana iri damua go.

Iri Vadegere Ze Jesu Tarakenaqa Qira Vano Gatagata Pepeu

⁶⁶ I tavuara me to musaqara, vano kazigarata ro, vano batu ria Patere mana vano vari vatatana tamana, iri kameka teṉo mana iri lulu vazao ze Jesu, tarakenaqa qira vano gatagata pepeu.

⁶⁷ Iri vane dena, “Ono sine ne qemu, aro to qo Mesia go ba?” I vataule ne qira igo, “Ṉalu tuna sine ne qamu go era do, ramu qamuki mazala kaega vaogotena.

⁶⁸ Mana ṉalu tu tana ne qamu era, ramu do qamuki mazala kaega vataule na.

⁶⁹ Do pasi ninidena, i popoka za go, era Tuna basoe tuna koloku e karisi matauna God i moqere sivala.”

⁷⁰ Osiqira iri go, “Iago aro to qo Sale ia God ba?” I vataule ne qira igo, “Iato qamu sine go, era to.”

⁷¹ Gonae iri go, “Mata kasi ara taqina kaki basoe tina lama sine vamazale go sakata ia. Ita tanuqita qata gata to dena seko ia!”