Karua Pita 2 - Vato Vari Vakameka Voru Ia Batu Ne

Vano Vari Vatatana Poqepoqe

¹ Vano propeta poqepoqe ro iri sadaka banae de iri koego vano Izirel, tina gere napua so vano vari vatatana poqepoqe ro tarina lama sadaka napue deqamu koego ramu, tarina sine vari vatatana poqepoqe ro dena, go tina vasakate go vaogoto raramu, go tarina va poqepoqe go Batu ni baure go vasakata pataro ria. Iago, God tina va kimata katikili qira go.

² Topu vano lotu tarina lulua vatovato sakata ro, mana sauna vatovato sakata ro ria iri zazu ne go, basoero ne tarina sine vasakate vatovato na zuka totoloṉo.

³ Vano vari vatatana poqepoqe ro nae, iri soko so pala na kesa ramu, iago iri vari vatatana ne so pata poqepoqe ro. Do kimata ria vano vari vatatana poqepoqe ro dena, i nama bana me so. Iago i makuru qira tarina paqa ne, ia tina vae vasakata qira go.

⁴ God i vakimata qira aqeloro ne ṉalu iri legulegua go. I vana qira qe nako de i rodoko go, go tina doka go ṉalu tina varitanae ne qira go osina basoero ne.

⁵ Gerena napu so God ivakimata qira basoero, iri koego vudu pua ṉalu bana me iri legulegu go. Ia i valame nare mana kiale lavata isapu vale lupo qira. Do tanuna so Noa valeke i tamana ne go vatovato totoloṉo, mana ria taravitu basoero iri kavele go.

⁶ God i tulaṉa ze nako komala Sodom mana Qomora, go nae isubi lupo qira nako ne. I zazu ne pata dena va padapada na to pata tina sadaka qira go basoero iriki vaogote go kaega ia.

⁷ Ia i vakavele Lote, kameka valeke totoloṉo tanego Lote iki kula ne kaega vatovato sakata ro ria basoero ne.

⁸ Valeke totolono dena, i ko tavisi qira basoero sakata dena. Osina ṉalu nanao na iki velaka to kaega sauna vatovato sakata ro ireṉa ne, mana i gata ze go basoero iri zazu nego.

⁹ Iago osina pataro dena, God i va mia qirae ria basoero velaka de go ia tina vakavele qirae go pata makuru tina lama pada ne qira go. Do vano sakata ne, tina vakimata qira, go tina doka ṉalu tina vakimate go osina basoero ne.

¹⁰ Basoero iri kimata go dena, ria to basoero iri zazu ne go vatovato sakata de ikoego kene basoe, mana iri mia vaqoqore karaputa ia God go. Mana vano vari va tatana poqepoqe ro dena iri vazaka napu, mana iri lulua so nanao ria tanuqira. Iriki nanao vamazale kaega aqelo ro iri koego rani zakazaka ne, mana iri seko va qoqoro qira go.

¹¹ Patavolomo aqeloro iri karaputa mana mazala sivala ne qira vano vari va tatana poqepoqe ro dena, do iriki seko vasakate kaega kakia basoe loborona tarakenaqana God.

¹² Do basoero dena iri soko varitara gere qira pata piru ro, iago itora so vae vale qira. Tanego vano poqepoqe ro dena, iri seko sila so pataro iriki rove go kaega, iago i tora so vae vale qira gere na iri vae vale go pata piru rone.

¹³ Iago vokara tarina pala go mara gere volina vokara iri teke qira go basoero ne. Pata i vakula qira go zazu ne na, ia so pataro iva kula go tokama qira loborona musaqara. Ṉalu iri lama ṉaṉa tavisi qamu iri lete va agava qamu sauna too sakata ro ria, do tanuqira iri kula ne ria tane zuka tatakiuro ria ne!

¹⁴ Kaega so kaki pata iri lete soko go, do zazu nena so taunata osina ṉalu. I makuru qira va mamanava na too sakata ria nae. Mana iri lete va bulaṉoi qira to basoero i memelaka go vaogoto ria, go mara vasakata napu qira iri go. Mana puṉuqira i lete soko so pala na patapata ro ria basoero ne go. Iato nae tane God i sine bana, tina vakimata qira igogo ne.

¹⁵ Vano vari va tatana poqepoqe dena iri kasi bana ne, too totoloṉo, mana iri bulaṉoi, iri lulua propeta Balam tuna Beo, i lete soko so vavagado nena zazu sakata ro i zazu nego.

¹⁶ Do donki ia propeta dena, iva mamanava ze ia zazu nena vatovato sakata ia. Donki dena i seko gere basoe, i sine va mogere ne Balam, mana iki soko kaega ia mara zazu nego vatovato ro igogo ne.

¹⁷ Vano vari vatatana poqepoqe dena iri gere besi vuala i kadala go, mana iri gere tuqi lavata ikiuru vanaqe go sokoro lavata. God i vanama bana ne qira kameka dia ilete rodoko sivala go.

¹⁸ Iri zazu ne seko vazakanapu mana vari va bulaṉoi. Iri vaqalo qira basoero go mara va zazua nanao sakata, visara na tokama qira, go ia mara vasoru qira basoero iri ara vatupiana ne go vana nena too sakata ro ria ne, iri go.

¹⁹ Vano vari vatatana poqepoqe dena iri pui ne qira basoero ne ko talukasa, do tanuqira iriki ko talukasa kaega, iri ko seka eso too ni vasakata qira go. Tanego basoe i vakenaqa ze go too ia kaki pata, iato nae i seka nego osina ṉalu.

²⁰ Ṉalu basoero iri rove va velake go Jesu Kristo Batu ita mana vari vakavele ita igogo ne, tarinara mazala go ko talukasena too sakata na vudu pua. Do ṉalu iri zazu napu ne go too sakata ro dena sakata ro ria tina sivala ne to kokoso na bana me ne.

²¹ Iago, i lete velaka sivala so tara ria kasi mia rove bana na zuka totoloṉo dena. Tanego iri lete rove va velake, do iri tabali kakamu napu ne tamana tabo ia God i teke bana ne qira go.

²² Pata i doka qira go ne, i vasadaka ogoto me to kaki seko vapadapada ogoto igo dena, “Sika i lua mana i ge napua mana boko i seqe lupo mana za kuru napu ne lomi go.”