Karua Pita 1 - Vato Vari Vakameka Voru Ia Batu Ne

¹ Era Saimon Pita qa basoe zazu mana apostolo ia Jesu Kristo. Qa karo ne qamu ramu i teke ne qamu go God va ogoto, i gere go vaogoto reremu, tanego Jesu Kristo ia i God, i vakavele qita i lete velaka sivala.

² Go Mana mana bule mara koe de qamu koe ramu, loborona rove velaka ramu de ikoego God, mana Jesu Kristo Batu ita.

Avana Tane God I Soko Qitae Go

³ Loborona karaputa ia God, Kristo i teke ne qita osina pataro i tora go too ita, go tatana lulua go totoloṉo ia God. Loborona rove ita de i koe Jesu Kristo, ia i koru bana qita go tatana pala tavise go menomeno na karaputa mana totoloṉo iago.

⁴ Iato vatovato dena go i teke ne qita go mazala sivala, mana sosovolomo velaka sivala ni pui bana mego. Go tamuna pala go sosovolomo dena, muna paqa kasi ne too sakata ro ni koego basoero na vudu pua dena, gogo tamuna pala tavise go too tabo ia God.

⁵ Sauna to pata dena i zazu bana ne go Kristo, iago pala taru vanadua vaogoto dena de ikoego ia, mana rove na God go.

⁶ Muna miasoka va velake tokama qamu mana degere vanadu osina ṉalu, mana lulua too ia God.

⁷ Muna mamaligara ne qira vano lotu, mana muna lete mamaligara napu ne qira basoero topu go.

⁸ Ṉalu too igogo nae i koe loborona too ramu, mana i zaza popoka gogo ne, ramu tamuna lete velaka sivala. Mana too ramu tina ko ure velaka na go, tanego qamu rove velake Jesu Kristo i Batu ita.

⁹ Do basoe i kaega ne too dena loborona too ia, i gere so basoe iki mimia velaka go kaega matana, i nanao kasupe ne to God ni saboro va kuziki bana ne go vasakata pata ro ia.

¹⁰ Vakitaka ro era, God i vine mana i koru bana qamu go, qamu ke ia tanuna. Iago muna lete zazu vakaraputa go tamuna vanadua go vine mana koru ia God de qamu koego. Ṉalu qamu va voto pataro nae, i makuru napu tamunara soba makuru go.

¹¹ Mana God tina va mao ne qamu keba zana vudu voru iki rove go kaega za lupo. Vudu nae ne, iato i za ko Batu ego Jesu Kristo Batu ita ne.

¹² Pata ogoto, era tuna vananao taru qamue ramu osina ṉalu, iago muna degere vanadue seko ogoto qamu pala bana go.

¹³ Qa nanao i tora era tuna va nanao taru qamue ramu pataro dena ara too qa vaego.

¹⁴ Era qa rove too era pua dena tiniki umata kaega, gerena Batu ita Jesu Kristo i sine bana nava.

¹⁵ Iago era ma lete zazu vokara, go ṉalu era tuna le, ramu tamuna nanao tarua pata ogoto qa sine go era.

Tarama Ogoto Ria Apostoloro

¹⁶ Ṉalu qimu sine ne qamu ramu, lama napu na Jesu Kristo Batu ita ne, na lulu me karaputa, qimuki sine so kaega pepeu volomo ria basoero ne. Do remu qimu mia ze to mataqemu karaputa ia.

¹⁷ Remu qimu ko tavise ia ṉalu God Tamana i teke ne go ia va Batu mana karaputa mazala ia, ṉalu ovaṉa na ne igo, ‘Tadena to Sale valeke era, qa lete mamaligara ne go!”

¹⁸ Tanuqemu so remu tarapisa, qimu gata go seko dena i reqe mego rani ne, ṉalu qimu ko tavisi ze go Jesu kubolo tabo ne.

¹⁹ Iago remu qimu lete vaogote to sekoro ria propeta ro iri sine bana go, iago i tora ramu muna pala taru vamazale seko ria propeta ro, tanego sekoro dena i gerena kameka pazi i tatavatae go de i rodoko, mana pazi dena tina damara go tina doka so tavuara na musaqara, mana tatavata na domiri dodola tina tatavatae puṉuqamu.

²⁰ Do pata lavata sivala, muna nanao tarua pata dena, kaega ka basoe tina mazala go sine lupase na sekoro ria propeta ro koego Buka tabo ne, ṉalu i valulu ze nanao ia tanuna.

²¹ Tanego sekoro ria propeta i kaega ka ṉalu iri sine volomo ze go nanao ria tanuqira, do Spirit tabo so i tavisi ne qira, go iri sine vasadake go sekoro i reqe mego God.