Karua Jon 1 - Vato Vari Vakameka Voru Ia Batu Ne

¹ Era qa kazigaratana lotu qa karo nigo aro qole tavini, mana sale ro aro go. Qa lete mamaligara ne qamu, do iki tanuqu so era kaega, ria napu to iri rove velake go Jesu Kristo go.

² Tanego seko ogoto dena ikoe loboro qita mana tina ko tarue to de qata koego ita osina ṉalu topu ro ne.

³ Go God Tamaqita mana Jesu Kristo Sale ia mara teke ne qita Mana, manava mana bule go mara kotavisi qita loborona ogoto mana mamaligara.

Ogoto Mana Mamaligara

⁴ Era qa lete kula sivala qa gata go kakiaro salero ramu iri lulua go zuka na seko ogoto loborona too ria, gerena Tamaqita i sine bana ne qita go zazu nena.

⁵ Iago qa sine nigo qole, ita mata vari mamaligarae. Tamana dena iki pata voru gara karo ne qamu so kaega era, do i tamana qata rove bana me so kokosona ne.

⁶ Mamaligara qa sine go era dena ne, italukase ita mata luluze osina ṉalu tamana ro ia God. Mana tamana qamu gata bana mego kokosona ne igo dena. Osiqamu muna ko vari mamaligarae.

⁷ Topu ria vano poqepoqe iri goe to osina dia vudu pua, mana basoero dena iriki vaogote kaega Jesu Kristo i lama pala go tokama gere qita ita vano basoe. Basoe igogo nae i poqepoqe mana ikana ne Kristo.

⁸ Iago, muna miasoka napua tanuqamu, niki go ramu vana ne zazu vokora ramu. Do pata itora go, ramu muna pala lupo voli qamu i vanama bana go God.

⁹ Ka basoe iki vanadue go kaega varivatatana ia Kristo, mana vazazao kakavata varivatatana nae igogo ne, iki toṉove kaega God. Do ka basoe i lulu totoloṉe go varivatatana ia Kristo, ia itonovo qiru to Tamana mana Tuna.

¹⁰ Iago ṉalu basoe varivatatana i lamae de qamu koego iki lulua kaega varivatatana ia Kristo, kasi vakeba zena pade ramu, mana kasi sine ne na seko “bule ina ko tavisi qamu”.

¹¹ Tanego ka basoe i seko velaka ze go bule de ikoego basoe nae, basoe nae ivasadake to itavise zazu sakata i zazu ne go basoe nae.

Vari Vatatana Ia Kristo

¹² Era iko nava topu pata ma sine ne qamu ramu qa go, do qaki soko kaega karo zena leta, qa soko magaretu mana vapepeu qamu mana osiqita mata vari kulae lupo.

¹³ Salero ia vavanimu qo mamaligara ne go iri vagaretu tavise seko kula ria de qamu koego ramu.