Kameka Timoti 6 - Vato Vari Vakameka Voru Ia Batu Ne

¹ Vano kristiano iri vazazu qira go, mara nanao vamazale batu ro ria, go basoero ne tariniki seko vasakate vitoṉo na God mana varivatatana na lotu go.

² Vano kristiano iri vazazu qira go, mana batu ria i basoe lotu, mara mia vamazale batu ria, patavolomo iri varitora go. Vano zazu ne, mara ria zazu velaka, tanego batu ria iri pala ze vari vatatavisi loborona zazu ria iri vaogote iri vari mamaligarae go.

Ono Vari Vatatana Ne Mana Tarama Ne Pataro Dena

³ Basoero iri vari vatatana ne vari vatatana kakavata, iki lulua go kaega seko ogoto ia Batu ita Jesu Kristo mana vari vatatana na lotu gogo ne,

⁴ basoero nae puṉuqira i purake vazakanapu mana iriki nanao rove so kaega kaki pata go. Nanao qira i mokoso iato go iri soko so varivalegu ne seko mana talupasana ro go. Pataro nae to i vapuro mego qora, pera, seko sakate na kene basoe, nanao sakata qira basoero go

⁵ iri vari valegu taru so, mana nanao qira iki totoloṉo kaega, iago iriki mia rove kaega pataro i totoloṉo go. Iri nanao ṉalu iri vaogote mana lulua God ria tarina toṉove topuna pata vavagado, iri go.

Vavagado Ogoto

⁶ I pata ogoto, vaogoto ita de ikoego God i mazala teke ne qita vavagado, ṉalu qata kula ne pataro qata toṉove de.

⁷ Tanego, i kaega kaki pata qata pala vakeba me ze go kolabana pua, ṉalu qata podo mego, mana ṉalu tatana le, i kaega napu kapata tatana pala vakuziki ne ze kolabana pua de.

⁸ Iago ṉalu go i ko qita pata gege mana poga gogo ne, itora qita to nae.

⁹ Do basoero iri soko go vavagado iri sorue pada mana i suqi qira Satana loborona pata vari vabulaṉoi mana pata sakata ro. Pataro nae tina toqo vaqoqoro qira, mana too ria tina lete sakata, mana God tina va kimata qira go.

¹⁰ Soko na kesa iato i kutamana go osiqira pata sakataro ne. Kakiaro basoero iri lete le ne vavagado, go iri zaza vakakavata, mana iri va vokara ze nanao qira nanao sakata ro.

Too Kristiano Ogoto

¹¹ Do aro qo basoe ia God, pataro nae oniki zazu ne, do ono pada ne zazu na pataro i totoloṉe go tarakenaqana God. Ono ko vanadu gere basoe lotu ogoto mana vanadua vaogoto aro go. Ṉalu na makuru, ono karaputa, mana ono mamaligara mana va velaka ne qira basoero go.

¹² Tetene va velake loborona vari vose na vaogoto aro, go tono tonovo ze too aro, too iki rove go kaega lupo. Tanego i sauna too dena, God i koru goe aro, ṉalu qo vanadua go vaogoto aro tarakenaqa qira basoero ne.

¹³ De ikoego God, i teke too osina ro pata, de ikoego Jesu Kristo i vasadaka ogote vaogote ia, de ikoego Pilato, ṉalu iri vele vae vale go ne. Qa seko moqere atu,

¹⁴ ono vaogote mana lulua tamana ro dena, ono sotia mana osaka ne, go na doka so ṉalu musaqara tina lama sadaka go Batu ita Jesu Kristo.

¹⁵ Tanuna so God tina vasadaka ule me Jesu, lulua ṉalu i vanama bana. God i lete velaka sivala, mana kolabana pua ikoe karaputa ia, i Batu lavata sivala ne kero na batu lavata ro mana i Batu sivala ne qira kero ne batu ro go.

¹⁶ Tanuna so ia iki rove go kaega le, mana de ikoego ia i koe tatavata mana kaega ka basoe i mazala go zae na. Kaega ka basoe i miasoba go ia, mana basoe i makuru miasoba na go. Osiqita mata vazaka God i koe karaputa osina ṉalu topu rone! Amen.

¹⁷ Sine ne qira basoero iri vavagado ne patana ro too ninidena, mara kasi vazakanapu ne, mana taru ze ruruqe ria go, tanego i mazala so za kaega ba lupo go. Do mara vanadu ze nanao ria de ikoego God, iato tina teke ne qita pata velaka ro, go tatana ko kulakula go.

¹⁸ Sine ne qira mara zazu ne pata velaka ro, mara vavagado ne zazu velaka ro, nanao qira basoero mana soso ne patapata ro ria de iri koego kero ne basoero go.

¹⁹ Zuka nae ne iri mazala babana vatopua pata vavagado mana vanama velaka ne ṉalu muzi. Mana iri mazala to palana too ogoto nae iki rove go kaega lupo.

²⁰ Timoti ono miasoka velake Tarama Velaka ia God i taru bana zego go karismu. Tabali kakamu ne seko sakata ro i vasakate God iri poqe ne iri go, ianae to i tarove velaka.

²¹ Kakiaro basoero iri lulu bana tarove dena, iato go iri vana ne vaogoto ria. Mana ia God mara ko tavisi qamu osina ṉalu.