Kameka Timoti 5 - Vato Vari Vakameka Voru Ia Batu Ne

Vatovato, Too Mana Zazu De Koe Vano Vaogoto

¹ Oniki seko lavata qira basoero iri kazigarata sivala ni go, do ono seko tabe velaka qira, gere ṉalu qo seko tabe go tamamu. Ria gavere ro ono vagere qirae qamu tamakena ro.

² Qolero kazigarata ro vagere qirae sinamu, mana qole suka ro ono vagere qirae vavanimu ro, loborona too dalo mana totoloṉo go.

³ Tavisi ne qira qolero nanaro, ni kaega go kake tina miasoka qira go.

⁴ Do ṉalu kaki qole nanaro iko salero ia ba babazunaro gogo ne, ria mara nanao rove kenaqe de go too mana vatovato na lotu, de go miasoka na ko tatamana ria. Mana iri mazala kavale na zazu vari vatatavisi iri zazu bana ne vanovano ria, tuqirazake ba sinaqira qole go. Tanego too nae to i vakula go God.

⁵ Qole nanaro ni ko vamiki so tanuna, i kaega go ka basoe tina miasoka go, ia mara taru ze ala ia de ikoego God, mara pene tarua so, go God mara tavisi ne ia kuse mana musaqara go.

⁶ Do ṉalu kaki qole nanaro i lulua so nanao na tokamana tanuna, ianae i le bana tokamana, patavolomo iara too go.

⁷ Ono vatatana velaka qira qolero nanaro sauna tamana dena, go kaega ka basoe mara seko vaqoqoro qira.

⁸ Tanego ka basoe iki tavisi ne qira kaega basoero na sinaqe ia ba vanovano ia gogo ne, i vasadake i vana ne vaogoto ia. Too ia i lete sakata sivala ne qira basoero iriki vaogote go kaega God.

⁹ Kasi karo varipalu ne qira osiqira qolero nanaro, do ria so i onomoṉaulu seki go masirani qira, mana iri busia so kameka valeke go,

¹⁰ mana qole nanaro nae, basoero ne tarina mia vamazale ia loborona zazu velaka ro ia, i miasoka velaka qira sale ro ia, i vakeba qirae basoero kakavata pade ia, mana i sabore makeqira vano iri vaogote go Kristo go. I tavisi ne qira basoero iri soba makuru loborona too ria mana tina kaki qole i pada ne zazu ne na pata velaka osina ṉalu go.

¹¹ Ria qolero nanaro iri ara voru go, oniki karo vitoṉo qira, tanego iri mazala so vana ne vaogoto ria de ikoego Kristo, ṉalu tokama qira i lete soko napua busi.

¹² Basoero ne tarina mazala sine na, qolero nanaro nae iri vae seko odo odo iri vanadu kenaqe go.

¹³ Mana iri tupi lulua, ko volomo mana keba pade ro go. Iri rove napua poro nero, tavisi na too sakata ria vano kakavata, mana pepeu na pataro iki tora qira go kaega pepeuna go.

¹⁴ Iago era qa go, qolero nanaro voru mara busi napu, mara zari ne qira salero, mana mara miasoka pade ria go. Ṉalu qata va voto nanao dena, ria iri kana ne qita tina kaega qira ka zuka go tarina seko va qoqoro qita.

¹⁵ Tanego kakiaro qolero nanaro ne, iri zaza kakavata bana, mana iri lulua Satana go.

¹⁶ Ṉalu ko tatamana ia kaki qole lotu, i ko tavisi qira qolero nanaro, i velaka sivala qole nae mara tavisi ne qira, go eklesia tina mazala napu tavisi ne qira kero ne qolero nanaro iri ko miki go tanuqira.

¹⁷ I tora muna teke ne qira voli mana vitoṉo velaka, de iri koego vano kenakenaqa ramu iri miasoka go lotu ramu. Ria iri lete zazu vokara ne sine vasadake na Tarama Velaka ne mana vari vatatana ne seko ia God, itora tarina pala voli qira.

¹⁸ Tanego Buka tabo ne i sine, “Oniki poṉo saqena okisi ne, ṉalu qo vazazu ze go kube na vuit ne,” mana i sine napua, “Basoe zazu itora tina pala voli na.”

¹⁹ Ṉalu kameka so basoe i sine, kaki kazigaratana lotu i vasakata pata, oniki vaogote, do ṉalu karua ba kapisa basoe iri sine nigo seko igogo ne, nae to ono ara vaogote go.

²⁰ Mana ono seko lavate ia de koe tarakenaqa qira basoero ne go, go kero ne basoero tarina sareki napu ne zazu na pata sakataro.

²¹ Loborona tarakenaqana God mana Jesu Kristo mana aqelo tabo ro, qa pene va karaputa go, ono lulua vari vatatana dena. Oniki tavisi ne qira so ke qo soko tanumu, do ono varitora lupo ne qira so.

²² Oniki nonopa ne, taru ze na karisimu de koe basoe, go mo vatabo, go tina zazu tavise go lotu ne. Kasi zazu tavise na vatovato sakata iri zazu ne go kakiaro basoero, ono ko mana vadalo too aro go.

²³ Kasi besia so miki besi, qo mazala besi na desuka vaini go tina tavisi ne sopamu, tanego aro qo poro mokomokoso.

²⁴ Vasakata pata ria kakiaro basoero, i sadaka va totoloṉo so, iago basoero ne iri mazala so zazu ze vivine ria. Do vasakata pata ria kakiaro basoero i pipika, do tinara sadaka me ṉalu musaqara vivine.

²⁵ I gere napua so, zazu velaka ro i sadaka va totoloṉo so mana basoero ne iri mia rove go. Iago patavolomo zazu velaka i ko pipika go, tiniki ara ko pipika kaega.