Kameka Tesalonika 5 - Vato Vari Vakameka Voru Ia Batu Ne

Mata Ko Vanamanama Ne Ṉalu Batu Ne Na Ule Me

¹ Ramu turaquro, iki tora kaega era tuna karo ne qamu ramu, sauna ṉalu musaqara mana ṉalu tina lama sadaka go pataro dena.

² Tanego ramu qamu rove va velaka bana, musaqara ia Batu ita ne tina za lama go, tina gere valeke sikosiko ni za lama go kuse.

³ Basoero ne tarina go de, “Ninidena i kaega ka pata vari va sareki, iago ita qata ko velaka so.” Do goso nae varivasakatae i doka qira, mana i makuru qira tarina paqa ne. Tina gere qole i poloso ne vokara i pala go, ṉalu i vanama nego vapodo na sale ia.

⁴ Do ramu vakitaka ro era, qamuki koe kaega rodoko, iago musaqara nae tiniki lama vapoloso qamu kaega, gere valeke sikosiko ilama mana vapoloso qamu go.

⁵ Ramu qamu basoero na tatavata, mana qamu zazu ne pata velaka ṉalu ni musaqara go. Ita qatiki basoe na kaega kuse ba rodoko go.

⁶ Iago, ita mata kasi kamuku gere qira vano iriki vaogote go kaega Kristo. Mata dogara, mana vazazao ze nanao ro ita pata ni velaka go.

⁷ Tanego kuse i ṉalu na to kamuku mana i ṉalu velaka nato ge loka go.

⁸ Do ita qata basoe na musaqara, iago mata vazazao ze nanao ro ita pata ni velaka go. Mata pala taru vanadua vaogoto, mana mamaligara gerena bako ita. Mana ruruqe ita, de ikoego vari vakavele ia God i gerena topatopana varitara ita.

⁹ God iki vine kaega ita tatana pala go kimata na muma ia, do ita mata pala ze vari vakavele de ikoego Batu ita Jesu Kristo.

¹⁰ Jesu i le ne sau qita ita, go tatana kotavise ia ṉalu tina za ule me, patavolomo qatara too ba qata le bana.

¹¹ Iago, ramu muna vari vakaraputa napu tanuqamu gerena qamu zazu ne go ninidena.

Valupolupona Seko Era

¹² Turaquro, qimu pene vakaraputa qamu muna vamazala qira ria iri garetu zazue go de qamu koego. Tanego ria to iri vatatana qamue go too ia Kristo.

¹³ Muna nanao vamazala qira mana mamaligara ne qira, tanego ria to iri zazue go de qamu koego ramu, iago muniki pera ba vari vasasakatae go.

¹⁴ Vakitaka ro, qi pene qamu muna seko vakaraputae de iri koego basoero iri muaka iriki zazu go kaega. Muna vamomotono qira basoero iri poro sareki go, muna tavisi ne qira vano i pela go nanao qira go. Mana muniki poro muma katikili go.

¹⁵ Kaega kaki basoe mara zazu ne ze go kene basoe pata i sakata go. Do osina ṉalu muna pada ne zazu ne na pata velaka de qamu koego, mana kero ne basoero go.

¹⁶ Osina ṉalu muna ko kula.

¹⁷ Mana osina ṉalu muna pene.

¹⁸ Muna seko velaka zaqe God sauna osina pata ro i doka go osina ṉalu. Ia to nae pata i soko qamue go God, loborona too qamu vari vakamekae de ikoego Jesu Kristo.

¹⁹ Kasi zazu ne na pata i sakata go; go tina vamidiki ze go karaputa ia Spirit tabo.

²⁰ Mana kasi gata vapatavolomo na seko ia kakia basoe ni tarama ne go seko ia God.

²¹ Do osina pataro dena muna toere velake tekere ia, munara lulua go ke i velaka go.

²² Mana too ba vatovato i sakata go, muniki lulua.

²³ Go God iteke ne qita go bule mara va tabo osina too ramu, mara miasoka tutukunu na too na tokama mana madau, go ramu mamu ko talukase tepa ia pata sakata, go na lama doka go ṉalu ia Batu ita Jesu Kristo.

²⁴ God ikoru bana qamu go tina zazu ne pata dena, tanego ia i totoloṉo.

²⁵ Iago turaquro, muna pene napu ne qemu remu.

²⁶ Mana muna vari kulae napu tanuqamu.

²⁷ Qa pene vakaraputa qamu, muna toere ze leta dena de iri koego vano lotu.

²⁸ Mana ia Batu ita Jesu Kristo mara kotavisi qamu.