Kameka Tesalonika 4 - Vato Vari Vakameka Voru Ia Batu Ne

Too Ni Vakula Go God

¹ Iago ramu turaquro ramu qamu rove vavelaka bana ze de qi koego remu too tamuna pala, go tina vakula go God. Too nae ia to qamu lulua go ninidena. Do loborona vitoṉona Jesu Kristo qi pene vakaraputa napu qamu, Muna lulua mana vazazao popoka napua too nae.

² Tanego ramu qamu rove bana vari vatatana ro qimu teke bana ne qamu go, i reqe me loborona vitoṉona Batu ita Jesu.

³ God isoko too ramu mara tabo, mana ramu muna ko talukase tepa ia too na vari vagabu.

⁴ Nogotona valeke mara rove, mana miasoka vavelake qole ia, go tina velaka, mana lulua go vatovato totoloṉo ia God.

⁵ Mana kasi valulu zena nanaoqamu soko naso tokama na qole, gere qira vano rodoko iriki rove go kaega God.

⁶ Sauna pata dena, kaega kaki basoe mara tatakiu ne, ba zazu ne zena pata i sakata go kene basoe lotu. Remu qimu sine vamoqere mana vabanabana qamue ramu, God tinara vakimata qira basoero iri zazu ne go vatovato igogo ne.

⁷ God iki koru bana qitae kaega ita, too na varivagabu ba taunata. Do ia i koru qita ita tatana va tabo too ita.

⁸ Iago, basoe iki soko go kaega vari vatatana dena. Iki talukasa goe kaega iki soko kaega nanao na basoe, kaega! Basoe nae iki soko kaega nanao ia God ni teke ne qamu go Spirit tabo ia.

⁹ Era tuniki ara karo ne qamu kaega de igogo tamuna mamaligara ne qira go kero ne vano lotu. Tanego God i varove bana qamue de igogo qamu vari mamaligarae go.

¹⁰ Mana ramu qamu zazu bana ne to mamaligara ramu de iri koego turaqita ro iri koe kena Masedonia. Do qimu soko so vakaraputa napu qamu, go muna pala vapopoka napua vatovato nae.

¹¹ Muna pada ne ko duduli, mana riqo ne so patapataro ramu tanuqamu. Kasi seko ne na pata mara zazu ne kene basoe, do muna zazu go tamuna toṉove go, pata tina tavisi ne go too ramu, gerena qimu sine bana ne qamu go.

¹² Loborona vatovato ramu nae vano iriki vaogote go kaega Kristo tarina mia vamazala qamu, mana ramu qamu ki tatadane kaega kaki basoe sauna pata tina tavisi ne qamu go.

Lama Napu Ia Jesu

¹³ Ramu turaquro, remu qi soko ramu muna rove vavelake de iri gogo vano iri le bana go, go ramu muniki maqata gere qira vano i kaega ne qira go ruruqe de ikoego God.

¹⁴ Ita qata vaogote go Jesu ile mana itoo napu mego tepa le ne. Sauna ia dena God tina pala qira ria iri le bana go tarina ko tavise Jesu ṉalu muzimuzi.

¹⁵ Vari vatatana qimu vatatana qamue go ninidena, i vari vatatana ia Batu ne. Ṉalu go kakia ita iara too go ia, do za ule napu me tina gogo Batu ne basoe nae tiniki za kenaqa ne qira kaega vano iri le bana go.

¹⁶ Basoero ne tarina gata seko tamana lavata, ovaṉa na batu ria aqelo ro mana kuvili ia God go, ṉalu nae basoero iri vaogote Kristo iri le bana go, tarina too ule kenaqa me tepa le ne.

¹⁷ Taramuzina nae, ita qata too go, mana ria iri le bana gogo ne, God tina kameka teṉo qitae osiqita zakazaka na toba ne, nae to tatana soba ze go ita Batu ne. De go tatana ko tavisi ze go ia osina ṉalu topu ne.

¹⁸ Iago, seko dena to muna sine vakaraputa ze de qamu koego.