Kameka Tesalonika 2 - Vato Vari Vakameka Voru Ia Batu Ne

Pata Ro I Zazu Ne Ze Go Pol Komala Tesalonika

¹ Ramu turaquro garetu varitove qimu vae go remu de qamu koego, ramu qamu rove iki patavolomo kaega.

² Ramu qamu rove bana ko qivae go remu komala Pilipae tarakenaqana go qimu ara garetue go Tesalonika, basoero ne iri vasakata qemu, mana seko sakata qamu go, do God remu iteke ne qemu nanao karaputa go timuna garetu sine vasadaka ne qamu ramu Tarama Velaka ia.

³ Pene remu de qamu koego ramu qimuki vakutama ze kaega go di poqe qamu ba va nanao sakata qamu, ba zazu tatakiu ne na kaki basoe go.

⁴ Kaega! Remu osina ṉalu qimu seko ne so pata i soko go God timuna sine go, tanego ia i mia vatora qemue remu timuna seko ne go Tarama Velaka dena. Remu qimuki soko kaega vakula na basoe, do qi soko vakula na God ia i mia mego pata ikoego loborona puṉu qemu.

⁵ Ramu qamu rove velake, remu qimu garetu go mi vagasi qamu ramu, go mi pala patapata ro raramu qimuki go kaega. Do God i rove me nanao ro ikoe loborona puṉu qemu.

⁶ Mana qimu ki zazu ne kaega kaki pata go mamu vazakazaka qemu remu, ba kakia basoe go.

⁷ Pata ogoto remu qimu apostolo ia Jesu Kristo. Iago itora qemu so pene qamue ramu kakia pata go tara tavisi nego too remu, ko remu de qamu koego ramu osina pata, qimu vamalumu ze so de qamu koe go ramu. Remu qimu gere so sinana sale i miasoka velaka qira go sale ro ia.

⁸ Tanego gi lete mamaligara ne qamu ramu, mana qi lete soko tavisi ne qemu go. Ia to go qimu soko go tarama ne qamu ramu Tarama Velaka ia God, mana qimu vanama napu ne so le ne na sauqamu ramu go.

⁹ Pata ogoto, ramu turaqemu, qamu nanao tarua de i gogo qemu zazu kuse mana musaqara, go timuniki va makuru qamue kaega ramu sauna pata gege, ṉalu remu qimu tamana ne qamue Tarama Velaka ia God.

¹⁰ Ramu qamu tarama ne qemu remu mana God i rove napua de i gogo vaogoto raramu i dalo mana i totoloṉo, mana ikaega napu kaki pata iara kebu go.

¹¹ Ramu qamu rove, remu qi tavisi velaka ne qamu, gerena so tamana sale i tavisi velaka ne sale ia.

¹² Remu qimu vakaraputa nanao qamu, mana qimu va momotono qamu, qi sine vakaraputa ne qamu muna lulua too velaka isoko go God, ni koru qamue go tamuna pala tavise de ikoego vari miasoka mana menomeno ia.

¹³ Mana kakia napu pata, remu qimu seko velaka ne za qe God osina ṉalu. Ṉalu qimu garetu sine vasadaka ne qamu go seko ia God. Mana pata ogoto sivala, God izazue loboro qamu ramu qamu vaogote go ia.

¹⁴ Turaqemu ro, pata isadaka qamu go ramu, isadaka napu qira so basoero na eklesia ia God iri koe go Judia, basoero ogoto ia Jesu Kristo, ria to basoero ramu so iri va vokara napu qamu go,

¹⁵ iri vae vale Jesu batu ne, mana propeta ro, mana iri va vokara napu qita go ita. Iri lete va muma God mana iri lete kana ne basoero ne go.

¹⁶ Mana iri lete pada ne to vamamanava qemue remu, za tamana qirae vano iriki Jiu go kaega Tarama Velaka ia God, go tina vakavele qirae go vatovato dena iri lama vakube taru ze to osina vasakata pata ro ria. Iago muna ia God i lama dokae to de iri koego.

Pol I Lete Soko Za Tove Napu Qira Vano Na Tesalonika

¹⁷ Turaqu ro, qa soko varove qamue ramu de igogo nanao qemu ṉalu qimu kasi ne qamu go. Tokama qemu so i kasi ne qamu go, do nanao remu iko tarue so de qamu koe go ramu. Iago remu qimu lete pada neto garetu mia napu qamu ramu.

¹⁸ Qimu lete soko to ule napu atu. Era Pol iki kameka so kaega ṉalu qa pada ne go garetu mia qamu ramu, do Satana tane i midiki ne go garetu qemu remu.

¹⁹ Do ramu to ikoego ruruqe, gasigasi ba nanao vakaraputa reremu sauna sine vasadake na karaputa reremu. Ṉalu tina lama napu go Batu ita Jesu Kristo. Tanego ramu napu to go tamuna ko tavisi go ṉalu nae.

²⁰ I pata ogoto sivala, ramu to timunara vazakanapu ne go remu, mana qi kula ne go!