Kameka Tesalonika 1 - Vato Vari Vakameka Voru Ia Batu Ne

¹ Era Pol, Saelas, mana Timoti, qimu karo ne qamu ramu vano lotu qamu koego Komala Tesalonika, qamu basoero ia God Tamana, mana Batu ita Jesu Kristo. Go Mana ia God ina teke ne qamu dalo mana mamaligara iago.

Too Mana Vaogoto Ria Vano Tesalonika

² Osina ṉalu qimu seko velaka ne ze God, mana qi nanaotaru qamue ramu pene ro remu.

³ Tanego tarakenaqana God Tamaqita, remu qimu nanaotarua de igogo qamu vazazua go vaogoto ramu mana de gogo qamu mamaligara ne zazu vokara ramu, mana de igogo ruruqe ramu ilete nadue go Batu ita Jesu Kristo.

⁴ Iago, turaquro, remu qimu rove God i mamaligara ne qamu, mana i vine bana qamu ramu tamuna basoero ia tanuna.

⁵ Tanego ṉalu remu qimu pala zatu go Tarama Velaka de qamu koego ramu, remu qimuki seko volomo kaega, do i lama palua karaputa ia Spirit tabo, iata go remu qimu vasadake to, ogotona qimu vaogote go Tarama Velaka nae, mana ṉalu remu qimu kotavisi qamu ramu, ramu qamu rove pataro qimu zazu ne go remu, i sauna to velaka gamu ramu.

⁶ Ṉalu ramu qamu lulua go vatovato reremu, qamu lulu napua so vatovato ia Batu ne, patavolomo qamu soba go vokara, do ramu qamu kula ṉalu qamu pala go Tarama Velaka iza reqeme go Spirit tabo.

⁷ Iago, ramu qamu vasadake va padapada velaka de iri koego vano vaogoto iri koego kena Masedonia, mana Akaia.

⁸ Tarama Velaka sauna Batu ita ne, ramu qamu vazazao lupo bana ze to kena Masedonia mana Akaia. Mana tarama na sauna vaogoto raramu, qamu vaogote go God, i zadava lupoe to osina dia. Iago rem i kaega kaki pata timunara sine napua go.

⁹ Tanego basoero dena iri sine lupo bana so ria osina pata i sadake go, ṉalu remu qimu lama tove qamu go ramu mana de igogo qamu vana ne go vazaka na beku ro ne mana qamu lama basoe zazu ia God, i too osina ṉalu topu ro ne.

¹⁰ Mana de go ramu qamu piri ne go lama napu na sale ia tina reqe mego rani ne. God i vatoo napu mego ia tepa le ne, mana Jesu to tina vakavele qitae go ita muna mana varitanae ia God kene ṉalu.