Kameka Pita 4 - Vato Vari Vakameka Voru Ia Batu Ne

Too Ria Vano Iri Vaogoto God

¹ Ṉalu Kristo ikoego pua dena i pala vokara tokamana, iago, ramu napu muna vakaraputa tanuqamu gerena nanao ia ni pala go. Tanego basoe iva vokare go tokamana tiniki lulua kaega vatovato ia vasakata pata.

² Iago, pasi ninidena too qamu vae go pua dena muna lulua, too ia God. Mana kasi luluna too ni soko go basoe na vudu pua dena.

³ Kokosona ne, qamu va riqo ze too ramu lulu na pataro iri zazu nego basoero iriki vaogoto go kaega, vano iri vari vagabu, iri soko go zazu ne na pata sakataro, iri poro ge loka, iri zazu ne kelo lavata ro, go iri ṉaṉa mana lete ge loka mana iri zazu ze pata sakata ro tarakenaqa qira basoero ne, mana iri vazaka qira beku ro go.

⁴ Mana torana dena vano rodoko iri lete poloso ne qamu ramu, tanego qamuki tavisi qirae kaega too piru mana too sakata iri zazu nego, iago ria iri seko sakata qamu.

⁵ Taramuzina ria tarinara sine vasadake too sakata ria tarakenaqana God, ia ni piri ne vari tanae ia de iri koego vano too mana vano le.

⁶ Basoero iri le bana go, iri gata bana Tarama Velaka ne. Ara too iri vaego iri pala kimata, mana iri le gere qira so osiqira basoero. Do pasi ninidena iri le bana to, iri mazala to pala na too de ikoego God tepa rani ne.

⁷ Osina pata ro i garogaro to tina lupo. Iago ramu muna miasoka va velaka qamu, mana ko vanamanama, mana pene taru osina ṉalu go.

⁸ Pata i lete lavata sivala go muna lete vari mamaligarae, tanego mamaligara to i mazala go vakuziki nena osina vasakata pataro ramu.

⁹ Vari kulae tanuqamu loborona komala ro ramu, mana kasi vari qorae go.

¹⁰ Nogoto qita qata pala soso adoado na sosovolomo ia God, iago mata soso velaka ne qira kero ne basoero sosovolomo velaka sivala qata pala ze go God.

¹¹ Basoe i tamana go mara tamana ne Tarama Velaka ia God. Basoe i tavisi ne qira basoero ne mara zazu ne ze karaputa ia God i teke nego, mana osina pataro ni zazu ne go mara vazaka ze God loborona Jesu Kristo, de ikoego ia tarina vazaka ze karaputa ia mana go tina doka go ka ṉalu gado kutona i kaega. Amen!

Vano Iri Vaogoto Go Tarina Vokara Gere Kristo

¹² Ramu turaquro, muniki poloso ne vokara tamuna pala go ninidena mana muniki nanao pataro dena tiniki doka qamu kaega go.

¹³ Do ramu muna kula qamu pala tavise go vokara ia Kristo, go ia ramu tamuna lete kula tavise ia, ṉalu tina sadaka mego karaputa lavata ia God.

¹⁴ Muna kula ṉalu basoero iri seko vasakata qamu, tanego ramu qamu lulua vatovato ia Kristo, tanego ramu qamu rove Spirit ia Batu ne ilete karaputa, i ko taru e de qamu koego.

¹⁵ Do iki velaka kaega ṉalu kakia ramu i pala vokara, tanego ivae vale basoe, ba i siko, ba i basoe i vaevae tamana, ba i sukita, ba i zae de iri koego basoero ne mana i vasakate patapataro ria go.

¹⁶ Do ṉalu qamu pala vokara tanego qamu lulua Kristo, ianae muniki agava ne, do muna seko velaka zaqe God, tanego qamu lulua Kristo.

¹⁷ Ṉalu ia God tina varitanae go, i lama to mana basoero tarina koego varitanae kenaqa ia God, ita to basoero ia tanuna. Ṉalu God tina varitanae kenaqa ne qamu go, ava tina goto basoero iriki vaogote go kaega Tarama Velaka ia ne.

¹⁸ Pata i sine go Buka tabo ne, igo dena, ‘Iki pata malumu kaega vano totoloṉo tarina kavele, iago, avana to tina doka qira go vano iriki vaogote go kaega God, mana iri koego so too sakata igogo ne?”

¹⁹ Sauna to ianae basoero ia God i mao ne qira tarina vokara, mana ria mara pala taru vanadua vatovato velaka na ruruqe ria, mana valupo ze to karisina God niva nadua go pui ro ia.