Kameka Korinti 9 - Vato Vari Vakameka Voru Ia Batu Ne

Karaputa Na Zazu Ria Apostoloro

¹ Avigo era qaki basoe ko talupasa kaega? Avigo qaki apostolo kaega? Avigo qaki miasoba kaega Jesu Batu ita? Avigo iki urena kaega zazu era tane ramu qamu vaogote Batu ne?

² Patavolomo kakiaro basoero iriki toqe ne kaega era qa apostolo, do ramu qamu toqe ne! Tanego sauna to too ramu qamu kameka ego de koe Batu ne, ramu tanuqamu to qamu vasadake era qa apostolo go.

³ Ṉalu basoero iri seko vasakata va, era qa degere nava tanuqu mana iato dena seko qa vataule ne qirae go.

⁴ “Avigo iki totoloṉo kaega tarina teke nava pata gege mana besi loborona zazu era?

⁵ Avigo iki totoloṉo kaega era tu lulua qole era gere qira kero ne apostoloro, mana vakitaka ro ia Batu ne, mana Pita, iri lulua qole ro ria loborona zaza ria?

⁶ Ba, raru Banabasi so taruna zazu tanuquru go taruna paia pata i tora go taruna too ne?”

⁷ Avigo kaki valeke varitara i volia so tanuna pata gege ia, ṉalu topu ria vano varitara iri kameka teṉo go? Avigo ṉalu basoe i zazu ne barue ia iki ge kaega urena pata lebaleba i koego barua ia? Avigo basoe miasoka sipi iki ge kaega miliki na sipi ia?

⁸ Era qaki lulua kaega nanao na basoero sauna pataro dena, tanego Tamana ia Mosese i sine napua so kameka pata de.

⁹ Qata toere ze go Tamana ia Mosese, i sine napua so, igo, “Kasi poṉo na saqe na buluka ne ṉalu qamu vakube poka ze go vuiti ne.” Avigo pata qaraqara dena tane i lete nanao vamazale go God?

¹⁰ Avigo i voto qita ita tane pataro i sine go nae? Ogoto na i voto qita ita pataro i karo go dena, basoe i leba mana basoe i vae pata gege ṉalu i velaka go, nogoto qiru tiruna zazu ne zazu riru, go tiruna pala go kena kena riru patana barue ne.

¹¹ Remu qi leba ze loboro qamu ramu paturu na too basoe Lotu, iago itora ramu tamuna teke qemu pataro go tina tavisi ne tokama qemu.

¹² Ṉalu kakiaro basoero iri nanao pala ze kakia pata de qamu koego, remu i tora napua so timuna pala go. Do remu qiki va zazua kaega karaputa igogo ne, ba iane, patavolomo osina pata i makuru qemu, remu qiki va kapata kaega, tanego qiki soko kaega kaki pata na koku ne go Tarama Velaka na dego Kristo.

¹³ Ramu qamu rove bana, basoero iri zazu ego Pade Lotu, iri pala ze pata gege ria loborona Pade Lotu ne, mana ria iri komakoma ne sosovolomo ria sara ne, iri pala ze pata gege ria takoboro na pata iri komakoma nego.

¹⁴ Gere napua so Batu ne i vine bana qira ria iri tarama ne tarama velaka ne, tarina pala pata go iri mazala go too ne go.

¹⁵ Do patavolomo igogo nae, era qaki pala so kaega kaki pata. Era qa karo ne qamu go na pala qamue ramu kaki pata qaki go kaega. I tora era tu le kenaqa! Go mara kaega ka basoe i mazala go kavale na zazu era qa kula ne go.

¹⁶ Zazu era, qa tarama ne go Tarama Velaka dena, iki pata na kaega go tuna vazakanapu ne. Zazu dena, era tuna zazu bana ne so. Ba ṉalu tuniki tarama ne kaega Tarama Velaka dena, ianae i lete vasareki sivala ava era.

¹⁷ Do ṉalu tanuqu tu vine go zazu dena, era tuna pala voli qu, do era qaki vine kaega na pala voli. Qa toqe ne zazu dena, tanego qa zazu neso pata i sine nava God na zazu ne go.

¹⁸ Iago ava vol na tane qa pala zego era na? Voli igogo ne era qa tarama volomo neso Tarama Velaka ne, qaki pene kaega kaki pata sauna mazala go qa tarama nego Tarama Velaka dena.

¹⁹ Era Pol qa basoe ko talukasa, qaki seka ia kaega ka basoe, do qa basoe seka ria to osiqira basoero, go tuna mazala go tavisi ne qira go tarina vaogote go Kristo.

²⁰ Torana ṉalu qa zazue go de iri koego vano Jiu, qa ko gere qira so vano Jiu, go na tavisi qira go tarina vaogote go Batu ne. Patavolomo qaki lulua kaega Tamana ia Mosese, torana qa zazue de iri koego vano iri lulua go Tamana, era qa ko gere qira so vano Jiu go na tavisi qira go tarina vaogote go Batu ne.

²¹ Ivari pada so ṉalu qa zazue go de iri koego vano iriki Jiu go kaega, era qa gere qira vano iriki Jiu go kaega, qaki lulua kaega Tamana. Qa zazu ne iago, go na tavisi ne qira vano iriki Jiu go kaega tarina vaogote Kristo. Patavolomo nae, era qaki vasakate kaega Tamana ia God, tanego era qa lulua Tamana ia Kristo.

²² Torana ṉalu qa ko tavisi qira go vano i pela go vaogoto ria de i koe Kristo, era qa pela napu, go tuna tavisi ne qira, go vaogoto ria tina karaputa. Iago qa lulua so de iri gogo basoero ne, qa pada ne topu na zuka go ma tavisi ne qira kakiaro basoero, go tarina pala too ogoto.

²³ Osina pataro dena, era qa zazu ne tanego i sauna vazadave na Tarama Velaka ne, go era do tuna pala tavise ure velaka na zazu velaka dena.

²⁴ Ramu qamu rove bana, topu basoero iri mazala go teteṉe ṉalu na varivose, do kameka so basoe tina pala go voli, tanego i doka kenaqa, iago osiqamu basoero muna teteṉe va velaka, go tamuna pala go voli qamu.

²⁵ Osiqira vano iri teteṉe go, tarina vanama mana tarina lulua tamana makuru ro iri vanama ne qira go, tarina pala voli qira, voli igogo ne iki ko vaumata kaega, do ita to qata teteṉe go, go tatana pala voli qita, voli dena, iko sivala, ki rove kaega lupo.

²⁶ Iato go, era qa teteṉe totoloṉo za so de ikoego lala ne. Qa gere napua valeke vari dupo, iki vale qiso ne kaega.

²⁷ Qa dupo tarua so tokamaqu, gogo tuna valulu ze de qa soko go tanuqu, go tina vaogoto ava era. Tanego ṉalu tuna koru qira kero ne basoero tarina lama tavisi go varivose dena, mara kasi lama sine na, “Era qa vae tamana na varivose ne,” mana vakuziki navae varivose dena.