Kameka Korinti 7 - Vato Vari Vakameka Voru Ia Batu Ne

Tana Dego Zazao Na Busi

¹ Ninidena era qa soko vataule na tana qamu karo me ze go leta era, qamu go dena, valeke i tora mara kasi busi.

² Do tanego topu sakata, vari vagabu mana too sakata, i tora bana so osina valeke ro tina ko bana so qolero ria mana osiqira qolero tina ko bana so valeke ro ria.

³ Valeke busi tina kamuku tavise qole ia, mana qole busi tina kamuku tavise valeke ia, go mara totoloṉo nanao qiru.

⁴ Qole busi nae iki batu ne kaega tokamana tanuna, do valeke ia ni batu ne go, i gere napua so valeke busi nae iki batu ne kaega tokamana tanuna, do qole ia ni batu ne go.

⁵ Ramu qamu vano busi, kasi va makuru na tokama qaburu, ṉalu kakia i va kaega tokamana, go mara pepene igogo ne, i velaka so, taramuzina nae qaburu mazala kameka kamuku napu. Ṉalu tamuna zazu ne to iadena, ramu tamuna vasivala ne pada ro ia Satana, tanego qaburu ki karaputa kaega, niki go velaka raburu za kuziki.

⁶ Seko qa sine go dena iki tamana kaega, do nanao era so qa soso ne qamu go tina tavisi ne qamu.

⁷ Nanao era ne, qa soko ramu muna ko gere ava era, do nogoto qita i ko qita sosovolomo kakavata i teke qita go God.

⁸ De qamu koego ramu valeke ro qamuki busi go kaega, mana qolero nanaro go, masine ne qamu, itora mamu goso nae gerena so de qa gogo era, qa koso tanuqu.

⁹ Do ṉalu i makuru qamu go va noto na vari sokoe ramu, i velaka so, muna busi, i lete velaka sivala tamuna busi, go tina vanoto go nanao qamu ni lete soko go qole.

¹⁰ Ma sine ne qamu ramu qamu busi go, era i ko nava tamana, iki reqe me kaega tanuqu do i reqe me de koe Batu ne, igo qole busi tiniki kasi ne kaega valeke ia,

¹¹ do ṉalu qole busi i vaule valeke ia, qole nae tina ko so tanuna, ba mara ule mana za vakameka napu ne valeke ia. Mana valeke ne tiniki vaule kaega qole ia go.

¹² Mana de qamu koego ramu kerone basoero, ṉalu kaki valeke lotu i ko qole ia mana iki qole lotu kaega, do i toqe ne kotavisi na ia, valeke nae niki vaule qole nae.

¹³ Mana ṉalu kaki qole lotu i busia kaki valeke lotu kaega mana i toqe ne ko tavisi na ia, qole nae niki vaule valeke nae.

¹⁴ Tanego ka valeke busi i vakameka ne qole ia, God i toqe ne ia, patavolomo iki vaogote kaega Kristo. Taraki go kaega, salero riru tara gere qira salero iri koego rodoko, do God i toqe ne pala va gere qirae salero la.

¹⁵ Do ṉalu kaki valeke busi ba qole busi iki vaogote kaega Kristo i soko vaule na valeke ba qole ia, vamao ne ia. Ṉalu i gogo nae basoe lotu dena i mazala so ko talupase tepa ia busi, tanego God i koru bana qamu muna koe loborona bule.

¹⁶ Qole busi avana tono tavisi ne ze go valeke aro go tina basoe lotu go, qo rove ba kaega? Ba aro valeke busi avana tono tavisi ne zego qole aro go tina basoe lotu, qo rove ba kaega?

Muna Ko Gere So God I Koru Qamu

¹⁷ Nogotona basoe mara koe too na sosovolomo i teke go Batu ne, mara ko gere so de igo bana ṉalu God ni koru ago. Tamana dena to qa vatatana qirae go era basoero na eklesia ro ne.

¹⁸ Ṉalu valeke i kosi bana go, mana i toqe ne koru ia God, valeke nae mara kasi pada ne vakuziki na lala na kosi ia. Ṉalu ka valeke iki kosi go kaega, do i toqe ne koru ia God, ia mara kasi kosi.

¹⁹ Tanego valeke i kosi ba, iki kosi kaega i patavolomo so, pata ni lete mazala go, vaogote na tamana ia God.

²⁰ Nogotona basoe mara ko gere so de igo bana go, ṉalu ni toqe ne koru ia God.

²¹ Avigo go valeke seka, ṉalu God i koru go? Patavolomo nae, oniki maqata ne, do ṉalu qo soba ka zuka go qo mazala ko talupasa, pada ne vazazu na.

²² Tanego ṉalu Batu ne i korua kaki seka, basoe nae i basoe talupasa ia Batu ne. Gere napua so basoe ko talupasa i korua go Kristo, ianae i basoe seka ia Kristo.

²³ God i voli lupo bana qamu, iago kasi vamao ne qira basoero go mara va seka qamu.

²⁴ Vakitaka ro era, nogoto qamu muna ko varikitakie de koe God, muna ko gere so de qamu gogo ni koru bana qamu go God.

Tana De Iri Koego Vano Iriki Busi Go Kaega Mana Vano Nanaro

²⁵ Aria sauna pata qamu karo go, sauqira vano iriki busi go kaega. Batu ne iki teke nava kaega ka tamana, do era qa mazala sine zatu nanao era tanuqu, gere na ramu qamu mazala vaogote na loborona vari vatatavisi ia Batu ne.

²⁶ Torana ṉalu ro dena i ṉalu makuru, iago era qa nanao basoero mara ko gere so de iri gogo.

²⁷ Ramu qamu busi bana go, iki velaka kaega tamuna kasi ne basoero ramu mana vasakate busi ramu go. Ramu qamu ara kaebo go busi. Kasi ara taqi na qole go tamuna busia go.

²⁸ Do ṉalu qo busi, qoki vasakata pata kaega, mana kaki qole suka i busi, iki vasakata pata kaega. Do vano busi tarina soba topu pata vari va riqo ro loborona vudu pua dena, iago era qaki soko kaega pata dena na dokae de qamu koego.

²⁹ Vakitaka ro era, iato dena talupasana pata qa sine go, ṉalu iara ko go, iki loda to kaega, mana ninidena valeke ro busi, mara ria ko gere iriki busi go kaega,

³⁰ ria iri dae go, mara ko, gere iriki maqata go kaega, ria iri kari go, mara ko gere iriki kula go kaega, ria iri volia go patapata, mara gere iriki toṉove kaega pata iri volia go,

³¹ ria iri vazazua go patana ro pua dena, mara ko gere iriki riqo ne kaega. Tanego kolabana pua qamu mia go dena tiniki ko vaumata kaega.

³² Era qa soko muniki nanao vokara ne pata topu. Valeke iki busi go kaega, mara nanao vokara ne zazu ia Batu ne, tanego i soko va kula na God.

³³ Do valeke busi i poro nanao so patana vudu pua dena, tanego i soko so vakula na qole ia,

³⁴ iago nanao na i tavota. Qole nanaro ba qole suka i nanao vokara ne zazu ia Batu ne, tanego i soko va tabo na tokamana mana madau na tanuna. Do qole busi i poro nanao so patana vudu pua dena, tanego i soko so vakula na valeke ia.

³⁵ Qaki soko kaega va makuru qamue kaki pata, do era qa soko tavisi ne qamu, mana qa soko muna zazu ne pata i velaka mana totoloṉo, muna teke too ramu zazu ne na zazu ia Batu ne, kasi pika na napu na kaki pata go.

³⁶ Ṉalu valeke mana qole iru tamatura, go tiruna busi, do iruki soko napua kaega busi gogo ne, i velaka so. Do ṉalu valeke ne i nanao ule mana i rove pata i zazu ne iki totoloṉo kaega, mana i lete soko mara busia qole ne igo, i velaka iru mazala busi, ianae iki kebu kaega.

³⁷ Do ṉalu valeke i vanadu nanao na igo tiniki busi kaega mana i va nadu ze nanao na pata i zazu ne i velaka so, mara kasi busi na qole nae.

³⁸ Iago valeke i busi ago tamatura ia i velaka to nae, do valeke iki busia go kaega, i zazu ne pata ilete velaka sivala.

³⁹ Qole busi iki ko talupasa kaega ṉalu valeke ia iara too, do ṉalu valeke ia i le, ṉalu nae to qole ne iara ko talupasa, i mazala to busi na ka valeke i soko go, do ṉalu go valeke voru nae i basoe lotu.

⁴⁰ Do nanao era tanuqu, qole nae tina ko kula, ṉalu tara kasi busi napu go. Qa nanao, Spirit ia God i koe dega koego era tane i teke nava go nanao nae.