Kameka Korinti 5 - Vato Vari Vakameka Voru Ia Batu Ne

Zazu Sakata Ro Loborona Eklesia

¹ Aria era qa gata kaki kameka basoe i koe de qamu koego, i zazu ne too vari vagabu, patavolomo vano iriki vaogote go kaega God do, iri agava ne zazu too vari vagabu igogo ne. Era qa gata basoe ni gogo ne i poro kamuku tavise qole muzi ia tamana.

² Igo nae ia, avigo tane qamu vazaka napu go? Ramu i tora tamuna maqata ne pata igogo ne, mana itora tamuna kakale basoe nae, mara kasi ko tavisi qamu loborona koko ramu.

³ Patavolomo era qako va laqalaqa, do nanao era i ko tavisi qamu. Era ne i gere so pata qa kotavisi qamu ramu, mana qa vine vakakavata bana era tane basoe nae i zazu ne pata sakata nigogo ne.

⁴ Loborona vitoṉo na Batu ita Jesu Kristo, era qa vine bana too ia basoe ni zazu nego too sakata igogo ne. Ṉalu tamuna kameka teṉo go, nanao era tina lama ko tavisi qamue loborona karaputa i teke qita go Jesu Kristo.

⁵ Ramu muna vazao ze basoe nae loborona karaputa ia Satana go mara vasakate tokamana, do God tina vakavele madau na valeke nae ṉalu musaqara muzimuzi.

⁶ Iki tora kaega ramu tamuna vazaka napu! Qamu rove seko vapadapada igo, “Desuka so isti iva keba go palava robe ne”.

⁷ Iago muna vanaqe isti bana na vasakata pata, go tamuna voru vavelaka, ṉalu nae ramu tamuna gere palava robe voru i kaega go isti na. Pata ogoto, ramu qamu dalo bana, tanego God i komakoma bana ne Kristo ia to tunana Sipi na ṉaṉa zaza sivala ne.

⁸ Ita mata teṉo mana mata kula ne kelo na ṉaṉa zaza sivala do mata kasi gere na bureri bana ikoego isiti na vasakata pata mana too memelaka ro, do ita mata gere bureri i kaega go isti na, bureri i dalo mana ogoto go.

⁹ Loborona leta qa karo bana zatu go, era qa sine qamu muniki va kameka ne qira basoero iri vari vagabu go.

¹⁰ Qaki va pala qirae kaega vano rodoko iri vari vagabu, iri soko pala na topu na pataro, iri sikosiko iri vazaka qira beku ro. Do ṉalu ramu qamu soko vasivala ne pataro dena, tamuna kasi neto vudu pua dena.

¹¹ Talupasa na seko era igo dena, kasi va kameka ne na basoe igo, tanuna i basoe lotu, do ia i zazu ne too vari vagabu ba soko na topuna pata, ba i vazaka qira beku ro, ba i pepeu vasakata qira kero ne basoero ba i poro ge loka vari vabulaṉoe mana sikosiko gogo ne, kasi ara koloku tavisi na ṉalu qamu ṉaṉa go basoe nae.

^12-13 De go toere na too ria vano iriki vaogoto go kaega ne, iki zazu era kaega. God so tina vine qira go. Do ramu tanuqamu muna toere qira go basoero lotu qamu vakitaka qira go. Gere Buka tabo ne i sine, “Muna kakale vakuziki ne basoe sakata ikoego loborona koko ramu.”