Kameka Korinti 4 - Vato Vari Vakameka Voru Ia Batu Ne

Apostoloro Ia Kristo

¹ Ramu muna nanao rove remu qi vano zazu ia Kristo, qi sine vasadake seko ogoto ia God iki sadaka bana go kaega.

² Basoe zazu ne, ia tina zazu velaka ne zazu iri va miasoka ze go mana tina osaka ne batu ia go.

³ Ṉalu ramu, ba kakia basoe i toere go too era, ianae qa va patavolomo so, tanego tanuqu do qara kaebo toere na too era.

⁴ Era qaki basoe totoloṉo kaega, patavolomo nanao era i sagamana, Batu ne so tinara toere too era.

⁵ Iago muniki toere too ia basoe, tanego ṉalu na varitanae iara kaebo lama doka. Ṉalu musaqara na varitanae, tina piri ne so lama na Batu ne, tina pala vasadaka ze tatavata pataro i ko pipika ego nanao qira basoero ne. Mana God tina va zakazaka qira basoero, vatora ze de go too ria.

⁶ Vakitaka ro era, seko dena qa va pala qarue raru Apolosi, qa vapadapada ze zazu raru, go tamuna nanao rove zazao na seko dena, “Lulua pata i sine go Buka tabo ne,” iago kaega kakia ramu tina seko vazaka kene basoe mana va qoqore kene basoe go.

⁷ Akena tane i vine qamu ramu, qamu mazala sivala qira kero ne basoero ne na? Osina pata qamu toṉove go nae, God so i teke ne qamu. Iago avigo tane qamu vazakanapu nego, i gere pata qamu vazaria go tanuqamu.

⁸ Avigo qamu pala lupo osina pata qamu soko go? Avigo qamu vavagado to? Avigo qamu sivala qemu remu mana qamu batu lavata to? Era qa soko ramu tamuna batu lavata, go remu napu mi batu lavata mana ko tavisi napu qamu ramu go.

⁹ Do mimia qu era, God i teke qemu remu apostoloro de koko muzimuzi, qi gere basoe iri toqene mara vae vale qemue tarakenaqana mataqira basoero na vudu pua dena, mana aqelo ro iri mia vaqoqoro qemu go.

¹⁰ Tanego i sauna Kristo, basoero iri nanao remu qi vano bulaṉoe, do loborona vari vakameka de i koe Kristo ramu qamu pala tarove. Remu qi pela, do ramu qamu karaputa! Basoero ne iri mia vazakazaka qamu, do remu basoero iri mia vaqoqoro qemu.

¹¹ Go ilama dokae to ninidena remu qi saqo mana qi kaṉoso, qi vakeba ne so poga taridaka ro, iri sima qemu, mana i kaega ne qemu ka komala go.

¹² Remu qi lete zazu vokara loboro ko remu, ṉalu basoero iri damu qemu, remu qi manava ne qira. Ṉalu iri vasasakata ne qemu, remu qi toqe ne qira so,

¹³ mana ṉalu iri seko vasakata qemu, remu qi vataule ne qira so seko velaka. Remu qi gere gazogazo ria basoero ne, qi gere to pata i lete sakata sivale go vudu pua dena.

¹⁴ Era qaki soko kaega va agava qamu ramu, karo qavae zatu go seko ro dena, do qa soko vatarove qamu ramu, gere so de tu vane qira go salero ogoto era.

¹⁵ Patavolomo tara ko ne qamu manoga mau basoe tara vatatana qamue too ia Kristo, kameka so basoe i gere go tamaqamu. Tanego loborona too ramu qamu vakameka ne Jesu Kristo, era to qa tamaqamu go, tanego era to qa pala kenaqa zatue de qamu koe go ramu Tarama Velaka.

¹⁶ Iago era qa lete pene qamu ramu, inuna lulua de qa gogo era.

¹⁷ Iato go era qa turi ne zatu go Timoti, ia i sale velaka era i zazu velaka sivala ne zazu ia Batu ne, ia tina vananao taru qamue ramu tamana ro qa lulua go era, loborona too voru ni vari vakameka e dekoe Jesu Kristo, mana iato qa vari vatatana ne era, de iri koego basoero na eklesia iri koego osina dia.

¹⁸ Kavia ro ramu qamu vazaka napu, qamu nanao era tuniki garetu tove qamu kaega.

¹⁹ Do ṉalu Batu ne tina vamao, tiniki umata kaega era tuna garetu mia qamu. Ṉalu nae to era tunara mia rove karaputa, iri vazaka napu ne go do iki pata iri sine go so kaega.

²⁰ Tanego Too ikoego vari miasoka ia God, iki koe kaega seko volomo, do i koe karaputa.

²¹ Adeke qamu soko go, na garetu sima qamu? Ba vamia qamue ramu mamaligara era, mana tavisi ne qamu ramu go tamuna ko velaka go?