Kameka Korinti 2 - Vato Vari Vakameka Voru Ia Batu Ne

Tararna Na Kristo Ni Lego Koluse Ne

¹ Vakitaka ro era, ṉalu qa lama ego de qamu koego ramu go tuna sine vasadake go ogoto ia God ni ko pupuika go, era qaki vazazua kaega seko lavata ro ba tarove lavata ro.

² Tanego torana ko tavisi qa vae qamu go, era qa nanao kasupe ne osina pata, do qa taru ze so nanaoqu de ikoego Jesu Kristo i le go koluse ne.

³ Tanego ṉalu qa lamae de qamu koego, era qa lete pela mana qa nenedere tanego qa lete sareki.

⁴ Vari vatatana mana tarama ro era, qaki gere kaega vari vatatana ia basoe tarove, do loborona zazu era, i vasadake zazu ia Spirit ia God.

⁵ Vaogoto ramu iki nadue kaega tarove na pua dena, do i koeso karaputa ia God.

Tarove Ia God

⁶ I ogoto era qa tarama ne tarove de iri koego vano iri kazigarata go mana i karaputa go vaogoto ria. Do iki tarove na kaega kolabana pua dena, ba tarove ria vano iri kenaqa ne go kolobana pua dena, batu ro nae karaputa ria tina i za qoqoro so.

⁷ Tarove qa tarama ne era i tarove ia God ni ko vapipika go, i ko pipika ne qira basoero. Do tarakenaqa na God iara kaebo vazari na kolabana pua ne, seko tarove ia dena i taru bana ne qita so, iato zuka nigogo ne qata mazala go doke na de koe God tepa rani ne.

⁸ Kaega kaki ria vano kenakenaqana kolabana pua dena, iri rove go tarove dena. Ṉalu go tara ria rove go, ria tariki paqipaqi ze kaega koluse Batu na rani ne.

⁹ Patavolomo nae, Buka tabo ne igo, “Pata iki mia kaega basoe ba iki gata bana kaega gogo ne, iato pataro i vanama go God sauqira vano iri mamaligara nego.”

¹⁰ Seko dena to i ko pipika go, do loborona zazu ia Spirit ia God i vamia qemue remu, Ove to Spirit i mazala miana pataro i pupuika ego tanuna God.

¹¹ Gere na kaki basoe, spirit ia tanuna i koe loborona ia, i rove too, nanao, mana vatovato ia tanuna go, gere na so Spirit ia God i rove go, too, nanao, vatovato ia God.

¹² Ita qatiki pala kaega Spirit na pua dena, do ita qata pala Spirit i turi ne me God, go tatana rove osina pataro i teke ne qita go God.

¹³ Iago remu qiki seko ne kaega tarove iri vari vatatana ne basoero na pua dena, do seko qi vari vatatana ne remu qi sine vatatavata de go Spirit tabo, de iri koego basoero iri pala bana go Spirit tabo.

¹⁴ Ka basoe iki toṉove go kaega Spirit tabo, i makuru tina pala go sosovolomo ia Spirit ia God. Basoe igogo nae, iki rove bana so kaega kapata mana iki nanao rove napua so kaega Spirit tabo go. Tanego Spirit tabo nae to tina mazala go tavisi ne qita go ita, go tatana mia rove go sosovolomo ro ia.

¹⁵ Basoe i ko ne Spirit, i mazala mia rove na mazala na topu na pata do, kaega ka basoe i mazala vine na basoe nae.

¹⁶ Gerena Buka tabo ne i sine, “Akena i rove nanao na God?” “Akana i mazala teke ne nanao ba vari vatatana ia sauna pata tina zazu ne ia?” Do ita qata pala nanao ia Kristo.