Kameka Korinti 16 - Vato Vari Vakameka Voru Ia Batu Ne

Sosovolomo Ria Vano Vaogoto

¹ Era qa soko sine lupasa ne Av qamu sauna kesa go tina tavisi qira ego basoero ia God iri koe go Judia. Ramu muna zazu ne so gerena pata qa sine ne qira go era vano lotu iri koego Qalesia.

² Osina Sade nogoto qamu muna taru vakakavata bana so kakia kesa, gerena napu so osina to kesa qamu pala ze go loborona zazu ramu, mana muna sotia kesa nae go tamuniki ara soqe kesa napu kaega ṉalu tuna garetu go era.

³ Ṉalu tuna garetu doka go, era tuna teke ne qira leta basoero qamu vine qira go, go basoero lotu iri koego Jerusalema tarina rove, era tane qa turine qira go iri pala zatu go sosovolomo nae.

⁴ Ṉalu qa nanao napua go era zaza ne, ria iri mazala to luluava era.

⁵ Era tuna go za kena Masedonia, iago taramuzina tuna go za to Masedonia, tunara garetue de qamu koego.

⁶ Kadego tuna garetu ko vaumata e de qamu koego, ramu go za doka to ṉalu lolomu ne, mana taramuzina nae qamu mazala to tavisi navae loborona zaza era, mana de tuna zaza go za go.

⁷ Muna rove, era qaki soko kaega tuna garetu mia qamu so mana zaza katikili napu go. Nanaoqu era ṉalu tara vamao go Batu ne, era tu garetu ko vaumata e de qamu koego.

⁸ Era tuna koe tekere Epesus go doka so ṉalu musaqara na Pentikoste.

⁹ Tanego siporaṉa na ro zazu i papaqa nava, topu zazu lavata ro qa mazala zazu ne, go do topu napu kana ro iri ko napu.

¹⁰ Ṉalu Timoti tina lamae de qamu koego, muna vagado velaka ze de qamu koego, tanego Timoti i zazu napu neso zazu ia Batu ne, i gere napu ava so era.

¹¹ Kaega kakia basoe mara mia vaqoqore ia, do muna tavisi ne ia, go tina pala sema go zazu ia loborona bule, go tinara ule napu me de qa koego era, tanego qa nanao ia tina lulu qira me vakitaka ro ita vano lotu.

¹² Aria sauna vakitaka ita Apolosi. Era qa poro sine ne ia tina garetu tove qamu, na lulu qira atu kero ne vano lotu qa vane, do Apolosi iki garetu so kaega tanego nanao na iara kaebo so soko na. Do ṉalu tina toqe me nanao na mana ko ne ṉalu gogo ne, ia tinara garetu.

Seko Valupolupona

¹³ Vanama taru, degere vanadue loborona vaogoto ramu, ko vakaraputa mana moqere go.

¹⁴ Osina zazu qamu zazu ne, muna zazu ne ze loborona mamaligara.

¹⁵ Ramu qamu rove bana qira tatamanaro Stepanasi, ria to iri toqe kenaqa ne vaogoto na Jesu tepa kena Akaia, mana iri teke too ria sauna zazu de iri koego basoero ia God.

¹⁶ Qa pene qamu vakitaka ro era, muna lulua vatovato velaka iri zazu ne go basoero gere qira ria de, mana basoero iri zazu tavisi qira go.

¹⁷ Era qa kula ṉalu Stepanasi, Potunatasi mana Akaikusi iri lama doka go, iri lama doka ṉalu ramu qamuki lama kotavisi ava kaega,

¹⁸ iri lama vakula ava era, gere na so de go iri vakula qamu go ramu. Basoero igogo nae itora mata seko velaka mana va mazala qira go.

¹⁹ Basoero lotu iri koego kena Esia iri vagaretua seko kula ria. Akuila mana Prisila mana vano lotu iri poro teṉo taru ego pade riru iri vagaretua seko kula ria, iri seko kula e de qamu koego ramu loborona vitoṉona Batu ne.

²⁰ Osiqira vano vaogoto iri koego dena, iri vagaretua seko kula ria go. Vari kulae napu tanuqamu loborona bule.

²¹ Era Pol, qa karo ze karisiqu tanuqu seko dena, kula era ikoe deqamu koego.

²² Ka basoe iki mamaligara ne kaega Batu ne—basoe nae i pala tulaṉa ia Batu ne. “Maranata”— Lama, Batu remu!

²³ Mana, ia Batu ita Jesu ina ko tavisi qamu.

²⁴ Loborona Jesu Kristo, mamaligara era na koe de qamu koego ramu.