Kameka Korinti 12 - Vato Vari Vakameka Voru Ia Batu Ne

Sosovolomo Ro Ia Spirit Tabo

¹ Ninidena qa soko pepeu zatu sauna pata qamu tana bana nego, de igogo sosovolomo ro ia Spirit tabo. Vakitaka ro era, qa soko ramu tamuna rove ogote de go zazao na.

² Qamu rove, ara ko qamu vaego rodoko, qamuki vaogote go kaega God, topu pata sakata i toqo variro qamu, mana qamu lulua god poqepoqe ro i kaega ne qira go too.

³ Sauna to pataro dena, era qa soko sine ne qamu, kaega ka basoe i kenaqa nego go Spirit tabo, i mazala sine na “Jesu i uzaka so.” Mana kaega napu ka basoe i mazala sine na, “Jesu i Batu ita ṉalu Spirit tabo iki kenaqa ne kaega ia.”

⁴ Topu soso gadogado na sosovolomo ia i koe de qata koego, do kameka so Spirit tabo ia God i teke ne qita go.

⁵ Topu na soso gadogado na zazu qata mazala zazu ne, do kameka so Batu qata zazu ne.

⁶ Topu na soso gadogado na roverove dego qata mazala vazazu zena zazu ro ita, do kameka so God i teke qita go tarove, de go qata mazala go vazazu ze na zazu ro ita.

⁷ Spirit tabo i vasadaka ze karaputa ia de qata koego osiqita, go ita qata mazala tavisi ne qira kero ne basoero.

⁸ Kameka Spirit tabo dena so i teke ne qira basoero seko ro i purake tarove mana i teke napu ne qira kero ne basoero seko ro i purake pata vari va rove go.

⁹ Kameka so Spirit tabo i teke ne go vaogoto kaki basoe, mana kene basoe i teke ne karaputa na vari vole, go na va velaka qira vano iri mokoso go.

¹⁰ De koe kaki basoe, Spirit tabo i teke ne karaputa go tina zazu ne zazu vari vapoloso. Kene basoe i teke ne karaputa go tina sine vasadake tarama ia God, kene basoe i teke karaputa go i mazala mia rove na sosovolomo ro ia spirit velaka ba spirit sakata go. Kene basoe napu i teke karaputa go i mazala seko ne seko kakavata ro. Kene basoe napu i teke ne karaputa go i mazala sine lukase na seko ro igogo ne.

¹¹ Do kameka so Spirit tabo i zazu ne osina pataro dena, i valulu ze so de i soko go tanuna. I soso ne nogotona karaputa mazala ro dena de qata koego ita.

Kameka Tokama Topu Takoborona

¹² Kristo i gere kameka tokama, do i topu soso takoborona, Patavolomo i topu soso takoboro na, do iara kameka tokama so.

¹³ Varipada na so osiqita, vano Jiu, ba vano iriki Jiu go kaega, vano seka, ba vano iri ko talupasa, osiqita qata bapitema bana e kameka tokama loborona kameka Spirit tabo. Mana Spirit tabo dena to i va karaputa go too ita.

¹⁴ Tanego tokama na basoe ki kameka so kaega takoboro na, do i topu soso takoboro na.

¹⁵ Nalu make tara go, “Tanego era qaki karisi kaega, iago era qaki takoboro na kaega tokama,” patavolomo nae make i ara soma tarua so tokama ne,

¹⁶ mana ṉalu qeqele tara go, “Tanego era qaki mata kaega, iago era qaki takoborona kaega tokama.” Patavolomo nae, qeqele iara soma tarua so tokama ne.

¹⁷ Ṉalu tokamana basoe tara mata lupo so, avigo tina gata pata go? Mana ṉalu go i miki qeqele, avigo tina nonolia go pataro.

¹⁸ Iki go kaega nae, God i soso taru ne takoboro na tokama ne, gere so de i soko go tanuna.

¹⁹ Ṉalu osina takoboro na tokama ne, i kameka pata so, i makuru tina zari tokama na basoe.

²⁰ Do ki go kaega nae, tanego topu soso takoborona tokama iara va zaria go kameka tokama ne.

²¹ Iago mata i makuru tina sine ne karisi. “Era qaki soko go kaega aro!” Ba kuzuku tina sine ne make, “Velaka! Era qaki soko go kaega aro.”

²² Kaega nae! Soso takoborona tokama qita qata nanao go i kaega ne karaputa, iato qata lete soko go ita.

²³ Mana takoborona tokama qita qata nanao go iki mazala kaega, iato mata miasoka velaka go ita. Mana takoborona tokama qita qata agava ne go, iato mata sapu velake go.

²⁴ Do takoboro na tokama qita, qatiki agava ne go kaega, mara ko gere so de igo ko na. God tanuna i van somasoma ne go tokama ne, go tina ko ne qira mazala takoboro suka ro qatiki mia va mazale go kaega.

²⁵ Iago i kaega ka vari va tavota na de ikoego tokama ne, osina soso takoborona tokamana ne, tarina vari vagatagata mana vari vatatavisi go.

²⁶ Ṉalu kaki takoborona tokama ne i vokara, osina kero ne takoboro tarina vokara napu.

²⁷ Ramu osiqamu, qamu tokamana Kristo mana osiqamu, qamu takoborona ia go.

²⁸ Loborona eklesia ne, God i taru qira koko na basoero. Kenaqa na i taru qirae ria apostoloro, varuana ria propeta ro, vapisana ria vano vari vatatana, mana ria iri zazu nego zazu vari vapoloso ro, kakiaro vano iri mazala go vole va velaka qira go vano mokoso, kakiaro vano iri mazala tavisi ne qira basoero, mana kakiaro iri mazala seko ne seko kakavata ro.

²⁹ Osiqira iriki apostolo kaega ba propeta ba vano vari vatatana kaega, osiqira i kaega ne qira karaputa go tarina zazu nego zazu vari vapoloso ro

³⁰ ba vole va velaka qira vano mokoso, ba seko ne seko kakavata ro, ba sine lupase ne seko kakavata ro igogo ne.

³¹ Do muna pada ne pala na sosovolomo mazala ro nae, tanego i lete velaka sivala. Ninidena era qa soko sine vasadake na pata i lete velaka sivala ne osina pata.