Kameka Korinti 11 - Vato Vari Vakameka Voru Ia Batu Ne

¹ Iago muna lulua vatovato era, gerena era qa lulua go vatovato ia Kristo.

Vatovato Ria Qolero Lotu

² Qa vazaka qamu, tanego qamu nanao taruava era, mana osina ṉalu qamu lulua vari vatatana qa teke bana ne qamu go.

³ Do ninidena era qa soko ramu muna rove velake, Kristo i kuzuku ne qira osiqira valeke ro, mana valeke busi i kuzuku ne qole ia mana God i kuzuku nego Kristo.

⁴ Iago ṉalu kameka valeke i lotu ba i tamana qira basoero sauna sine vasadake na Tarama Velaka ia God, do iara sapua so kuzukuna igogo ne, basoe nae i mia vaqoqore so Kristo.

⁵ Mana ṉalu qole busi, i lotu ba i tamana ne seko ia God de iri koego basoero topu do, ki sapua kaega kuzuku na igogo ne, ia i vaqoqore valeke ia. Ianae iki vari kakavate kaega de koego ia, mana qole iteria go uguruna na go.

⁶ Ṉalu qole iki sapua kaega kuzuku na itora to mara puta vapusia uguruna. Do ṉalu qole nae iputa ba teria uguruna, qole nae tina agava, iago itora ia mara sapu bana so kuzukuna.

⁷ Valeke iki tora kaega mara sapua go kuzukuna, tanego valeke to ipala go dudulena God, tanego ivasadaka me karaputa ia God isadake de ikoego ia, ba qole ne lalana so karaputa ia valeke ia isadake go ia.

⁸ Tanego ṉalu God i vazaria go valeke iki vazari me ze kaega de ikoego qole, do i vazari me ze valeke.

⁹ Mana God ivazaria valeke go tina tavisi ne qole ia iki go kaega, do ṉalu ivazaria go qole, go mara tavisi ne valeke ia igo.

¹⁰ Iago qolero iri koe polana karaputa ria valekero ria. Do tanego i sauqira aqeloro ne go, osiqira qolero mara ria sapua kuzuku qira.

¹¹ Do too ita ireqe go de ikoego Batu ne, valeke ivamazale qole mana qole ivamazale valeke.

¹² Tanego qole ireqeme de ikoego valeke mana valeke i podo me de ikoego qole. Mana God ivazaria go osina pata.

¹³ Muna toere va velake so tanuqamu de tina gogo qole imazala go lama lotu tavise na de ikoego God, ṉalu iki sapua go kaega kuzukuna.

¹⁴ Ba vatovatona i mimia ita vano basoe ne, ṉalu valeke i varaqia go uguruna imimia sakata.

¹⁵ Tepa ria qole ro ne, ṉalu iri valoda go uguru qira i mimia velaka. Tanego God iteke ne qira uguru loda go tina sapua go kuzuku qira.

¹⁶ Do ṉalu kakiaro ramu qamu soko go vari valegu ne na pata dena, tepa reremu mana kero ne vano lotu ia God gogo ne, era qa mazala sine na i kaega napu kaki dia timunara lulua go.

Totolono Na Zuka Na Komonio Ne

¹⁷ Pataro qa vele sine go era ninidena, era qaki vele seko vazaka qamu kaega ramu, tanego ṉalu ro qamu pala go pepeu na lotu, ramu qamu vasakata qira so basoero ne.

¹⁸ Pata kenaqa qa soko vele sine ne qamu, kakiaro basoero ne iri sine nava, iri go, ṉalu qamu kameka teṉo go, ramu qamu vari votae koko sukasuka ro, mana qamu vari valegu go. Qa nanao pata ro iri sine nava go dena ipata ogoto.

¹⁹ Ramu qamu vari vota bana to, go tamuna mia rove akena tane i lulua go seko ogoto.

²⁰ Ṉalu qamu kameka teṉo go, iki pata gege ia kaega Batu ne, tane qamu ge go.

²¹ Tanego ṉalu qamu ṉaṉa go, kaki basoe i ge so pata gege ia tanuna qamu go so, iato go kakiaro basoero iri saqo mana kakiaro basoero iri kuma sivala ne loka vari vabulaṉoe.

²² Avigo ikaega ne qamu pade, go tamu za koe mana ṉaṉa mana ge loka mego? Ramu qamu vasakate eklesia ia God mana qamu va agava qira basoero i kaega ne qira go pata gege go. Qamu nanao avana tuna sine ne qamu go era sauna pata dena? Avigo qamu nanao tuna vazaka qamu? Kaega to! I makuru sakata.

²³ Vari vatatana i teke nava go era Batu ne, iato qa tarama lupo ze de qamu koego, mana vari vatatana nae iato de. Kuse na ṉalu Jiudas i va besa ne ia, Jesu i pala bureri

²⁴ i seko velaka ne zaqe God, i pasia bureri mana igo dena. “Ia dena i tokamaqu era, qa tekene qamu ramu. Zazu ne ia dena go tamuna nanao taruava era.”

²⁵ Ṉalu iri ṉaṉa lupo, Jesu i pala napua kapu i purake vino mana igo dena, “Kapu dena i varitoqe voru ia God de iri koego basoero ne, qa lala vanadu ze parasaqu era. Osina ṉalu qamu besia go, muna nanao taruava era.”

²⁶ Talupasana osina ṉalu qamu ge bureri dena mana besia vino ikoego kapu dena ramu qamu va mia qirae kero ne basoero ne, le i vaego Batu ne, go tina doka go ṉalu Batu ne tina lama napu go.

²⁷ Iago ṉalu basoe i ge bureri mana i besia kapu ia Batu ne, do i va patavolome so, basoe nae i vasakate tokamana mana parasana Batu ne.

²⁸ Iato gogo nogotona basoe mara toere tekere too ia, mana taramuzina tinara mazala go ge na bureri mana besia vino ikoego kapu ne.

²⁹ Ṉalu kaki basoe i ge bureri mana i besia vino ikoego kapu ne, do iki mia rove kaega, iadena i tokamana go Batu ne, basoe nae, itaru ze varitanae ia God de ikoego tanuna.

³⁰ Iato go topu ria basoero nae iri mokoso, iri pela mana topu ria iri le go.

³¹ Do ṉalu qata toere va velaka bana too ita, God tiniki ara va lepulepu qita kaega.

³² Do God i taru ze varitanae ia too ita. Ia i va lepulepu qita, go tatana rove zuka totoloṉo ia. Go ṉalu tina taru ze varitanae ia de iri koego kero ne basoero na kolabana pua ne, ita tataniki lepulepu tavisi qira kaega.

³³ Iago vakitaka ro era, ṉalu qamu teṉo go tamuna ge pata gege ne, muna piri napu ne qira kero ne vakitaka ro ramu go.

³⁴ Ṉalu kaki basoe i lete saqo, ia mara ṉaṉa bana me pade ia, go God tiniki taru ze kaega varitanae ia, ṉalu qamu kameka teṉo, go tamuna ge go pata gege ne. Ba kakia ro pata napu, ṉara va totoloṉe so ṉalu tuna garetu napue de qamu koego.