Kameka Korinti 10 - Vato Vari Vakameka Voru Ia Batu Ne

Kasi Vazakana Na Beku Ro

¹ Ramu turaquro, era qa soko ramu muna nanao tarua, pata idoka qira go kazigarata ro ita iri lulu bana mego Mosese. Ria iri koe so vari miasoka ia toba ni bara ne qira, mana go iri kava velake go masi mesara ne.

² Ria osiqira iri gerena iri bapitemae toba mana besi go. Ianae i va sadake ria iri lulua Mosese.

³ Ria osiqira iri ge so kameka pata gege iteke ne qira go God.

⁴ Mana osiqira iri besia besi na bakoso i valame go God, mana bakoso dena i Jesu Kristo tanuna.

⁵ Patavolomo osina pataro dena iri pala go, do osiqira iriki vakula so kaega God. Iato gogo iri le repe so osina dia sasaniqa i kaega go pata podopodo na ne.

⁶ Osina pataro idoka qira go ria dena iri gerena kameka vapadapada, de qata koego ita, go mata kasi soko na pata sakata ro iri zazu ne go ria.

⁷ Mata kasi vazaka na beku ro gere qira kakiaro iri zazu ne go. Buka tabo ne i sine bana, “Basoero nae iri koloku ṉaṉa mana ge loko vari bulaṉoi, iri veqa mana vari vagabu go.”

⁸ Ita mata kasi sorue na vari vagabu gere qira kakiaro ria iri zazu ne go. Mana karabete kapisa mao ria iri kameka le so kameka ṉalu.

⁹ Mata kasi pada ne ze na, pada ita de ikoego God, gerena kakiaro ria iri zazu ne go, gonae dole ro vae vale qira go.

¹⁰ Mata kasi nuinui gere qira kakiaro iri zazu ne, tanego aqelo na le i lama vae vale lupo bana qira so go.

¹¹ Osina pataro dena i dokae de iri koego kazigarataro ita, go mara vasadake vapadapada de iri koe kero ne basoero, mana iri karo bana gerena kameka vabanabana de qata koego ita. Tanego ita qata too ninidena, qata garogaro za to lupolupo na vudu pua.

¹² Ka basoe i nanao i degere vanadu igogo ina miasoka, niki go za soru.

¹³ Osina pata pada ro iri lama pada ne qamu, iri gerena so padaro idoka qira go basoero ne. Do ramu God i soti vanadua pui ia, mana iki vamalumua kaega kaki pata pada tina lama pada ne qamu ramu, tina sivale go karaputa raramu. Ṉalu ramu tamuna soba go pata pada, God tina teke ne qamu karaputa go tamuna vanadu taru, mana tina teke ne qamu zuka tamuna sipore go.

¹⁴ Iago turaquro, muna paqa kasine vazaka na beku.

¹⁵ Ramu qamu vano tarove, iago seko era qa sine ne qamu go dena, tanuqamu munara nanao rove go.

¹⁶ Muna nanao zaqe kapu na komonio qata seko velaka ne zaqe go God. Ṉalu qata besia go kapu dena, ita qata vari soso ne parasana Kristo, mana bureri qata ge go ita, qata vari soso ne tokamana Kristo.

¹⁷ Tanego kameka bureri dena osiqita qata ge go, qata vari soso ne so kameka tokamana Kristo.

¹⁸ Nanao zaqe vano Izirel iri ge go pata iri komakoma ne zaqe go God, go iri vakameka ne go ia.

¹⁹ Avigo tane talukasana pata qa sine go era sauna pata gege iri tavatavara ne za qe beku, i zari mazalana?

²⁰ Kaega! Pata qa sine go era dena, de iri tavatavara ne ze go beku ro, i ke iato manuru ro, iki ke ia kaega God. Iago, era qaki soko kaega ramu tamuna vakameka ne zaqe go manuru ro nae go.

²¹ Iki tora kaega ramu tamuna besia go kapu ia Batu ne mana besi napua go kapu ia manuru, mana ṉaṉae tevolo ia Batu ne mana za ṉaṉa napue tevolo ia manuru go.

²² Ba qata soko vaqora na Batu ne? Qata nanao bana qata mazala sivala ne ia qata go?

²³ I ogoto qamu sine go, “Remu qimu mazala so zazu ne kaki Pata qamu go,” do osina pata iki pata velaka lupo so kaega. Remu qimu talukasa ne so zazu ne na kaki pata qimu soko go zazu nena qamu gogo, do osina pata iki pata velaka lupo so kaega gogo tina tavisi qita go.

²⁴ Iago kaega kaki basoe mara nanao itanuna so ina gogo, do ita mata nanao tavisi ne qira kero ne basoero go.

²⁵ Ramu qamu talukasa ne so gena miti ro iri volivoli ne ze go de volivoli ro. Iago ikaega so kapata na tamuna ge ze go miti ro nae.

²⁶ Tanego Buka tabo ne i sine, “Vudu pua mana osina pataro iri koego i patapata ro ia so Batu ne.”

²⁷ Ṉalu basoe iki vaogote go kaega Kristo i sine nigo, ono za ṉaṉa tavisi ze ia pade ia sauna pata gege ia, ono ge pata gege iteke nigo, i kaega kapatana tono tana lulusu ze go ia pata gege nae.

²⁸ Do ṉalu basoe nae i sine nigo sauna pata gege nae iri tavatavara ne zaqe beku igogo ia ne, oniki ge pata gege nae, sauna go tono tavisi ne go basoe nae.

²⁹ Ianae ne, nanao mu aro i velaka so, ba nanao na basoe nae oniki vasakate. Kadigo kameka basoe tina go, “Avigo tane nanao na basoe dena iva kaega zava era ge na pata itoqe ne mego puṉuqu.

³⁰ Era qa seko velaka bana ne zaqe God tane sauna pata gege dena tina go.”

³¹ Sauna ianae ne, ṉalu qamu ṉaṉa koloku ba qamu ge loka ba kakia so kapata qamu zazu ne go, muna vazaka zaqe so God.

³² Too raro mara kasi zazu ne ze na pata tono vasakata ze go kene basoe, patavolomo i basoe Jiu ba iki basoe Jiu kaega ba i basoe lotu ia God.

³³ Muna zazu ne so pata qa zazu ne go era. Tanego pataro qa zazu ne iki sauna kaega velaka era tanuqu, do sauqira basoero topu go mara ria kula mana go mara ria kavele qa go.