Judi 1 - Vato Vari Vakameka Voru Ia Batu Ne

¹ Era Judi kameka basoe zazu ia Jesu Kristo mana qa kaena Jemisi. Qa karo ne qamu ramu basoero ikoru bana qamu go God, qamu koe go mamaligara ia God Tamaqita mana vari miasoka ia Jesu Kristo.

² Go manava, bule mana mamaligara mara kotavisi qamu osina ṉalu topuro ne.

Vano Vari Vatatana Poqepoqe Ro

³ Ramu turaquro, qa lete soko karo ne qamu ramu kameka leta sauna vari vakavele qata vari pala ne go. Do ninidena to qa nanao lulusu zaqe to, itora to era ma karo ne qamu leta dena, go ma sine va karaputa ne qamu go muna varitara moqere ne, bara ne na vaogoto qamu pala bana go. Kameka ṉalu so God ivalame ne qira go basoe ia, vaogoto dena iato iko osina ṉalu topu ro ne.

⁴ Tanego kakiaro basoero iri keba siko me de qata koe go ita vano lotu mana ria dena iriki soko kaega osaka ne na God mana iri itane Mana ia God valulu ze vatovato sakata ro mana iriki toqe ne kaega Jesu Kristo qata va Batua go ita. Do Buka tabo ne i sine bana meso ia tane kimata tina pala qira basoero dena.

⁵ I pata ogoto, ramu qamu rove lupo bana to tane pataro dena, do era ma vananao taru napu qamu e ramu de igogo Batu ne, i vakavele qira ego vano Izirel vudu Izipito, do ia i vae vale napu qira vano iriki vaogote go kaega.

⁶ Muna nanao taru napua, aqeloro ne God iteke napu ne qira so karaputa mazala ro ria, do kakiaro ria iriki soko kaega, gonae i va kasi ne qirae de koko velaka ro ria. God i doki taru qira e seni mana taru qira qe bolu i rodoko, go tina za doka so ṉalu musaqara lavata God tina varitanae ne qira go osina basoero ne.

⁷ Muna nanao napu zaqe karua komala dena, Sodom mana Qomora mana komala ro iri ko garogaro qiru go. Vano iri koe go iri gere napu qira so aqelo ro dena, iri vari vagabu, mana taunata go, iago vokara ria to nako lavata iki rove go kaega za le. Iato nae to vari va bana bana titita mata nanao tarua go.

⁸ Vatovato dena igerena napu so basoero iriki vaogote go kaega God. Ria iri mia kukureka ria iago, iri va zazua so vasakate na tokama qira mana iri vaqoqore karaputa ia God mana iri seko vasakate aqelo ro ia God iri koe go rani ne.

⁹ Aqelo Maekolo batu ria aqeloro ne do iki sine ne kaega Satana seko sakata ṉalu iru pera ne go pala na sinara na Mosese do ia i seko go so dena, “Batu ne so ṉara rovi go aro.”

¹⁰ Do basoero dena iri seko sakate so pataro iriki rove velake go kaega. Do pata ro iri rove go ria ne, iato pataro iri zazu ne go so pata qaraqara ro ne. Iago pataro nae to ivasakata qira go ria.

¹¹ Iago iri na miasoka! Tanego iri lulua go vatovato i lulua bana go Ken. Iri lulu napua de igogo propeta Belam, ipala ze kesa loborona seko poqe ro ia. Iri vae vato gerena de igo bana go Kora i vae vato e de ikoego God. Iago God tina lete vasakata sivala ne qira gere de ivane go Kora.

¹² Basoero nae iri gere poṉo ro ikoego pata gege qamu vari ge ne go. Qamu kameka ṉaṉa, do iriki sareki kaega tanego iri nanao so tanuqira. Iri gere toba i kaega go ka nare ikoego, tanego seva i kiuri vatelo za. Iri gere moki ro i kaega go ure qira ṉalu i doka go ṉalu tarina ure go. Iago vano zazu iri toqo rapusu qira mana taru qira gogo iri le go.

¹³ Ria basoero igogo dena too vari va agava iri zazu ne go, iri gere so oba zavarata isasapa i za pala me soso sinaqe na uzaka ro mana lama taru ze rikisi go. Iri gere domiri ro iri kasi ne de koko ria gonae God itaru qira qe kaki dia i rodoko tarina koe go osina ṉalu.

¹⁴ Inoke i vaonomona to basoe ireqe mego tapoko ia Adamo, i sine bana me seko dena de iri koe go ria igo, “Muna mia! Batu ne tina lulu me qira mao na aqelo tabo ia

¹⁵ tina lama varitanae ne qira basoero topu mana tina vakimata qira vano sakataro iriki vaogoto kaega mana iri zazu ne pata sakata ro mana iri seko sakate go ia!”

¹⁶ Basoero dena iri poro seko mana zaṉaṉa vapala qira eso basoero pataro, iri poro lulua so nanao sakata ro ria. Iri poro vazaka napu mana vae vale qira eso basoero ne seko vari vagasi ro ria, go mara ria pala qirae patapata ro ria basoero ne sauna tavisi ne qira tanuqira iri go.

Seko Vabanabana Ria Vano Lotu

¹⁷ Do ramu turaquro, muna nanao tarua pataro iri sine bana ne qamu go ria apostoloro ia Batu ita Jesu Kristo.

¹⁸ Iri vane qamu dena, “Tarakenaqa na go tinara lama doka go musaqara muzimuzi, basoero ne tarina vakari ne qamu mana ria tarina lulua so nanao sakata ro ni soko go nanao qira, ba tepa ia God ikaega e to de iri koego.”

¹⁹ Ria to basoero iri gogo dena iri pero go to lotu, tanego iri lulua so nanao ria tanuqira mana iriki pala kaega Spirit tabo ia God.

²⁰ Do ramu turaquro, vazazua vaogoto ramu i tabo, go tina valavate go, vaogoto ramu mana pene Spirit tabo go tina tavisi qamu go.

²¹ Mana taru vanadu qamu e loborona mamaligara ia God, mana ko piri e de ikoe go Jesu Kristo tina teke ne qamu manava, mana too iki rove go kaega lupo go.

²² Ṉalu kakiaro basoero vaogoto ria, iara karaputa, muna tavisi ne qira.

²³ Basoero iri vele soru za go nako ne, muna katikili toqo vaule me qira e zuka totoloṉo go mara ria kavele. Kakiaro ria soko na so pata sakata ro i kenaqa ne go too ria, iago muna vasadaka ne qira manava ramu, do muna miasoka ze too ramu, niki go kakia ramu lulua too sakata ro ria nae.

²⁴ God i lete karaputa mazala sivala go, i mazala va noto qamue tepa ia vasakata pata mana i vadalo qamue tarakenaqana tanuna, mana i teke ne qamu kulakula go.

²⁵ De i koe kameka so God dena i va kavele qita e de ikoe go Jesu Kristo Batu ita. I tora ita mata vazaka vitoṉona, i Batu lavata sivala, i varavarana, karaputa ia iko bana meso, iko ṉalu ninidena, mana tina ko dokae ka ṉalu gado kutona i kaega! Amen.