Jemisi 5 - Vato Vari Vakameka Voru Ia Batu Ne

Muna Miasoka Ramu Vano Vavagado

¹ Ninidena ramu vano vavagado muna gatava era. Vokara mana dae lavata tina dokae go de qamu koego tina lete sakata sivala.

² Vavagado ramu ilama nameoro lupo so, mana roku menomeno ro ramu ige lupo kuzu.

³ Qolu mana siliva ro ramu, do iri bebega lupo, mana bebega nae iri vasadaka me to kebu ro ramu mana ige napua to tokama qamu go. Gerena nako i subi lupo go pata ni sakata go. Do ramu qamu pala teṉo neso pata vavagado ro ramu musaqara ro dena.

⁴ Basoero qamu vazazu qirae go barue ro ramu, do qamu ki voli velaka qira so kaega. Iago muna gata qirae ramu tane nuinui ro ria nae. Tanego sauna nuinui ro ria nae igata me God Batu lavata sivala ne.

⁵ Too ramu pua dena, ramu qamu lete pala to pata vavagado, mana qamu lete vakula to tokama qamu go. Tokama qamu i lete lavata, tanego qamu lete va ṉaṉa velaka qamu tanuqamu. Ia to nae tanego musaraqara muzimuzi God tina vae vale qamu go.

⁶ Ramu qamu tulaṉa vale ne qira basoero velaka, do ria iriki valegu qamu kaega.

Ko Noto Mana Pene

⁷ Turaquro, muna konoto so go tina za dokae go ṉalu tina lama napu go Batu ne. Ramu qamu rove, ṉalu basoe i leba lupo go pata lebaleba na barue ia, ia iko piri ne so saṉa mana nare go tina lama vamomorua go pua ne mana go tina vaure go pata lebaleba ia ni leba go.

⁸ Ramu napu to go, muna ko noto so, mana vanadua ruqe ramu, tanego musaqara ia Batu ne tina lama go igarogaro meto.

⁹ Kasi seko varivasasakatae tanuqa-mu go God tiniki varitanae ne qamu go kaega. Batu na varitanae ogoto ne igarogaro meto, i vanama ne to lama.

¹⁰ Turaquro, nanao tarua propetaro ne iri tamana bana ne go vitoṉona God Batu ne. Iago muna pala qirae vapadapada na ko noto ria, iri vanadue so vokara ro iri pala go.

¹¹ Ita qata koru qirae ria, kula tanego iri konoto, mana vanadu ria nae tane vokara ro iri pala go iza vadoka qirae go ria valupolupona too ria. Ramu qamu gata bana de igogo Zobi. Topu pata makuru ilama dokae go de ikoe go, do ia ikonoto mana vanadue so de ikoe go God. Mana taramuzina God itavisi ne ia, tanego God ipurake manava mana varinanao de iri koego basoero ne.

¹² Ia qo turaquro, pata ilete lavata sivala go muna nanao tarua go ramu, igo dena. Ṉalu qamu odo odo ne go kaki pata kasi odoodo aqe rani ne, ba pua dena. Ṉalu qamu rove ramu i pata ogoto, igogo iane, “O, iogoto,” muna go, mana ṉalu iki ogoto go kaega iane, “Kaega,” muna go. Iato nae gogo God tiniki vantanae ne qamu go kaega.

¹³ Ṉalu kaki basoe iko ne makuru mara pene God. Ṉalu kaki basoe i kula, mara kera vazaka God.

¹⁴ Ṉalu kaki basoe ikoe de qamu koe go i mokoso go ia ne mara sine ne qira vano iri kenaqa ne go lotu go maara pepene ne ia, mana qula ze ia tala loborona vitoṉona Jesu Kristo Batu ne.

¹⁵ Mana pepene iri zazu ne go dena tina reqeme to vaogoto ria de ikoe go God gogo tina vavelake go basoe mokoso ne. Mana basoe mokoso ne mara nanao ule ne sauna vasakata pata ia izazu ne go, gogo Batu ne tina teke napu ne ia too velaka.

¹⁶ Iago ramu muna sine vasadaka ze vasakata pata ro ramu de qamu koe go tanuqamu, mana muna pene ne basoe ni mokoso go tina velaka go. Pene ia basoe itotoloṉo go ikoe karaputa go tina va velaka qira go vano mokoso.

¹⁷ Ilaiza ibasoe gere qita so ita, do ṉalu i pene vakaraputa ne go ia, go mara kasi nare igo la, gonae kaega so ka nare i sorue go vudu pua. Mana torana kapisa mana takoborona ave iki nare go kaega.

¹⁸ Mana ṉalu Ilaiza ipene napua God go mara nare napu igo ia, nare i soru napu me tepa rani ne torana napu kapisa mana takoborona ave.

¹⁹ Turaquro, ṉalu kakia basoe izaza rore kasi ne go vaogotona tarama velaka ne, muna pada ne pala vaule na ia.

²⁰ Ramu muna nanao tarua seko dena. Basoe ni vataleqe ule mego basoe ivasakata pata go, basoe tonae ivakavele go madauna basoe nae tepa ia le. Mana basoe tonae i papaqa go zuka ia God go tina nanao ule ne qira go vano iri vasakatapata go.