Jemisi 3 - Vato Vari Vakameka Voru Ia Batu Ne

Miasoka Kalamiamu

¹ Ramu turaquro, iki tora kaega topu ramu muna lama vari vatatana go. Tanego ṉalu na varitanae ia God tina lavata sivale de iri koe go vano iri vari vatatana go, mana de iri koe go basoero tina suka.

² Osiqita qata zazu ne so pata kebu. Do ṉalu kameka basoe iki vakebua go kaega seko ia, iato i basoe totoloṉo sivala go mana i mazala to miasokana too iago.

³ Ita qata taru ze takoborona suka aeana saqena ose go ia tina lulua go nanao ita mana vazao ze ia de qata soko go zaena,

⁴ ba nanao lulusu zaqe kameka koluka vasesele lavata ne, sokoro karaputa so tinara vazazao go, do sitia suka sivala so ivatotoloṉe go mana ibiru vazao ze go de isoko go basoe ni palataru go.

⁵ Ianae igerena napu so kalamia na basoe, ipata suka sivala so, do imazala seko vakanata, mana vazakanapu nena pata ilete lavata sivala go. Muna nanao zaqe so riva qeqetona barue ne. Kameka nako kamu suka so i mazala go subi lupona rivana qeqeto lavata nae.

⁶ Saqena basoe do izazu gere so nako ne, mana ipurake to topu pata sakata ro. Patavolomo i kameka pata sukae go so tokama qita ita, do imazala so vasakata lupona osina dia tokama qita. Mana ianae i vasakata lupo to osina too ita, paluze to sakataro iri reqeme go nako ne.

⁷ Basoe imazala so vamanakamena pata qaraqara piru ro, palero, mana pataro iri zodale go pua ne, mana iṉana ro ne qo.

⁸ Do ikaega ka basoe imazala go vamanakamena kalamia. Tanego kalamia i mazala to sine na seko sakata imazala go vaevale na basoe.

⁹ Saqe qita qata seko velaka ze Batu God i Tamaqita go, mana qata tulaṉa ne qirae basoe go, patavolomo izazu ne qita mana ivagere ze go tatalina tanuna.

¹⁰ Avigo tane sekona varivakula mana seko na tulaṉa go iru kameka reqeme so kameka saqe gogo na? Ke ramu turaquro, vatovato igogo dena tarakasi sadaka me.

¹¹ Tanego besi velaka mana masi kasapa iruki reqeme kaega kameka vuala.

¹² Qamu rove, urena moki piqi iki mazala kaega na ure go moki olivi, urena qrep iki mazala kaega na ure go moki piqi. Ba masi kasapa iki mazala kaega tina besi lunuru go.

Tarove Ireqeme Rani Ne

¹³ Akena tane kaki basoe tarove ikoe de qamu koe go, mana irove osina pata igogo na? Basoe nae mara vasadaka me to, too velaka ia, mana pata velaka ro ni zazu ne ze go too kovasoka ia ireqe mego tarove iago.

¹⁴ Do ṉalu puṉu qamu ikoe go qora mana muma, ṉaṉa siko gogone, kasi vazakanapu nena tarove ramu, iki pata ogoto kaega.

¹⁵ Tarove igogo nae iki ireqeme kaega rani ne, do ireqeme so pua dena, mana iki ke ia kaega madau, do ike ia so Satana.

¹⁶ De ikoe go qora mana ṉaṉa siko gogo ne tina ko banae so legulegu mana soso vatovato sakata.

¹⁷ Do tarove ireqeme go rani ne idalo bana me so tupiana na osina pata mana ireqeme too bulebule, too poro seko nena kaega pata mana too varikitaki. Iago ipurake to too varinanao, mana ivazari me to urena zazu velaka sivala, iki vari kakavatae kaega mana too tatakiu ne qira kaega basoero ne go.

¹⁸ Vano varivabule iri lelebae to loborona bule, ria to nae iri mazala go vazarina urena too velaka mana totoloṉo ni vakula go God.