Iburu 3 - Vato Vari Vakameka Voru Ia Batu Ne

Jesu I Sivala Ne Mosese

¹ Vakitaka ro era loborona lotu, God i koru bana qamu! Nanao vamazale Jesu, God i turine ne ia tina Batu ria patere de qata koego, i mazala go sine vasadake na vaogoto ita.

² Ia i osaka ne God mana God i vine ze ia zazu dena, gere so Mosese i osaka ne zazu ia, mia soka na basoero ia God.

³ Basoero ne tarina mia vamazale basoe i zazu ne go pade ia, tina sivala ne dego iri mia vamazale go pade ia. Igere napua so, basoero mara mia vamazale Jesu i sivala ne Mosese.

⁴ Osina ro pade qata rove, basoe so i zazu ne, do God i vazaria go osina ro pata.

⁵ Mosese i osaka ne miasoka na basoero ia God. Gere na valeke zazu, mana i seko ne pataro tinara sine go God ṉalu i ara ko mego.

⁶ Do loborona osaka i vae go Kristo i tuna go God, iato i kenaqa ne miasoka na basoero ia. Ita to qata basoero ia ṉalu qata va nadua go vaogoto ita mana vanadu ze nanao qita de ikoego God.

De Tarina Zino E Basoero Ia God

⁷ Iato go Spirit tabo ne igo, “Ninidena ṉalu qamu gata go seko ia God,

⁸ kasi kuzuku lavata gere qira vano ṉalu bana ramu iriki soko go kaega gata na seko ia God. Ko iri vae go de ulana ne, iri soko so mia na pataro tina zazu nego God.

⁹ Loborona vasiṉaulu ave nae ria iri pada taru nava so, iri soko mia na pataro tuna zazu nego era, patavolomo iri mia bana go.

¹⁰ Iato go qa muma ne qira go basoero nae mana qa sine, ‘Iri kasi qira taru zena nanao qira, era tane qa kenaqa ne qira go, mana iriki toqe ne kaega lulu na Tamana ro era go!’

¹¹ Qa muma, mana qava nadu ze nanaoqu seko era, ‘Ria tariniki keba me kaega pua dena go tuna vaziṉo qirae go.’ ”

¹² Vakitaka ro era loborona lotu, muna miasoka niki go kakia ramu niki sakata nanao na mana vaogoto ia niki pela mana zaza kakavata ne God i ko osina ṉalu topu ro ne.

¹³ Go ramu mara kaega ka basoe tina riroe go vasakata pata mana kuzuku lavata go, muna vari vatatavisi osina musaqara, lulua vitoṉo “Nini” i teke qita go Buka tabo ne.

¹⁴ Tanego ita osiqita qata kamekae Kristo ṉalu qata pala vanadua vaogoto ita de koe God gere na so kokoso pala qata vae nego.

¹⁵ Iato dena pata i sine go Buka tabo ne, “Ninidena ṉalu qamu gata go seko ia God, kasi kuzuku lavata gere qira vano ṉalu bana ramu iriki soko go kaega gata na seko ia God.”

¹⁶ Ake ria to basoero iri gata go seko ia God, do iriki soko kaega pala na? Ria to basoero ilulu vasiporo qira e go Izipito Mosese.

¹⁷ God i muma ne qira ake ria torana vasiṉaulu ave na? Ria to basoero iri vasakata pata go iri soru mana le loborona de ulana ne.

¹⁸ Ṉalu God i vanadu ze nanao na igo, “Ria tariniki keba me kaega pua tuna vaziṉo qirae go,” ake ria tane i seko nego dena? Ria to iriki soko go kaega gata na God.

¹⁹ Iago ita qata rove i makuru qira tarina keba za pua igogo ne, tanego iriki vaogote go kaega God.