ZEPHANIAH 2 - PATHIAN LEKHABU THIANGTHO (BSI)

Israelte Mêlma Chung Ah Vaihawmna

¹ Hung khawm unla, hung kikaikhawm tau in, nanghaw jachâkna châng helo nam tinte haw,

² busi hui in a mut mang gual ah naw mang ah la um masang un, la chung ua Lalpa lungnatna huaisia tak a hung tun ma ah, la chung ua Lalpa lungnatna lau um tak a hung tun masang hin.

³ Gam sung ah mi kingaitawm ah, a thupiakte zui tapo in Lalpa hawl tau in; diktat un la kingaitawmna hawl tau in; Lalpa lungnatna ni ah sêl gûk ah la um thei khâk leh.

⁴ Gaza chu nutsia in um intin, Ashkelon le a hawm ah nutsia hung hi’n a; Ashdod ah mite chu sûnchang lai tak ah deldaw hi’ntin; Ekron chu a zung ah bawdaw hita’n a.

⁵ Tuisuagiat pâm ah chêngte leh Kereth mite chung chu a gik hi! Aw Kanaan, Philistinte gam; la sung ah mihing pakhat ziang le, umlo dingin hun susia ding ka hi.

⁶ Nangma, tuisuagiat pâm chu gancha tatna mun, belampute belam chinna mun leh, gan-gualte huang hung hita’n la.

⁷ Tuisuagiat pâmte chu Judah Inkuan lak ah, a umsun te chanvo hung hi’ntin; zia tak ah chun a gan honteu tatsak intiu in, nitâk lam leh Ashkelon ah chun giak ta’n au. Lalpa a Pathian un amau chu kantha ta’n tin, a vangphatnau hun pia kit ta’n a.

⁸ Moabte engho’na leh Ammonte hosiatnate, a gam uh kisuanpi ah ka mite a simmaw dan uh ka he tai.

⁹ Ziaziakchun, Israelte Pathian, sepai honte Lalpa chun: Moab chu Sodom gual in, Ammon chu Gomorrah gual in bawl ing ka tin, ham lingnei ke’na leh chi khûk, kumtuang ah mat tâk lo gam suak ta’n a. Ka mipite lak ah a umsun te’n suam intiu in, ka mi a um nalaite chun lua ta’n au.

¹⁰ Sepai honte Lalpa, mite chung ah ki-uansak tak ah, a la nuisan tâk ziak un, a chapo’na ziak un zia hi a chantum uh hita’n a.

¹¹ Lalpa chu a chung un huham intin, lei chung ah pathian zosia lau ah kithinsak ta’n tin; mitin in a umnau mun chiat ah kipat tuisuagiat pâm leh, tuikual gam zosia ah kipat in, a âng ah hung bokkhup ta’n au.

¹² Nanghaw Ethiopiate le ka chemjam ah thalup in um ding la hiu.

¹³ Chun, mallam dona’n a khut thadok intin, Assuria chu susia ding ahi; Nineveh a hawm in siam intin, gamkeu gual in siam ta’n a.

¹⁴ Zia tak ah chun bawng hon leh, gamsa chitinte kual ta’n au; gamthip simbupi leh simbuchânglit, a sûtpite ah chun chêng intiu in; a tukvan ah te chun simbu hâm intin, a In mai tual ah chun va-âk tâ ta hen; sidar thing ah In kisate chu a siat gam tâk ziakin.

¹⁵ A haw kha taphot in huaisia sa’n, a khut uh thin khum in: “Zia hi maw khawpi kichawisâng leh bit kisa ma ma ah, Keima bep ka hi, keima tawhbang khawpi dang a um puai,” ti chu! Bang gual bep ah hawm ah nutsia ah um in, gamsate chênna hung hi mai a tam!